សុំទូរស័ព្ទមិត្តស្រីមើលហ៊ានយកទៅលក់ ត្រូវនាងប្ដឹងឲ្យសមត្ថកិច្ចឃាត់ខ្លួន
ខេត្តបាត់ដំបង ៖ យុវជនម្នាក់ត្រូវកម្លាំងកងរាជហត្ថស្រុកឃាត់ខ្លួន កាលពីវេលាម៉ោង៨និង២០នាទីយប់ ថ្ងៃទី០៨ មីនា នៅភូមិកន្សៃបន្ទាយ ឃុំមោង ស្រុកមោងឫស្សី
ខេត្តបាត់ដំបង ៖ យុវជនម្នាក់ត្រូវកម្លាំងកងរាជហត្ថស្រុកឃាត់ខ្លួន កាលពីវេលាម៉ោង៨និង២០នាទីយប់ ថ្ងៃទី០៨ មីនា នៅភូមិកន្សៃបន្ទាយ ឃុំមោង ស្រុកមោងឫស្សី ក្រោយពីនារីម្នាក់ប្ដឹងចោទប្រកាន់ថា បានបន្លំយកទូរស័ព្ទរបស់នាងយកទៅលក់។ យុវជនចិត្តស្លុយរូបនេះឈ្មោះ គឹម សម្ផស្ស អាយុ២២ឆ្នាំ រស់នៅក្នុងភូមិប្រឡាយ ឃុំមោង ស្រុកមោងឫស្សី រីឯនារីរងគ្រោះឈ្មោះ ប៉ែត ពី អាយុ១៩ឆ្នាំ នៅភូមិគារ៣ ឃុំគារ ស្រុកមោងឫស្សី។ បើតាមមន្ត្រីកងរាជអាវុធហត្ថបាននិយាយថា ជនសង្ស័យ និងនារីរងគ្រោះជាសង្សារនឹងគ្នា។
មន្ត្រីដដែលបានឲ្យដឹងថា កាលពីថ្ងៃទី៣ មីនា ជនសង្ស័យឈ្មោះ គឹម សម្ផស្ស បានសុំទូរស័ព្ទសាំស៊ុងរបស់សង្សារខ្លួនមើល លុះបានដល់ដៃ ជននេះបែរជាយកទូរស័ព្ទនោះទៅលក់ឲ្យគេផ្សេងក្នុងតម្លៃ១០០ដុល្លារ ទើបនាងប្ដឹងកងរាជអាវុធហត្ថស្រុកមោងឫស្សីឲ្យឃាត់ខ្លួនតែម្ដង។ នារីរងគ្រោះឈ្មោះ ប៉ែត ពី បាននិយាយប្រាប់សមត្ថកិច្ចថា នាងនឹងយុវជនចិត្តស្លុយនោះធ្លាប់ជាមិត្តនឹងគ្នា(សង្សារ) ហើយនៅថ្ងៃទី៣ មីនា មិត្តប្រុសរូបនេះបានណាត់ជួបនាង ហើយគ្រាហ៍ដែលរូបគេបានខ្ចីទូរស័ព្ទនាងមើល តែមិនបានឲ្យវិញភ្លាមទេ។
នាងនិយាយទៀតថា ក្រោយពីយកទូរស័ព្ទនាងទៅមិត្តប្រុសរូបនេះមិនបានយកទូរស័ព្ទមកឲ្យនាងវិញទេ លុះពេលនាងសួរនាំស្រាប់តែជននេះប្រាប់ថា ទូរស័ព្ទនោះខ្លួនបានលក់បាត់ហើយ ទើបនាងប្ដឹងទៅកងរាជអាវុធហត្ថឲ្យចាត់ការតែម្ដងទៅ។ បន្ទាប់ពីត្រូវសមត្ថកិច្ចឃាត់ខ្លួន ជនសង្ស័យឈ្មោះ គឹម សម្ផស្ស បានសារភាពថា ខ្លួនពិតជាបានយកទូរស័ព្ទមិត្តស្រីរបស់ខ្លួនទៅលក់មែន។
ប៉ុន្តែជននេះមិនបាននិយាយលម្អិតអំពីមូលហេតុដែលនាំឲ្យខ្លួនថ្លើមធំហ៊ានយកទូរស័ព្ទមិត្តស្រីរបស់ខ្លួនទៅលក់នោះទេ។ មន្ត្រីកងរាជអាវុធហត្ថបាននិយាយដែរថា ជនសង្ស័យឈ្មោះ គឹម សម្ផស្ស ត្រូវបានឃាត់ខ្លួនពីបទ រំលោភសេចក្ដីទុកចិត្ត ហើយមន្ត្រីជំនាញបានសួរនាំ ដើម្បីកសាងសំណុំរឿងបញ្ជូនទៅតុលាការហើយ៕
ចែករំលែកព័តមាននេះ