ឥន្ទ្រីដែកស្រែករកជំនួយពីអ្នកគាំទ្រគុនខ្មែរក្រោយរងរបួសធ្ងន់
- ភ្នំពេញ
រាជធានីភ្នំពេញ ៖ សំ អាន អ្នកប្រដាល់មកពីក្លិបបញ្ជាការដ្ឋានទ័ពពិសេសឆ័ត្រយោង ៩១១ រហស្ស
រាជធានីភ្នំពេញ ៖ សំ អាន អ្នកប្រដាល់មកពីក្លិបបញ្ជាការដ្ឋានទ័ពពិសេសឆ័ត្រយោង ៩១១ រហស្សនាមឥន្ទ្រីដែក កំពុងរងរបួសធ្ងន់ បន្ទាប់ពីត្រូវមួយកែងយ៉ាងដំណំចំផ្ទៃមុខបណ្ដាលឱ្យសន្លប់ត្រូវអាជ្ញាកណ្ដាលបញ្ឈប់ត្រឹមទឹកទី២នៅក្នុងការប្រកួតជាមួយកីឡាករថៃ Chok Mong Kon Phak Yok កាលពីយប់ថ្ងៃទី៣០ ខែកញ្ញា ឆ្នាំ២០២២ នៅសង្វៀនបាយ័នបឹងស្នោក្នុងកម្មវិធីជើងឯក គូបូតា។
ក្រោយត្រូវមួយកែងស្ដាំនោះហើយ កីឡាករកម្ពុជាខាងលើត្រូវបានយកទៅសង្គ្រោះបន្ទាន់នៅមន្ទីរពេទ្យព្រះកុសុមះហៅមន្ទីរពេទ្យលោកសង្ឃ ។
ក្រោយសង្គ្រោះបានជោគជ័យ និងការពិនិត្យរបស់ក្រុមគ្រូពេទ្យ ឃើញថា របួសមិនស្រាលទេ ក្នុងនោះបាក់ខ្ទង់ច្រមុះធ្ងន់ធ្ងរ និងមានស្រាំឆ្អឹងនៅលើមុខជាច្រើនកន្លែង ។ ចំណែកថ្លៃព្យាបាលវិញគឺអស់១ លាន ២ សែនរៀលហើយ ដែលថវិកានេះបានពីការយកសាច់ស្រស់ឈាមស្រស់ទៅប្ដូររបស់ឥន្ទ្រីដែកនៅលើសង្វៀន។
តាមលោក ហង្ស សឿន ជាគ្រូបង្វឹកបានប្រាប់អ្នកយកព័ត៌មានទាំងក្ដុកក្ដួលថា៖ « សំ អាន គ្នាអត់ណាស់ជួយគ្នាផង ហើយរបួសនេះមិនទាន់ដឹងថា ពេលណាបានចេញវិញទេ នៅបន្តព្យាបាលនៅឡើយ ។ គ្រួសាររបស់គាត់ក្រណាស់ សូម្បីប្រពន្ធគាត់ក៏គ្មានទូរសព្ទប្រើផង ។ គ្នាវ៉ៃបានតែ៣០០ដុល្លារទេ តម្លៃខ្លួនគាត់ ហើយពេលនេះមួយយប់គ្រាន់តែថ្លៃព្យាបាលអស់បាត់ហើយ ។ តាមខ្ញុំដឹងពីប្រពន្ធគាត់មុននេះឮថា ខាងសង្វៀនគេនឹងជួយ តែលោកមិនច្បាស់ថា នឹងជួយបានប៉ុន្មានទេ។ គ្រាន់តែដឹងថា គេនឹងមិនជួយយើងទាំងស្រុងទេប្អូន ព្រោះកន្លងមកកូនសិស្សរបស់ខ្ញុំក៏ធ្លាប់របួសធ្ងន់ដែរ ហើយការជួយនោះបានមួយផ្នែកប៉ុណ្ណោះ»។
ទាំងស្ត្រីជាប្រពន្ធ និងលោកគ្រូ ហង្ស សឿន បានអំពាវនាវដល់អ្នកស្នេហាគុនខ្មែរទាំងអស់ មេត្តាជួយដល់កីឡាកររូបនេះផង ។ សប្បុរសជនដែលមានចិត្តបុណ្យចង់ជួយអាចទាក់ទងតាមរយៈលេខទូរស័ព្ទរបស់ សំ អាន ផ្ទាល់គឺ ០៩៦ ៧៧៨ ៥៧ ៥៩ ឬលេខទូរស័ព្ទរបស់លោកគ្រូហង្ស សឿន គឺ 092 63 01 01 / 098 20 05 22 ៕
ចែករំលែកព័តមាននេះ