កងម៉ារីនអីុរ៉ង់ធ្វើសមយុទ្ធទ្រង់ទ្រាយធំមានឈ្មោះថា VELAYAT-95 ក្នុងឈូងសមុទ្រអូម៉ង់ និងនៅភាគពាយ័ព្យមហាសមុទ្រឥណ្ឌា ។ តាមទីភ្នាក់ងារព័ត៌មានអីុរ៉ង់ TASNIM ថា
កងម៉ារីនអីុរ៉ង់ធ្វើសមយុទ្ធទ្រង់ទ្រាយធំមានឈ្មោះថា VELAYAT-95 ក្នុងឈូងសមុទ្រអូម៉ង់ និងនៅភាគពាយ័ព្យមហាសមុទ្រឥណ្ឌា ។ តាមទីភ្នាក់ងារព័ត៌មានអីុរ៉ង់ TASNIM ថា ពេលធ្វើសមយុទ្ធនេះ ដែលលាតសន្ធឹងលើផ្ទៃសមុទ្រទំហំ២លានគីឡូម៉ែត្រក្រឡា បណ្តាគ្រឿងសព្វាវុធផលិតដោយអីុរ៉ង់ទំនើបៗត្រូវបានសាកល្បងពិសេសមីស៊ីលបណ្តែតចុងក្រោយធុន NASR និងមីស៊ីល DEHLAVIYEH មានក្បាលទម្រង់ឡាស៊ែរ ។
ក្នុងបទសម្ភាសន៍មួយជាមួយ SPUTNIK អ្នកសិក្សានយោបាយ និងជាអគ្គនាយកកាសែតភាសាអារ៉ាប់ AL-VEFAQ លោក MOSSIB NAIMI លើកពីហេតុផលទាំងឡាយនៃសមយុទ្ធទ្រង់ទ្រាយធំនោះរបស់អីុរ៉ង់ ។ លោកថា ដូចដឹងស្រាប់អីុរ៉ង់នៅជាប់ឈូងសមុទ្រពែរ្ស៍ និងឈូងសមុទ្រអូម៉ង់នៃមហាសមុទ្រឥណ្ឌា ។ ការធានាសន្តិសុខទាំងក្នុងដែនទឹកខ្លួនផ្ទាល់ ទាំងក្នុងបណ្តាតំបន់ឆ្នេរសមុទ្រគឺជាភារកិច្ចយុទ្ធសាស្ត្រសម្រាប់ប្រទេសណាក៏ដោយក្នុងតំបន់ ។ ទិសដៅសំខាន់របស់អីុរ៉ង់ពេលធ្វើសមយុទ្ធយោធាទ្រង់ទ្រាយធំនេះ គឺរៀបចំការប្រយុទ្ធរបស់កងទ័ពដើម្បីការពារដែនដីប្រឆាំងសត្រូវមួយ ។ ម្យ៉ាងវិញទៀត សមយុទ្ធនេះរបស់អីុរ៉ង់ជាសារមួយនៃការធានាដល់សន្តិភាព មិត្តភាព និងសន្តិសុខតំបន់ ខណៈពួកចោរសមុទ្ររាតត្បាតក្នុងសមុទ្រក្រហម និងក្នុងឈូងសមុទ្រអូម៉ង់ ដែលជាឧបសគ្គមួយដល់ការធ្វើចរាចរណ៍ដោយសេរីនៃបណ្តានាវាពាណិជ្ជកម្ម ។ នេះជាហេតុផលមួយសម្រាប់អីុរ៉ង់បង្កើតយុទ្ធសាស្ត្រមួយសំដៅធានាសន្តិសុខក្នុងដែនទឹកប្រកបដោយគ្រោះថ្នាក់ទាំងនេះ ។ កុំភ្លេចថា ដែនទឹកទាំងនេះជាផ្លូវដឹកជញ្ជូនប្រេងកាតសំខាន់បំផុត ។ អសន្តិសុខនៅទីនោះធ្វើឱ្យគ្រោះថ្នាក់ដល់សន្តិសុខសេដ្ឋកិច្ចរបស់តំបន់ ។
លោកបន្តថា ពិតណាស់មានពួកអ្នកដែលស្វែងរកបង្កើតភាពតានតឹងក្នុងតំបន់ ។ សហរដ្ឋអាមេរិកប្រកាន់យកជាប់នយោបាយនៃការគំរាមកំហែង និងបង្កហេតុ ។ ក្រុងតេហេរ៉ង់ចាប់អារម្មណ៍ខ្លាំង ប៉ុន្តែបណ្តាប្រទេសក្នុងតំបន់ក៏ត្រូវយល់ដែរថា នយោបាយនេះរបស់អាេមរិកពុំបម្រើដល់ផលប្រយោជន៍របស់ប្រទេសណាមួយក្នុងតំបន់ពិសេសបណ្តាប្រទេសអារ៉ាប់នៅតំបន់ឈូងសមុទ្រពែរ្ស ។
អ្នកជំនាញការរូបនេះអះអាងថា ការបើករណសិរ្សយោធាមួយនឹងបំផ្លាញគ្រប់ប្រទេសទាំងអស់នៃតំបន់របស់យើង និងហួសពីនេះទៀត ។ ទោះបីជាគេសន្មត់ថា សហរដ្ឋអាមេរិកចង់បង្កើតគម្រោងប្រឆាំងអីុរ៉ង់របស់ខ្លួននោះបណ្តាប្រទេសជាប់ជិតខាងអីុរ៉ង់ក៏មិនបានសុខ ដោយអាចត្រូវអូសទាញឱ្យធ្លាក់ក្នុងល្បែងបង្ហូរឈាមមួយ ។ ប្រាកដហើយគ្មាននរណាម្នាក់ចង់បែបនេះទេ ព្រោះបណ្តាប្រទេសជាប់ជិតខាងអីុរ៉ង់យល់ថា សន្តិសុខនៅឈូងសមុទ្រពែរ្ស៍មានសារសំខាន់ជាយុទ្ធសាស្ត្រសម្រាប់ពិភពលោកទាំងមូល ៕
ចែករំលែកព័តមាននេះ