រាជធានីភ្នំពេញ ៖ សហព័ន្ធកីឡាទាញព្រ័ត្រ បានបើកវគ្គបណ្ដុះបណ្ដាលជំនាញបច្ចេកទេសដល់មន្ត្រីរបស់ខ្លួនរយៈពេល៥ថ្ងៃគិតចាប់ពីថ្ងៃទី៧ ដល់ថ្ងៃទី១១ មីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយ
រាជធានីភ្នំពេញ ៖ សហព័ន្ធកីឡាទាញព្រ័ត្រ បានបើកវគ្គបណ្ដុះបណ្ដាលជំនាញបច្ចេកទេសដល់មន្ត្រីរបស់ខ្លួនរយៈពេល៥ថ្ងៃគិតចាប់ពីថ្ងៃទី៧ ដល់ថ្ងៃទី១១ មីនា នៅទីស្នាក់ការគណៈកម្មាធិការជាតិអូឡាំពិកកម្ពុជា ដោយមានសិក្ខាកាមចូលរួមចំនួន៥០នាក់មកពីបណ្ដារាជធានី-ខេត្ត-ក្រុង ។
លោកស្រី ប្រាក់ សម្ផស្ស អគ្គលេខាធិការសហព័ន្ធកីឡាទាញព្រ័ត្រកម្ពុជា បានឱ្យដឹងថា នេះគឺជាលើកទី១ហើយ ដែលសហព័ន្ធបានបើកវគ្គបណ្ដុះបណ្ដាលជំនាញបច្ចេកទេសដល់មន្ត្រីរបស់ខ្លួន ដើម្បីឱ្យពួកគេទទួលបាននូវចំណេះដឹង និងបទបញ្ជាបច្ចេកទេសខ្លះៗ សម្រាប់យកទៅបង្ហាត់បន្តនៅតាមមូលដ្ឋាន ។ លោកស្រីថា វគ្គនេះតាមគោលការណ៍របស់ក្រសួងអប់រំ យុវជន និងកីឡា អនុញ្ញាតត្រឹមតែ២៥នាក់ប៉ុណ្ណោះ ប៉ុន្តែដើម្បីកុំឱ្យខាតពេល សហព័ន្ធសុខចិត្តចំណាយថវិកាខ្លួនឯងបន្ថែមសិក្ខាកាមចំនួន២៥នាក់ទៀតដើម្បីឱ្យពួកគេទទួលបានការបណ្ដុះបណ្ដាលក្នុងពេលតែមួយ ។ វគ្គបណ្ដុះបណ្ដាលនេះពិតជាមានសារសំខាន់ខ្លាំងណាស់ ព្រោះថាកន្លងមកបងប្អូនខ្មែរយើងតែងតែយល់ឃើញថា កីឡាទាញព្រ័ត្រគ្រាន់តែជាល្បែងមួយដើម្បីជាការកម្សាន្តសប្បាយប៉ុណ្ណោះ ។ ភាគច្រើនគេធ្វើឡើងនៅក្នុងពិធីបុណ្យទានតាមទីអារាមឬតាមភូមិដែលមានមនុស្សប្រមូលផ្ដុំគ្នា ហើយគេបានចែកជា២ក្រុម ម្ខាងៗមានគ្នាយ៉ាងតិចចាប់ពី៥នាក់ដល់១០នាក់ ។ ខ្សែព្រ័ត្រដែលគេយកមកលេងភាគច្រើនធ្វើពីស្បែកគោ ស្បែកក្របីឬធ្វើពីជក់ដូងដែលមានប្រវែងចាប់ពី២០ហត្ថឡើងទៅទំហំប៉ុនកដៃកូនក្មេង ។ របៀបលេងមុនដំបូងគេជ្រើសរើសយកប្រុសម្នាក់ស្រីម្នាក់ដែលមានមាឌធំមានកម្លាំងឱ្យកាន់ចុងព្រ័ត្រម្ខាងម្នាក់ ក្រៅពីនោះឈរតម្រៀបតាមទីកន្លែងរៀងៗខ្លួន ។
លោក ឯម ហៀង អនុប្រធានសហព័ន្ធកីឡាទាញព្រ័ត្របានឱ្យដឹងថា ប្រពៃណីកីឡាទាញព្រ័ត្រនេះ មានរាប់ពាន់ឆ្នាំមកហើយ ដែលជាកីឡាមួយប្រភេទប្រើកម្លាំងដើម្បីយកចាញ់ឈ្នះលើគ្នា ។ ក្រោយមក ល្បែងទាញព្រ័ត្រនេះ បានប្រែក្លាយជាកីឡាបែបវិទ្យាសាស្ត្រ ដែលមានលក្ខណៈក្បួនខ្នាតត្រឹមត្រូវ រហូតដល់មានការប្រកួតជាផ្លូវការ ប្រកួតជ្រើសរើសជើងឯកអាស៊ី ជើងឯកអាស៊ីអាគ្នេយ៍និងប្រកួតជាលក្ខណៈអន្តរជាតិទៀតផង ។ ដោយឡែកនៅកម្ពុជា សហព័ន្ធកីឡាទាញព្រ័ត្រទើបតែបង្កើតឡើងប៉ុណ្ណោះ ហើយត្រូវបានក្រសួងអប់រំ យុវជន និងកីឡាអនុញ្ញាតឱ្យប្រកួតជ្រើសរើសជើងឯកប្រចាំឆ្នាំជាលើកទី១ ដែលនឹងត្រូវធ្វើឡើងនៅថ្ងៃទី៦ ដល់ទី៩ មេសា ខាងមុខនេះ ។ ជាងនេះទៅទៀត កីឡាទាញព្រ័ត្រកម្ពុជានឹងត្រូវធ្វើដំណើរទៅចូលរួមប្រកួតជ្រើសរើសជើងឯកចំនួន៣នៅប្រទេសថៃ គឺការប្រកួតជើងឯកកម្រិតអាស៊ី កម្រិតអាស៊ីអាគ្នេយ៍ និងជើងឯកប្រទេសអនុតំបន់ទន្លេមេគង្គ ៕
ចែករំលែកព័តមាននេះ