កាលពីរំលងអធ្រាត្រស្លាប់មន្ត្រីកងរាជអាវុធហត្ថលើផ្ទៃប្រទេសម្នាក់
រាជធានីភ្នំពេញ ៖ បុរសម្នាក់ជាមន្ត្រីកងរាជអាវុធហត្ថផ្ទៃប្រទេស ជិះម៉ូតូលឿនពេកមកដល់ចំណុចផ្លូវកោងជិះទៅបុករបងវត្តក្រាំងធ្នង់បណ្តាលឱ្យស្លាប់នៅកន្លែងភ្លាមៗ
រាជធានីភ្នំពេញ ៖ បុរសម្នាក់ជាមន្ត្រីកងរាជអាវុធហត្ថលើផ្ទៃប្រទេស ជិះម៉ូតូលឿនពេកមកដល់ចំណុចផ្លូវកោងជិះទៅបុករបងវត្តក្រាំងធ្នង់បណ្តាលឱ្យស្លាប់នៅកន្លែងភ្លាមៗ កាលពីវេលាម៉ោង២និង២០នាទីរំលងអធ្រាត្រឈានចូលថ្ងៃទី១០ មីនា តាមបណ្តោយផ្លូវលេខ៩១១ ហៅផ្លូវ២០១១ ស្ថិតនៅភូមិត្រពាំងមាន សង្កាត់ក្រាំងធ្នង់ ខណ្ឌសែនសុខ ។
សពជនរងគ្រោះមានឈ្មោះ តាំង ផេង ភេទប្រុស អាយុ២៤ឆ្នាំ ជាកងរាជអាវុធហត្ថលើផ្ទៃប្រទេស មានស្រុកកំណើតនៅភូមិព្រៃត្បែង ឃុំពោធិ៍ចំរើន ស្រុកបសេដ្ឋ ខេត្តកំពង់ស្ពឺ ជិះម៉ូតូម៉ាកហុងដា MOOVE ពណ៌សលាយខៀវ ពាក់ស្លាកលេខ ភ្នំពេញ 1CW-7172 ។
តាមប្រភពព័ត៌មានពីនគរបាលប៉ុស្តិ៍ក្រាំងធ្នង់បានឱ្យដឹងថា មុនពេលកើតហេតុកម្លាំងនគរបាលប៉ុសិ៍្តក្រាំងធ្នង់ល្បាតនៅតាមបណ្តោយផ្លូវខាងលើស្រាប់តែឃើញម៉ូតូជនរងគ្រោះខាងលើបើកយ៉ាងលឿនជិះវ៉ាជែងម៉ូតូរបស់ពួកគាត់ទៅបាត់រហូតដល់ម៉ោងកើតហេតុពួកគាត់បានល្បាតមកដល់ចំណុចវត្តក្រាំងធ្នង់បានឃើញជនរងគ្រោះបានដេកដួលស្លាប់នៅកន្លែងកើតហេតុ ។
បើតាមជំនាញចរាចរណ៍ខណ្ឌសែនសុខបានឱ្យដឹងថា ជនរងគ្រោះជិះម៉ូតូក្នុងទិសដៅពីកើតទៅលិចមកដល់ចំណុចខាងលើផ្លូវមានស្ថានភាពកោងធ្វើឲ្យជ្រុលទៅបុកកែងរបងវត្តពេញទំហឹងធ្វើឲ្យម៉ូតូខ្ទេចមួយកំណាត់មុខបាក់រាយប៉ាយខ្ទាតតួម៉ូតូជ្រុលទៅមុខផ្ទះប្រជាពលរដ្ឋ ។ សមត្ថកិច្ចបានឆែកឆេររកអត្តសញ្ញាណឃើញមានប័ណ្ណសំគាល់ខ្លួនជាកងរាជអាវុធហត្ថ និងមានតែស្រោមទូរស័ព្ទមិនឃើញមានទូរស័ព្ទឡើយធ្វើឱ្យពិបាកទាក់ទងរកសាច់ញាតិ ។
ក្រោយពេលកើតហេតុជំនាញចរាចរណ៍ខណ្ឌសែនសុខបានយកម៉ូតូជនរងគ្រោះយកទៅរក្សាទុករង់ចាំបងប្អូនសាច់ញាតិមកទទួល ចំណែកសពបានប្រគល់ឱ្យខាងរថយន្តដឹកយកទៅតម្កល់ទុកនៅវត្តទឹកថ្លារងចាំបងប្អូនយកទៅធ្វើបុណ្យតាមប្រពៃណី ៕
ចែករំលែកព័តមាននេះ