ខេត្តបន្ទាយមានជ័យ ៖ ផ្ទះប្រជាពលរដ្ឋចំនួន៦នៅក្នុងឃុំស្វាយចេកដែលក្នុងនោះមានស្រុកស្វាយចេកចំនួន៥ខ្នង និងឃុំអូរបីជាន់ ស្រុកអូរជ្រៅ ចំនួន១ខ្នងត្រូវបានរងនូវការខូចខាតដោយសារខ្សល់កន្ត្រាក់ នៅយប់ថ្ងៃទី៨ មីនា ។ នៅព្រឹកថ្ងៃទី៩ មីនា លោកឧត្តមសេនីយ៍ទោ អាត់ ខែម ស្នងការនគរបាលខេត្ត បាននាំយកស័ង្កសីចំនួន៧០សន្លឹក ទៅចែកជូនដល់ប្រជាពលរដ្ឋដែលរងនូវការខូចខាតផ្ទះសំបែងដោយខ្សល់កន្ត្រាក់ និងបានដឹកនាំកងកម្លាំងនគរបាលខេត្ត ស្រុកស្វាយចេក និងកម្លាំងវរសេនាតូចការពារព្រំដែនគោកលេខ៩១១ ចុះជួយជួសជុលផ្ទះជូនប្រជាពលរដ្ឋឡើងវិញផងដែរ ។
លោកវរសេនីយ៍ទោ ជា ស្លូញ អធិការនគរបាលស្រុកស្វាយចេកបានឲ្យដឹងថា នៅវេលាម៉ោង៨និង៤៥នាទីយប់ថ្ងៃទី៨ មីនា មានភ្លៀងកក់ខែមួយមេយ៉ាងធំ លាយឡំជាមួយផ្គររន្ទះ និងខ្សល់យ៉ាងខ្លាំងបណ្តាលឲ្យផ្ទះរបស់ប្រជាពលរដ្ឋនៅភូមិដឺរាំងជំណុះ(ភូមិខ្វាវលិច) និងភូមិល្បើកស្វាយ ឃុំស្វាយចេក ចំនួន៥ខ្នង រងនូវការប៉ះពាល់ដោយរបើកដំបូលស័ង្កសី ។ ដោយឡែកនៅឃុំអូរបីជាន់ ក្នុងស្រុកអូរជ្រៅ ត្រូវរងនូវការខូចខាតធ្ងន់ផ្ទះ១ខ្នងផងដែរដោយខ្សល់បានកួចធ្លាក់ពីលើជើងកម្នល់ សរុបទាំង២ស្រុកអស់ចំនួន៦ខ្នង ។
លោកស្នងការនគរបាលខេត្ត និងជាប្រធានក្រុមការងារខេត្តចុះជួយស្រុកស្វាយចេកបានបញ្ជាក់ថា បន្ទាប់ពីទទួលបានព័ត៌មានពីការខូចខាតនូវផ្ទះសំបែងរបស់ប្រជាពលរដ្ឋដោយសារគ្រោះធម្មជាតិខ្សល់កន្ត្រាក់ លោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀនជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ បានណែនាំឲ្យលោកនាំយកស័ង្កសីចំនួន៧០សន្លឹកជាអំណោយរបស់លោកផ្ទាល់ទៅចែកជូនដល់ប្រជាពលរដ្ឋទាំង៥គ្រួសារ ទន្ទឹមនោះលោកក៏បានពាំនាំការផ្តាំផ្ញើរសាកសួរសុខទុក្ខពីសំណាក់លោកឧបនាយករដ្ឋមន្ត្រី កែ គឹមយ៉ាន ចូលរួមសោកស្តាយពីការខូចខាតផ្ទះសំបែង និងទ្រព្យសម្បត្តិ ។
នាឱកាសនោះលោកក៏បានឲ្យកម្លាំងនគរបាលខេត្ត ស្រុកស្វាយចេក និងវរសេនាតូចនគរបាលការពារព្រំដែនគោកលេខ៩១១រួមទាំងអាជ្ញាធរមូលដ្ឋាន បានចុះជួយជួសជុលផ្ទះជូនដល់ប្រជាពលរដ្ឋផងដែរ ។ ជាមួយគ្នានោះដែរប្រជាពលរដ្ឋក៏បានថ្លែងអំណរគុណលោកឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងារថ្នាក់ជាតិចុះជួយខេត្តបន្ទាយមានជ័យ ដែលតែងគិតគូពីសុខទុក្ខ យកចិត្តទុកដាក់ក្នុងការជួយដល់ប្រជាពលរដ្ឋដែលកំពុងរងគ្រោះដោយគ្រោះធម្មជាតិដូចជាពួកគាត់ ៕
ចែករំលែកព័តមាននេះ