ប្រទេសចិន ៖ កាលពីថ្ងៃអង្គារកន្លងមក លោក Jack Ma ស្ថាបនិករបស់ Alibaba បានជំរុញឲ្យផ្តន្ទាទោសបន្ថែមចំពោះការលក់ផលិតផលក្លែងក្លាយ ដោយអះអាងថា ច្បាប់និងបញ្ញតិ្តហួសសម័យកាល មិនប្រាកដនិយមកំពុងតែជំរុញដល់ការលក់ និងផលិតនូវផលិតផលក្លែងក្លាយ ។
គួរបញ្ជាក់ថា ក្រុមហ៊ុន Alibaba បានធ្លាក់ក្រោមការរិះគន់ក្នុងរយៈពេលប៉ុន្មានឆ្នាំថ្មីៗនេះ ព្រោះតែភាពងាយស្រួលក្នុងការស្វែងរកផលិតផលក្លែងក្លាយលើទីផ្សារអីុនធើរណេតឈ្មោះ Taobao ។
លោក Ma បានសរសេរលើប្រព័ន្ធសង្គមរបស់លោកថា ច្បាប់និងបញ្ញត្តិហួសសម័យកាល និងមិនប្រាកដនិយមនាំឲ្យមានផលិតផលក្លែងក្លាយមួយចំនួន ។
លោកបន្តថា កង្វះខាតនៃច្បាប់តឹងរ៉ឹង គឺមានតែជំរុញដល់មនុស្សកាន់តែច្រើនចូលរួមសកម្មភាពផលិត និងលក់ផលិតផលក្លែងក្លាយទាំងនេះ ។
កន្លងមក រោងចក្រក្នុងប្រទេសចិនបានផលិតផលិតផលសម្រាប់ក្រុមហ៊ុនយីហោល្បីៗតម្លៃទាប ប៉ុន្តែដោយមានការងើបឡើងពីការធ្វើពាណិជ្ជកម្មលើអុីនធើរណេតដូចជា តាមរយៈ Alibaba ពួកគេកាន់តែងាយស្រួលស្វែងរកឱកាសលក់ផលិតផលទៅកាន់អតិថិជនផ្ទាល់ ។
កាលពីចុងឆ្នាំមុន ការិយាល័យអ្នកតំណាងពាណិជ្ជកម្មសហរដ្ឋអាមេរិកបានដាក់ Taobao របស់ Alibaba ក្នុងបញ្ជីខ្មៅដោយអះអាងថា គេហទំព័រនេះមិនបានប្រឹងប្រែងឲ្យអស់ពីសមត្ថភាពក្នុងការប្រឆាំងនឹងផលិតផលក្លែងក្លាយ និងលួចពីអ្នកដទៃ ។ មិនយូរប៉ុន្មាន Alibaba បានដាក់ពាក្យប្តឹងអ្នកលក់ពីរនាក់ពីបទលក់នាឡិកា Swarovski ក្លែងក្លាយ ។
លោក Ma បន្តថា ៖ « ការលក់ និងការផលិតផលិតផលក្លែងក្លាយ គឺជាទង្វើចោរកម្ម។ ការកាត់ក្តីថា ខុសឬត្រូវ គឺមានយូរណាស់មកហើយ ប៉ុន្តែទង្វើចោរកម្មលើសិទ្ធិកម្មសិទ្ធិបញ្ញានៅតែមានកង្វះខាតជាឯកច្ឆន្ទរួមពីសង្គមនៅឡើយ » ។
លោកបន្តថា មានតែ១ភាគ១០នៃករណីចំនួន៤.៥០០ប៉ុណ្ណោះដែល Alibaba រាយការណ៍ ត្រូវបានដោះស្រាយក្នុងឆ្នាំ២០១៦ ៕
ចែករំលែកព័តមាននេះ