រាជធានីភ្នំពេញ ៖ ដោយមើលឃើញពីក្តីអាណិតអាសូរ និងដើម្បីជួយសម្រួលដល់ការលំបាករបស់ក្រុមគ្រួសាររបស់អតីតអ្នកថតភាពយន្ត (Camara man) ល្បីឈ្មោះក្នុងទស្សវត្សឆ្នាំ៩០ ដែលតារាភាពយន្តជាច្រើនធ្លាប់បានស្គាល់ គឺលោកម៉ុង កាណែត នោះកាលពីរសៀលថ្ងៃទី០៨ មីនា ចំឱកាសថ្ងៃទិវាសិទ្ធិនារីអន្តជាតិ សមាជិកក្រុមយុវជន LKF Family (ស្រលាញ់គ្រួសារខ្មែរ) បាននាំយកថវិកាសប្បុរសជន រួមជាមួយថវិកាដែលប្រមូលបានពីក្រុមរបស់ខ្លួនឧបត្ថម្ភជួយដល់លោកម៉ុង កាណែត ដែលកំពុងធ្លាក់ខ្លួនឈឺជំងឺក្រិនថ្លើមប្រភេទCធ្ងន់ធ្ងរ ។
ចំពោះថវិកាដែលត្រូវប្រមូលបានពីសប្បុរសជន ដើម្បីយកទៅឧបត្ថម្ភជួយដល់លោកម៉ុង កាណែត តាមរយៈក្រុមយុវជនLKF Family នេះ គឺមានទឹកប្រាក់ចំនួន៥៩៥ដុល្លារ និង៩០០០០រៀល ដែលការប្រគល់ជូនខាងលើនេះ បានធ្វើឡើងនៅបន្ទប់សម្រាកព្យាបាលជំងឺលេខ១១៤នៃមន្ទីរពេទ្យមិត្តភាពខ្មែរ-សូរវៀត (ពេទ្យរុស្ស៊ី)។
ជាមួយគ្នានៃការទទួលបានថវិកាឧបត្ថម្ភបន្ថែម និងការមកសួរសុខទុក្ខពីសំណាក់សមាជិកក្រុមយុវជនLKF នេះ លោកម៉ុង កា
ណែត ក៏បានថ្លែងអំណរគុណចំពោះសប្បុរជន ក៏ដូចជាក្រុមយុវជនLKF ដែលមានក្តីមេត្តាធម៌ឧបត្ថម្ភថវិកា ដើម្បីជួយសម្រួលដល់ការលំបាក និងថ្លៃព្យាបាលជំងឺរបស់លោក ។
មិនតែប៉ុណ្ណោះ លោកម៉ុង កាណែត ក៏អរគុណផងដែរ ចំពោះក្រុមគ្រូពេទ្យនៃមន្ទីរពេទ្យរុស្ស៊ី ដែលមានការយកចិត្តទុក្ខដាក់ក្នុងការមើលថែជំងឺ មិនថាតែរូមលោកម្នាក់នោះទេ ពោលគឺទាំងអ្នកជំងឺផ្សេងៗទៀត ។ គិតរហូតមកទល់ពេលនេះ លោកម៉ុង កាណែត បានធ្លាក់ខ្លួនឈឺជំងឺក្រិនថ្លើមប្រភេនCធ្ងន់ធ្ងរ គឺមានរយៈពេលប្រមាណ២ខែកន្លងមកហើយ ។ ខណៈការចូលសម្រាកព្យាបាលនៅមន្ទីរពេទ្យមិត្តភាពខ្មែរ-សូរវៀត ក៏មានរយៈពេល២ដងរួចមកហើយដែរ ដោយលើកទីមួយ គឺលោកបានចូលមកសង្គ្រោះត្រឹមតែរយៈពេល១សប្តាហ៍ប៉ុណ្ណោះ ត្រូវក្រុមគ្រូពេទ្យឲ្យត្រឡប់ទៅផ្ទះវិញ ។
ចំណែកលើកទីពីរនេះ គឺមានរយៈពេលជិត២សប្តាហ៍មកហើយ ។ នេះបើតាមការឲ្យដឹងពីសំណាក់ភរិយារបស់លោកដែលកំពុងស្នាក់នៅមើលថែជំងឺក្នុងមន្ទីពេទ្យជាមួយគ្នា។
គួរបញ្ជាក់ថា ស្ថិតក្នុងអាយុ៥២ឆ្នាំលោក ម៉ុង កាណែត បានធ្លាក់ខ្លួនឈឺធ្ងន់ជំងឺក្រិនថ្លើមប្រភេនC និងមានកូនកណ្តុរចំនួន៣គ្រាប់នៅក្នុងពោះវៀនដេកដាបលើកន្ទេលងើបស្ទើរសឹងមិនរួចឡើយ ។ ស្ថានភាពជំងឺរបស់លោកម៉ុង កាណែត បានធ្លាក់ខ្លួនដុនដាបសឹងតែមិនគួរឱ្យជឿ គឺទើបតែរយៈពេលជិត២ខែប៉ុណ្ណោះ ហើយពេលនេះ លោកកំពុងតែជួបនូវវិបត្តិថវិកាខ្លាំង ក្នុងការព្យាបាលជំងឺទៀតផង ។
ចែករំលែកព័តមាននេះ