យោង​តាម YONHAP ថា ក្រសួង​ការពារ​ប្រទេស​កូរ៉េ​ខាងត្បូង​អះអាង​កាលពី​ថ្ងៃ​ទី​៩ មីនា ថា សមយុទ្ធ​យោធា​រួម​ប្រចាំឆ្នាំ​រវាង​កូរ៉េ​ខាងត្បូង និង​សហរដ្ឋ​អា​មេ​រិ​ក​នឹង​បន្ត​ដូច​ការ​គ្រោងទុក ។

កាលពី​ថ្ងៃ​ទី​៨ មីនា រដ្ឋមន្ត្រី​ការ​បរទេស​ចិន​លោក​វ៉ាង យី បាន​ស្នើ​ថា កូរ៉េ​ខាងជើង​នឹង​ផ្អាក​បណ្តា​សកម្មភាព​នុយក្លេអ៊ែរ និង​បាលី​ស្ទិ​ក​ជា​ថ្នូរ​នឹង​ការ​បញ្ឈប់​សមយុទ្ធ​យោធា​រួម​អា​មេ​រិ​ក​-​កូរ៉េ​ខាងត្បូង ។

ជា​ការ​ឆ្លើយ​តប​វិញ លោក MOON SANG-GYUN អ្នកនាំពាក្យ​ក្រសួង​ការពារ​ប្រទេស​កូរ៉េ​ខាងត្បូង​ថ្លែង​ក្នុង​សន្និសីទ​សារព័ត៌មាន​មួយ​ថា សមយុទ្ធ​យោធា​រួម​នឹង​បន្ត​ដោយ​គ្មាន​ការ​បញ្ឈប់ ។ នេះ​ជា​សមយុទ្ធ​ប្រចាំឆ្នាំ​មាន​លក្ខណៈ​ការពារ​សុទ្ធសាធ ។

កាលពី​ថ្ងៃ​ទី​១ មីនា ក្រុង​សេ​អ៊ូ​ល និង​ក្រុង​វ៉ា​ស៊ី​ន​តោន​ចាប់ផ្តើម​សមយុទ្ធ​យោធា FOAL EAGLE ដែល​មាន​រយៈពេល​២​ខែ ហើយ​ចូលរួម​ដោយ​កងទ័ពជើងគោក ជើង​អាកាស និង​ជើង​ទឹក ។ សម្ព័ន្ធមិត្ត​ទាំង​២​ក៏​គ្រោង​ផង​ដែរ ធ្វើ​សមយុទ្ធ​ឈ្មោះ KEY RESOLVE ចាប់ពី​ថ្ងៃ​ទី​១៣ មីនា ទៅ ។

នាវា​ផ្ទុក​យន្តហោះ USS CARL VINSON មក​ដល់​ប៊ូ​សាន រង្វង់​ថ្ងៃ​ទី​១៥ មីនា ដើម្បី​ចូលរួម​ក្នុង​សម​យុ​ទ្ថ ។ យន្តហោះ​ប្រដេញ​បំបាំងកាយ​អា​មេ​រិ​ក​ធុន F-35B ក៏​នឹង​ចូល​រួម​ក្នុង​សមយុទ្ធ​នេះ​ដែរ ដើម្បី​បង្កើន​សមត្ថភាព​វាយប្រហារ​ឱ្យ​ចំ​គោលដៅ​នៅ​លើ​ដី ។ សហរដ្ឋ​អា​មេ​រិ​ក​ត្រូវ​ដាក់​ពង្រាយ​មធ្យោបាយ​យុទ្ធសាស្ត្រ​ឯទៀត​ៗ​ដូច​ជា​យន្តហោះ​ទម្លាក់​គ្រាប់បែក​ធុន B-1B និង B-52 ព្រមទាំង​យន្តហោះ​ឡើង​ត្រង់​ចុះ​ត្រង់​ធុន V-22 OSPREY ក្នុង​ក្រប​ខណ្ឌ​នៃ​ការ​បង្ហាញ​កម្លាំង​ប្រឈម​មុខ​នឹង​កូរ៉េ​ខាងជើង ដែល​បាញ់​មី​ស៊ី​ល​បាលី​ស្ទិ​ក​៤​គ្រាប់​កាលពី​ថ្ងៃ​ទី​៦ មីនា រត់​ក្នុង​ចម្ងាយ​ប្រមាណ​១.០០០​គីឡូម៉ែត្រ មុន​ពេល​ធ្លាក់​ក្នុង​សមុទ្រ​ខាងកើត​ក្បែរ​ប្រទេស​ជប៉ុន ៕