ខេត្តប៉ៃលិន ៖ ព្រានព្រៃចំនួន២នាក់ មានកាំភ្លើងគ្រប់ដៃ បានធ្វើសកម្មភាពឆ្លុះបា.ញ់សត្វព្រៃនាពេលយប់ ។ ខណៈកំពុងតែនាំគ្នាស្ទាក់បា.ញ់សត្វអស់ចំនួន៣គ្រាប់
ខេត្តប៉ៃលិន ៖ ព្រានព្រៃចំនួន២នាក់ មានកាំភ្លើងគ្រប់ដៃ បានធ្វើសកម្មភាពឆ្លុះបាញ់សត្វព្រៃនាពេលយប់ ។ ខណៈកំពុងតែនាំគ្នាស្ទាក់បាញ់សត្វអស់ចំនួន៣គ្រាប់ ពេលឃើញមន្ត្រីបរិស្ថានចុះល្បាត ក៏ផ្អើលរត់ចោលកាំភ្លើងវែងម៉ាកសេកាសេ១ដើមនៅកណ្តាលព្រៃ ។ ក្រោយមកដោយសារយប់ងងឹតលំបាកក្នុងការដេញតាម ទើបព្រានព្រៃទាំងនោះរត់គេចខ្លួនចូលទៅក្នុងព្រៃទាំងព្រលឹងចុងសក់បាត់អស់ទៅ។ រីឯខាងមន្ត្រីបរិស្ថានកំពុងតាមស៊ើបរកមុខម្ចាស់កាំភ្លើង១ដើមនេះ ។
ហេតុការណ៍នេះបានកើតឡើង កាលពីវេលាម៉ោង៩និង៣០នាទីយប់ថ្ងៃទី៨ មីនា ស្ថិតនៅក្នុងព្រៃជើងភ្នំ ចម្ងាយពីភូមិប្រវែង១គីឡូម៉ែត្រ ក្នុងភូមិអូរប្រើស សង្កាត់អូរតាវ៉ៅ ក្រុងប៉ៃលិន ។
លោក គឹម សុខា ប្រធានមន្ទីរបរិស្ថានខេត្តបានប្រាប់កោះសន្តិភាពកាលពីវេលាម៉ោង៧និង៥៧នាទីយប់ថ្ងៃទី៩ មីនា ថា កម្លាំងមន្ត្រីបរិស្ថានបានចុះល្បាតព្រៃនាពេលយប់ ក៏បានឮសូរសំឡេងបាញ់កាំភ្លើងចំនួន២គ្រាប់ផ្ទួនៗគ្នានៅក្នុង ព្រៃ ។ ដោយសង្ស័យថា មានជនល្មើសបរបាញ់សត្វព្រៃ នៅក្បែរភូមិអូរប្រើស ក៏ចេញទៅពួនស្ទាក់ភ្លាមៗ ។ បន្ទាប់មកកម្លាំងរបស់លោកបានតាមប្រកិតជាប់ពីក្រោយ ស្រាប់តែព្រានព្រៃម្នាក់ទៀតបានបាញ់១គ្រាប់បន្ថែមទៀត ។
លោកបន្តទៀតថា បន្ទាប់ពីទទួលបានដំណឹង លោកក៏បញ្ជាឱ្យតាមចាប់ព្រានព្រៃព្រហើនទាំងនោះឱ្យបាន កុំឱ្យរត់រួច ។ ដោយសារពួកគេដឹងខ្លួនទាន់ ក៏រត់ចែកជើងគ្នា ហើយបោះកាំភ្លើង១ដើមម៉ាកសេកាសេនៅក្បែរគុម្ពោតព្រៃ រួមជាមួយគ្រាប់មួយចំនួន ។ ពេលនោះព្រានព្រៃក៏បាននាំគ្នារត់ចូលទៅក្នុងព្រៃជ្រៅបាត់ឈឹងទៅ ។ ដោយសារតែកម្លាំងរបស់លោកតិចមិនអាចតាមប្រមាញ់ចាប់ព្រានព្រៃទាំងនោះបាន ណាមួយពេលយប់ខ្លាចពួកគេលបបាញ់មកលើ ទើបនាំគ្នាដកថយត្រឡប់ក្រោយវិញ ។
លោកបញ្ជាក់ទៀតថា ព្រានព្រៃដែលបោះកាំភ្លើងវែង១ដើមចោល គឺជាមនុស្សដែលអាចរស់នៅក្នុងភូមិខាងលើ ឬនៅក្នុងភូមិនៅក្បែរៗនោះ ។ ទោះបីជាយ៉ាងណាក៏ដោយខាងលោកកំពុងតែស៊ើបមើល ហើយបើដឹងថា ជាកាំភ្លើងរបស់នរណាម្នាក់ ខាងលោកនឹងរៀបចំសំណុំរឿងបញ្ជូនទៅតុលាការឱ្យចាត់ការតាមនីតិវិធី ។ ចំណែកកាំភ្លើង១ដើមខាងលើ លោកនឹងយកទៅរក្សាទុកនៅមន្ទីរបរិស្ថាន ដើម្បីធ្វើរបាយការណ៍បញ្ជូនទៅថ្នាក់លើជ្រាបជាព័ត៌មាន ។
សូមបញ្ជាក់ថា បន្ទាប់ពីស្ងប់ស្ងាត់ការលួចបរបាញ់សត្វអស់រយៈពេលជាច្រើនខែកន្លងទៅរហូតមកដល់ពេលនេះ ក៏កើតមានបន្តទៀត ដោយមានក្រុមព្រានព្រៃនាំគ្នាដើរបាញ់សត្វក្នុងព្រៃ ហើយបើសិនជានៅមានអាវុធអត់ច្បាប់ប្រើបែបនេះទៀត នៅថ្ងៃណាមួយពួកគេនឹងប្រព្រឹត្តអំពើចោរកម្មដើរប្លន់អ្នកភូមិជាក់ជាមិនខាន ។ ដូច្នេះអាជ្ញាធរ ក៏ដូចជាសមត្ថកិច្ចគួរតែតាមស៊ើបរកកាំភ្លើង១ដើមទៀត ដែលជនសង្ស័យរត់គេចខ្លួនយកទៅជាមួយ បើពុំដូច្នោះទេ នឹងកើតមានអសន្តិសុខក្នុងភូមិរបស់ខ្លួនជាក់ជាមិនខានឡើយ ឬអាចក្លាយជាព្រានព្រៃដដែល ៕
ចែករំលែកព័តមាននេះ