គ្រោះអគ្គីភ័យមួយបណ្តាលឱ្យមនុស្សស្លាប់យ៉ាងតិច២១នាក់កាលពីថ្ងៃទី៨ មីនា នៅប្រទេសហ្គាតេម៉ាឡា ក្នុងកន្លែងស្នាក់នៅសម្រាប់ក្មេងស្រីជំទង់ដែលរងគ្រោះដោយអំពើហិង្សា ឬត្រូវ
គ្រោះអគ្គីភ័យមួយបណ្តាលឱ្យមនុស្សស្លាប់យ៉ាងតិច២១នាក់កាលពីថ្ងៃទី៨ មីនា នៅប្រទេសហ្គាតេម៉ាឡា ក្នុងកន្លែងស្នាក់នៅសម្រាប់ក្មេងស្រីជំទង់ដែលរងគ្រោះដោយអំពើហិង្សា ឬត្រូវបោះបង់ចោល ។
អាជ្ញាធរបញ្ជាក់ថា សោកនាដកម្មនេះកើតឡើងនៅទីក្រុងសាន់ចូសេ ពីកូឡា ស្ថិតនៅចម្ងាយប្រមាណជា២៥គីឡូម៉ែត្រ ខាងត្បូងក្រុងហ្គាតេម៉ាឡា រដ្ឋធានីមានឈ្មោះដូចឈ្មោះប្រទេស ។ ជនរងគ្រោះទាំងអស់សុទ្ធតែជាយុវនារី ។ ទីតាំងស្នាក់នៅ VIRGEN DE ASUNCION នេះទទួលក្មេងជំទង់ក្រោមអាយុ១៨ឆ្នាំ ។ អគ្គីភ័យក៏បណ្តាលឱ្យមនុស្សរងរបួសយ៉ាងតិច៤០នាក់ផងដែរ ។ យោងតាមសារព័ត៌មានថា ទីតាំងនេះទទួលមនុស្ស៥៤០នាក់ ទោះបីសមត្ថភាពមានត្រឹម៤០០នាក់ក្តី ។
យោងតាមប្រមុខប៉ូលិសហ្គាតេម៉ាឡា លោក NERY RAMOS ថា មនុស្សទាំងឡាយនេះដែលដាក់ឱ្យស្ថិតនៅដាច់ពីគេក្រោយការបះបោរមួយ បាននាំគ្នាដុតពូកបណ្តាលឱ្យភ្លើងឆាបឆេះជាប់យុវនារីជាច្រើននាក់ ។
ប្រធានាធិបតីហ្គាតេម៉ាឡាលោក JIMMY MORALES បានប្រកាសការកាន់មរណទុក្ខជាតិរយៈពេល៣ថ្ងៃ ហើយរដ្ឋាភិបាលរងការរិះគន់ពីលក្ខខណ្ឌរស់នៅក្នុងទីតាំងស្នាក់នេះ ។ បណ្តាគ្រួសារជនរងគ្រោះបរិហារការគ្រប់គ្រងអាក្រក់ដោយនារីវ័យក្មេងទាំងឡាយតែងរកការធ្វើបាប ។
ប្រទេសហ្គាតេម៉ាឡាជាប្រទេសអាមេរិកឡាទីន ដែលមានអត្រាខ្វះស្បៀងខ្ពស់សម្រាប់កុមារ ហើយតែងកើតអំពើហិង្សានៅតាមទីក្រុងទាំងឡាយបណ្តាលមកជាពិសេសពីក្រុមជនខិលខូចដូចជាក្រុម MARA SALVATRUCHA ដែលតែងធ្វើអាជីវកម្មលើបណ្តាក្មេងជំទង់ ៕
ចែករំលែកព័តមាននេះ