ឪពុកម្ដាយដេញចេញពីផ្ទះកាត់កាល់ចោល នាងទ្រហោយំរត់មកប្តឹងនគរបាលប៉ុស្តិ៍
រាជធានីភ្នំពេញ ៖ ស្ត្រីម្នាក់បានទួញសោកបោប្រាណជាខ្លាំង ហើយធ្វើដំណើរទៅប្តឹងនគរបាលប៉ុស្តិ៍ទួលសង្កែ កាលពីវេលាម៉ោង៩ព្រឹក ថ្ងៃទី១០ ខែមីនា
រាជធានីភ្នំពេញ ៖ ស្ត្រីម្នាក់បានទួញសោកបោប្រាណជាខ្លាំង ហើយធ្វើដំណើរទៅប្តឹងនគរបាលប៉ុស្តិ៍ទួលសង្កែ កាលពីវេលាម៉ោង៩ព្រឹក ថ្ងៃទី១០ ខែមីនា បន្ទាប់ពីឪពុកម្តាយកាត់កាល់ចោល ដេញចេញពីផ្ទះ និងយកកូនប្រុសអាយុ២ឆ្នាំម្នាក់។ ស្ត្រីដែលឪពុកម្តាយកាត់កាល់ចោលនោះឈ្មោះ ផុងវ៉ាន់ណេត អាយុ៣៧ឆ្នាំ មានមុខរបរនៅផ្ទះ ស្នាក់នៅភូមិទួលសង្កែ សង្កាត់ទួលសង្កែ ខណ្ឌឫស្សីកែវ។ ចំណែកឪពុកឈ្មោះ ផុង កុកយោង អាយុ៧០ឆ្នាំ និងម្តាយឈ្មោះ គឹម ឆាយ អាយុ៦០ឆ្នាំ មានមុខរបរស្នាក់នៅជាមួយគ្នា។
តាមស្ត្រីរូបនោះបានរៀបរាប់ទាំងទឹកភ្នែកថា កាលពីពេញវ័យនាងត្រូវបានប្រុសៗចោមស្នេហ៍ និងចូលស្តីដណ្តឹងជាបន្តបន្ទាប់ចំនួន៥នាក់ តែម្តាយមិនឲ្យទេ ដោយនិយាយនាងមិនបាច់យកប្តីទេ ពីព្រោះប្រុសៗដែលស្រលាញ់រូបនាងសុទ្ធតែបោកប្រាស់ទាំងអស់ទេ។ លុះក្រោយមកមានបុរសម្នាក់បានចូលទៅស្តីដណ្តឹងទៀតតែម្តាយមិនព្រមទៀត។ ដោយសារតែត្កីស្រលាញ់ នាងក៏បានសម្រេចចិត្តរត់ទៅតាមបុរសនោះរួមរស់នៅជាមួយគ្នា រយៈពេល៣ឆ្នាំ រហូតបានកូនប្រុសម្នាក់អាយុ២ឆ្នាំ ក្រោយមកបុរសដែលនាងស្រលាញ់នោះបានបោះបង់នាងចោល។
ស្ត្រីរូបនោះបានឲ្យដឹងថា នៅពេលថ្មីនេះ នាងក៏បានត្រលប់មកផ្ទះវិញ ត្រូវបានម្តាយស្តីបន្ទោសរករឿង ហើយនៅព្រឹកថ្ងៃទី១០ ខែមីនានេះ ឪពុកម្តាយ ក៏បានយកកូនប្រុសនាង ហើយប្រកាស កាត់កាល់នាង និងដេញចេញពីផ្ទះទៀត ទើបនាងមកប្តឹងនគរបាលឲ្យជួយតែម្តង។ ស្ត្រីរូបនោះបានឲ្យដឹងទៀតថា កន្លងមកឪពុកម្តាយនាង បិទសិទ្ធិសេរីភាព និងប្រើហិង្សាមកលើនាងជាបន្តបន្ទាប់ រហូតនាងទ្រាំលែងបានក៏រត់ចេញពីផ្ទះ។ តាមស្ត្រីជាម្តាយ បានបដិសេធថា រឿងដែលកូនគាត់និយាយបែបនេះជារឿងមិនពិតទេ៕
ចែករំលែកព័តមាននេះ