តោះមកដឹងតម្លៃខ្លួនអ្នកប្រដាល់គុនខ្មែរលំដាប់ជួរមុខនៅកម្ពុជាក្នុងឆ្នាំ២០២២
រាជធានីភ្នំពេញ ៖ អ្នកប្រដាល់គុនខ្មែរលំដាប់ជួរមុខ ឬហៅកាត់ថា Grade A នៅកម្ពុជា ត្រូវបានគេ
រាជធានីភ្នំពេញ ៖ អ្នកប្រដាល់គុនខ្មែរលំដាប់ជួរមុខ ឬហៅកាត់ថា Grade A នៅកម្ពុជា ត្រូវបានគេចាត់បញ្ចូលជាបន្ទាប់ក្នុងឆ្នាំ២០២២នេះ ប៉ុន្តែអ្វីដែលគេចង់ដឹងខ្លាំងនោះគឺថា តើអ្នកប្រដាល់គុនខ្មែរលំដាប់ជួរមុខទាំងនោះ ទាំងស៊េរីចាស់ និងស៊េរីថ្មី ពេលឡើងសង្វៀនម្តងៗ ទទួលបានប្រាក់តម្លៃខ្លួនប៉ុន្មាន?
១-ធឿន ធារ៉ា ៖ សិស្សគណរបស់លោក អេ ភូថង រូបនេះត្រូវបានអ្នករៀបចំកម្មវិធីប្រដាល់ប្រចាំសង្វៀនទូរទស្សន៍មួយសុំមិនបញ្ចេញឈ្មោះបានទម្លាយមកថា តម្លៃខ្លួនកីឡាករលំដាប់ជួរមុខម្នាក់នេះបានហក់ឡើងដល់ចំនួន ៧០០ ដុល្លារក្នុងមួយប្រកួតទៅហើយ ។ ប៉ុន្តែតម្លៃខ្លួននេះក៏អាចប្រែប្រួលតិចតួចទៅតាមស្ថានីយទូរស្សន៍សុំការយោគយល់បញ្ចុះតម្លៃខ្លះ ព្រោះអាចមកពីកង្វះថវិកា ឬកង្វះអ្នកចូលរួមជួយឧបត្ថម្ភជាដើម។
២-រឿង សោភ័ណ្ឌ ៖ តម្លៃខ្លួនកីឡាករជំនាញប្រើកណ្ដាប់ដៃឆ្វេងរូបនេះ ក៏មានការប្រែប្រួលខ្លះដែរ ពោលកាលពីមុនត្រូវបានគេទម្លាយមកថា ក្នុងមួយប្រកួត រឿង សោភ័ណ្ឌ ទទួលបានពី ៥០០ ទៅ ៦០០ ដុល្លារ ។ ប៉ុន្តែមួយរយៈចុងក្រោយនេះតម្លៃខ្លួនបានហក់ឡើងដល់៧០០ ដុល្លារក្នុងមួយប្រកួត ហើយពេលខ្លះក៏អាចឈានដល់១ពាន់ដុល្លារផងដែរ ដែលតម្លៃ១ពាន់ដុល្លារនេះជាការទាមទារពីរូបគេផ្ទាល់ ប៉ុន្តែតម្លៃចុងក្រោយអាស្រ័យលើការចរចា។
៣-ផល សោភ័ណ្ឌ ៖ កីឡាកររបស់ក្លិបតាឡីដំរីមានរិទ្ធរូបនេះ ក៏មានតម្លៃខ្លួនមិនអន់នោះដែរនាពេលបច្ចុប្បន្ន ពោលគឺស្ថិតនៅចន្លោះពី ៥០០ ទៅ ៦០០ដុល្លារផងដែរក្នុងមួយប្រកួត។
៤-ឡៅ ចន្ទ្រា ៖ ប្អូនប្រុសបង្កើតរបស់ ឡៅ ស៊ីណាត រូបនេះត្រូវបានគេដឹងថា តម្លៃខ្លួននាពេលបច្ចុប្បន្នបានហក់ឡើងខ្លាំង ដោយរូបគេបានទាមទារតម្លៃខ្លួនចំនួន១ពាន់ដុល្លារពីអ្នករៀបចំ
កម្មវិធីប្រដាល់ ។ ខណៈកាលពី២ឬ៣ឆ្នាំមុនកីឡាកររូបនេះទទួលបានត្រឹម៤០០ ទៅ៥០០ដុល្លារប៉ុណ្ណោះ។ ប៉ុន្តែតម្លៃ១ពាន់ដុល្លារនេះកម្រមានអ្នករៀបចំកម្មវិធីប្រដាល់ហ៊ានចាយលុយយករូបគេ
មកវាយណាស់ បើហ៊ានត្រឹមតែ៧០០ដុល្លារប៉ុណ្ណោះ។
៥-ឡៅ ចិត្រា ៖ អ្នកប្រដាល់ជើងខ្លាំងប្រចាំក្លិបឆ័ត្រយោង ៩១១ រូបនេះក៏មិនខុសគ្នាឆ្ងាយពីបងប្រុស ឡៅ ចន្ទ្រា ប៉ុន្មានដែរ ពោលគឺតម្លៃខ្លួនល្បាក់ខ្ទង់ ៥០០ ទៅ ៦០០ ដុល្លារនាពេលបច្ចុប្បន្ន។
៦-ឃីម បូរ៉ា ៖ ម្ចាស់មេដាយមាសថ្នាក់ជាតិប្រភេទទម្ងន់ ៦០ គីឡូក្រាម ឃីម បូរ៉ា ត្រូវបានគេដឹងថា តម្លៃខ្លួនរបស់គេក្នុងមួយប្រកួតលើសង្វៀនក្នុងស្រុក គឺទទួលបានចាប់ពី ៥០០ ទៅ ៥៥០ ដុល្លារ ក្នុងមួយប្រកួត។
៧-ឈិត សេរីវណ្ណថង ៖ ម្ចាស់ខ្សែក្រវាត់មាសរបស់ស្ថានីយទូរទស្សន៍ PNN ត្រូវបានប្រភពអ្នករៀបចំកម្មវិធីប្រដាល់បង្ហើបប្រាប់ថា កីឡាកររូបនេះទទួលបានប្រាក់តម្លៃខ្លួនចាប់ពី ៤០០ ទៅ ៤៥០ ដុល្លារ។
៨-ម៉ឺន មេឃា ៖ កូនប្រុសច្បងលោកគ្រូ អេ ភូផង រូបនេះ ទទួលបានតម្លៃខ្លួនប្រហាក់ប្រហែល ឈិត សេរីវណ្ណថងដែរពោលគឺចាប់ ៤០០ ទៅ៤៥០ ដុល្លារក្នុងមួយប្រកួត។
៩-អេលីត សាន់ ៖ អ្នកប្រដាល់ជើងខ្លាំងប្រចាំក្លិបនាយកដ្ឋានអង្គរក្សរូបនេះត្រូវបានលោក ស៊ន អេលីត ជាគ្រូបង្វឹកធ្លាប់បានលើកឡើងតម្លៃខ្លួនក្នុងវីដេអូឡាយរបស់លោកថា អេលីត សាន់ ទទួលបានប្រាក់តម្លៃខ្លួនពី ៣៥០ ទៅ ៤០០ ដុល្លារ។
គួររំលឹកផងដែរថា តម្លៃខ្លួនរបស់កីឡាករនាពេលបច្ចុប្បន្នក៏ត្រូវបានកំណត់ដោយសហព័ន្ធកីឡាប្រដាល់គុនខ្មែរដែរ ប្រសិនបើកីឡាកររូបណាត្រូវបានចុចឈ្មោះឲ្យជាប់ជម្រើសជាតិ នឹងទទួលបាន៧០០ដុល្លារតែម្ដងពីស្ថានីយទូរទស្សន៍។ ប៉ុន្តែប្រសិនបើស្ថានីយទូរទស្សន៍ទាក់ទងដោយខ្លួន
ឯងមិនឆ្លងកាត់សហព័ន្ធទេនោះ ត្រូវចរចាដោយខ្លួនឯង ៕
ចែករំលែកព័តមាននេះ