រាជធានីភ្នំពេញ ៖ ទោះបីជាគណបក្សកាន់អំណាចបានស្នើឲ្យគណបក្សសង្គ្រោះជាតិផ្លាស់ប្តូរសារនយោបាយរបស់ខ្លួន(ដួរមេឃុំបម្រើបក្ស ដាក់មេឃុំបម្រើរាស្ត្រ)យ៉ាងណាក្តីរហូតមកដល់ពេលនេះ គេមិនទាន់ឃើញមានការគណបក្សប្រឆាំងផ្លាស់ប្តូរពាក្យស្លោកនោះនៅឡើយទេ។
អនុប្រធានគណបក្សប្រឆាំងបានបញ្ជាក់ថាគណបក្សកាន់អំណាច គ្មានសិទ្ធិនឹងបញ្ជាឲ្យគណបក្សសង្គ្រោះជាតិផ្លាស់ប្តូរពាក្យស្លោកនោះទេ មានតែគណៈកម្មាធិការជាតិរៀបចំការបោះឆ្នោត(គ.ជ.ប)ទើបមានសិទ្ធិ។
លោក អេង ឆៃអ៊ាង អនុប្រធានគណបក្សសង្គ្រោះជាតិបានបញ្ជាក់ប្រាប់អ្នកសារព័ត៌មាន តបទៅនឹងការស្នើសុំរបស់គណបក្សកាន់អំណាចកាលពីថ្ងៃទី០៨ មីនា ទិវានារីអន្តរជាតិ៨មីនា ដោយបញ្ជាក់ថា«វាមិនមែនជារឿងគណបក្សប្រជាជនដែលជាគណបក្សប្រកួតប្រជែងមួយ ចង់បានអ្វីមកបញ្ជាគណបក្សនេះ គណបក្សនោះវាខុស! បើនិយាយប្រព័ន្ធច្បាប់ និយាយពីយន្តការវាមិនត្រូវ ព្រោះរឿងនេះមានតែគ.ជ.ប.ទេ»។ អីញ្ចឹងបើគ.ជ.ប ថាទេ ពាក្យស្លោកនឹងប្រើមិនត្រូវទេ ណែនាំទៅគណបក្សនយោបាយទៅ ប៉ុន្តែបញ្ហាពាក្យស្លោកគ្រាន់តែសុភាសិតអីចឹង ។ ប្រសិនបើពាក្យស្លោកនឹងវាអត់ឆ្លុះបញ្ចាំងក្នុងសង្គម មិនចាំបាច់ហាមទេ! ពាក្យស្លោកនឹងវានឹងរលត់នៅពេលថ្ងៃណាមួយហើយ ប៉ុន្តែបើពាក្យស្លោកនឹងឆ្លុះបញ្ចាំងបញ្ហាពិតក្នុងសង្គមនោះវាមានជីវិតរហូត»។ ជាមួយគ្នានោះដែរលោក អេង ឆៃអ៊ាង ក៏បានរំឭកពីពាក្យស្លោករបស់សម្តេចក្រុមព្រះនរោត្តមរណឬទ្ធិថា«រាស្ត្រមាន មុនរដ្ឋ»ផងដែរ ។
លោកថាពាក្យស្លោកនេះ មិនបានឆ្លុះបញ្ចាំងពីការពិតនៃសង្គមទើបវារលត់ដោយឯកឯង ប៉ុន្តែបើពាក្យស្លោក«ដូរមេឃុំបម្រើបក្ស ដាក់មេឃុំបម្រើរាស្ត្រ» ហើយមេឃុំទាំងអស់បំរើរាស្ត្រពិតមែននោះ ពាក្យស្លោកនោះនឹងស្លាប់ដោយខ្លួនឯង ។ លោកបញ្ជាក់បន្ថែមថា« ខ្ញុំសូមបញ្ជាក់ថាគេអាចហាមគណបក្សនយោបាយណាមួយយកពាក្យស្លោកទៅប្រើបាន ប៉ុន្តែគេមិនអាចហាមប្រជាពលរដ្ឋមិនឲ្យនិយាយបានទេ ព្រោះពាក្យស្លោកនោះកើតចេញពីប្រជាពលរដ្ឋ»។ បើតាមលោក អេង ឆៃអ៊ាង ទោះបីជាគណបក្សកាន់អំណាច គ្រោងនឹងប្តឹងទៅតុលាការក្តី ក៏គណបក្សមិនបានព្រួយបារម្មណ៍នោះទេ។ លោកបញ្ជាក់ថា«យើងអត់មានអីខុស គ្រាន់តែប្រើពាក្យហ្នឹង បើវាខុសមិនចាំបាច់បោះឆ្នោតធ្វើអី ! បោះឆ្នោតនាំតែអស់លុយ»។
គួរបញ្ជាក់ថា អ្នកនាំពាក្យគណបក្សប្រជាជនកម្ពុជា លោក សុខ ឥសានកាលពីថ្ងៃទី០៦ មីនាបានថ្លែងថា សារនយោបាយ«ដូរមេឃុំបម្រើបក្ស ដាក់មេឃុំបម្រើរាស្ត្រ» របស់គណបក្សសង្គ្រោះជាតិ មានចរិតញុះញុង បង្កហេតុនិងប្រមាថមើលងាយយ៉ាងធ្ងន់ធ្ងរដល់មន្ត្រីឃុំ សង្កាត់ទូទាំងប្រទេស ដែលបានខិតខំបម្រើប្រជាជនស្របតាមតួនាទីរបស់ខ្លួន ដោយមិនមានការរើសអើងនិន្នាការនយោបាយសោះឡើយ។ លោកបញ្ជាក់ថា«គណបក្សប្រជាជនកម្ពុជា ទាមទារឲ្យថ្នាក់ដឹកនាំគណបក្សសង្គ្រោះជាតិកែតម្រូវជាបន្ទាន់ចំពោះខ្លឹមសារខាងលើ ដើម្បីរក្សាបរិយាកាសល្អ និងសុខសន្តិភាពរបស់ប្រទេសជាតិ ហើយថាក្នុងករណីដែលពុំមានការកែតម្រូវទេនោះ គណបក្សប្រជាជនកម្ពុជា រក្សាសិទ្ធិដើម្បីប្តឹងទៅតុលាការស្របតាមច្បាប់ជាធរមាន»៕
ចែករំលែកព័តមាននេះ