សហរដ្ឋអាមេរិក ៖ ការត្រួតពិនិត្យព័ត៌មានផ្ទាល់ខ្លួនរបស់អ្នកចង់ទិញកាំភ្លើង បានធ្លាក់ចុះយ៉ាងខ្លាំងជារៀងរាល់ខែ ក្នុងរយៈពេល៣ខែកន្លងមក ចាប់តាំងពីថ្ងៃបោះឆ្នោត ។
ស្ថាប័ន FBI និយាយថា ពួកគេបានត្រួតពិនិត្យព័ត៌មានផ្ទាល់ខ្លួនរបស់អ្នកចង់ទិញកាំភ្លើងប្រមាណ២,២៣លាននាក់នាខែកុម្ភៈ។ ចំនួននេះតិចជាងខែកុម្ភៈ ឆ្នាំ២០១៦ ដល់ទៅ១៤%ឯណោះ។ ការត្រួតពិនិត្យក៏បានធ្លាក់ចុះ២០%ដែរក្នុងខែមករា និង១៧%ក្នុងខែធ្នូ ។
គួរបញ្ជាក់ថា ការលក់កាំភ្លើងនៅសហរដ្ឋអាមេរិកត្រូវបានជំរុញដោយកត្តានយោបាយ។ ក្នុងរយៈពេលលោក Obama នៅកាន់តំណែង គឺកាំភ្លើងបានលក់ច្រើនជាងគេក្នុងប្រវត្តិសាស្ត្ររបស់ប្រទេសនេះ បើទោះជាលោកព្យាយាមរឹតបន្តឹងច្បាប់កាំភ្លើងយ៉ាងណាក្តី ។
ខណៈលោក Obama និងលោកស្រី Clinton ចាកចេញពីជួរមុខ ហើយគណបក្សសាធារណរដ្ឋគ្រប់គ្រងសភា ការគំរាមកំហែងថា ការរឹតបន្តឹងច្បាប់កាំភ្លើងត្រូវបានលុបបំបាត់ ហើយប្រជាជនគ្មានទឹកចិត្តទិញកាំភ្លើងទេ ។
គួរបញ្ជាក់ថា FBI បានត្រួតពិនិត្យព័ត៌មានផ្ទាល់ខ្លួនរាល់ពេលមាននរណាម្នាក់ចង់ទិញកាំភ្លើងពីអ្នកលក់មានប័ណ្ណអនុញ្ញាត គឺរួមមានគ្រប់អ្នកលក់នៅតាមហាងកាំភ្លើង ។ អតិថិជនភាគច្រើនតែងឆ្លងផុតពីការត្រួតពិនិត្យ ។
ការទិញមួយចំនួនដែលធ្វើឡើងនៅកន្លែងតាំងពិព័រណ៍កាំភ្លើង ឬការទិញពីបុគ្គលម្នាក់ទៅបុគ្គលម្នាក់ទៀត គឺមិនចាំបាច់ត្រួតពិនិត្យទេ ។
ពេលខ្លះ ប្រជាជនដាក់ពាក្យត្រួតពិនិត្យច្រើនជាង១ដងសម្រាប់ការទិញកាំភ្លើងមួយដើម ហើយអ្នកខ្លះដាក់ពាក្យតែម្តង ប៉ុន្តែទិញបានច្រើនជាង១ដើម ខណៈអ្នកមួយចំនួនទៀតត្រូវបានបដិសេធ ។ ដូច្នេះហើយការត្រួតពិនិត្យព័ត៌មានផ្ទាល់ខ្លួន មិនបង្ហាញពីការលក់កាំភ្លើងទេ ៕
ចែករំលែកព័តមាននេះ