គណបក្ស12ឈរឈ្មោះ គណបក្សប្រជាជនកម្ពុជានិងគណបក្សសង្គ្រោះជាតិឈរនៅឃុំ-សង្កាត់1646
រាជធានីភ្នំពេញ ៖ ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃទី៤ ខែមិថុនា ខាងមុខ គឺមានតែគណបក្ស១២ប៉ុណ្ណោះ
រាជធានីភ្នំពេញ ៖ ការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅថ្ងៃទី៤ ខែមិថុនា ខាងមុខ គឺមានតែគណបក្ស១២ប៉ុណ្ណោះ បានចុះបញ្ជីបេក្ខជនឈរឈ្មោះបោះឆ្នោតនៅគណៈកម្មាធិការជាតិរៀបចំការបោះឆ្នោត (គ.ជ.ប) ដែលបានកំណត់រយៈពេល៣ថ្ងៃគឺពីថ្ងៃទី៣ដល់ថ្ងៃទី៥ ខែមីនា ។ ចំណែកឯគណបក្ស៥៩ទៀត មិនបានចូលរួមប្រកួតប្រជែងក្នុងការបោះឆ្នោតលើកនេះទេ ។
គណបក្សទាំង១២ ដែលបានចុះបញ្ជីបេក្ខជនសម្រាប់ប្រកួតប្រជែងក្នុងការបោះឆ្នោត រួមមាន គណបក្សប្រជាជនកម្ពុជា គណបក្សសង្គ្រោះ ជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ គណបក្សខ្មែររួបរួមជាតិ គណបក្សសំបុកឃ្មុំសង្គមប្រជាធិបតេយ្យ គណបក្សសញ្ជាតិកម្ពុជា គណបក្សអំណាចខ្មែរ គណបក្សប្រជាធិបតេយ្យមូលដ្ឋាន គណបក្សយុវជនកម្ពុជា គណបក្សជនជាតិដើមប្រជាធិបតេយ្យកម្ពុជា និងគណបក្សសាធារណរដ្ឋប្រជាធិបតេយ្យ ។
យោងតាមរបាយការណ៍បណ្តោះអាសន្នរបស់គណៈកម្មការរាជធានី-ខេត្តរៀបចំការបោះឆ្នោត បានឱ្យដឹងថា គណបក្សប្រជាជនកម្ពុជា និងគណបក្សសង្គ្រោះជាតិ បានសុំចុះបញ្ជីបេក្ខភាពនៅឃុំ-សង្កាត់ទាំង១៦៤៦ ក្នុងទូទាំងប្រទេស ។
គណបក្សហ្វ៊ុនស៊ិនប៉ិចឈរឈ្មោះនៅ៨០៤ឃុំ-សង្កាត់ គណបក្សសម្ព័ន្ធដើម្បីប្រជាធិបតេយ្យ៧៨៧ឃុំ-សង្កាត់ គណបក្សខ្មែររួបរួមជាតិ៦២២ឃុំ-សង្កាត់ គណបក្សសំបុកឃ្មុំសង្គមប្រជាធិបតេយ្យ២២៣ឃុំ-សង្កាត់ ។
រីឯគណបក្សផ្សេងទៀតមាន គណបក្សសញ្ជាតិកម្ពុជា៥៣ឃុំ-សង្កាត់ គណបក្សអំណាចខ្មែរ២៩ឃុំ-សង្កាត់ គណបក្សប្រជាធិបតេយ្យមូលដ្ឋាន២៧ឃុំ-សង្កាត់ គណបក្សយុវជនកម្ពុជា ១៩ឃុំ-សង្កាត់ គណបក្សជនជាតិដើមប្រជាធិបតេយ្យកម្ពុជា១៨ឃុំ-សង្កាត់ និងគណបក្សសាធារណរដ្ឋប្រជាធិបតេយ្យ១៦ឃុំ-សង្កាត់ ៕
ចែករំលែកព័តមាននេះ