សហរដ្ឋអាមេរិក ៖ ស្ថិតក្នុងវ័យ៤០ឆ្នាំ ខ្សែការពារឆ្នើមសញ្ជាតិប្រេស៊ីល Thiago Silva បានបង្ហាញខ្លួន៩០នាទីពេញ និងដើរយ៉ាងសំខាន់នៅក្នុងជ័យជម្នះលទ្ធផល ២-០ របស់ក្រុម…
សហរដ្ឋអាមេរិក ៖ ស្ថិតក្នុងវ័យ៤០ឆ្នាំ ខ្សែការពារឆ្នើមសញ្ជាតិប្រេស៊ីល Thiago Silva បានបង្ហាញខ្លួន៩០នាទីពេញ និងដើរយ៉ាងសំខាន់នៅក្នុងជ័យជម្នះលទ្ធផល ២-០ របស់ក្រុម Fluminense លើក្រុម Inter Milan ទម្លាក់ក្រុមជើងឯករងពានរង្វាន់ Champions League រដូវកាល ២០២៤-២៥ មួយនេះ ត្រឹមវគ្គ១៦ក្រុមចុងក្រោយពានរង្វាន់ FIFA Club World Cup ឆ្នាំ២០២៥ (FIFA CWC) លើទឹកដីសហរដ្ឋអាមេរិក។ Silva ក៏បានរួមចំណែកយ៉ាងសំខាន់ជារនាំងការពារ Fluminense មិនឱ្យគូប្រកួតស៊ុតបញ្ចូលទីបាន (Clean Sheet) ជាលើកទី៣ហើយក្នុងការប្រកួតពានរង្វាន់ក្លិបបាល់ទាត់ពិភពលោកនៅឆ្នាំនេះ។
ក្រោយចប់ការប្រកួត នៅកីឡដ្ឋាន Bank of America កាលពីវេលាទៀបភ្លឺឈានចូលថ្ងៃទី១ ខែកក្កដា ឆ្នាំ២០២៥ (ម៉ោងនៅកម្ពុជា) ខ្សែការពារ Thiago Silva បានសម្រក់ទឹកភ្នែកដោយក្ដីសោមនស្សរីករាយបំផុត និងរត់ទៅថើបភរិយាជាទីស្រឡាញ់នៅកន្លែងអ្នកទស្សនាផងដែរ។ អតីតខ្សែការពារកណ្តាលក្រុមជម្រើសជាតិប្រេស៊ីលរូបនេះ បានថ្លែងប្រាប់គេហទំព័រ DAZN ដូច្នេះថា «ខ្ញុំពិតជាមានមោទនភាពចំពោះក្រុម និងមិត្តរួមក្រុមរបស់ខ្ញុំ។ ការប្រកួតនេះពិតជាលំបាកនៅពេលយើងជួបជាមួយក្លិបដែលទើបតែបានលេងវគ្គផ្តាច់ព្រ័ត្រ UEFA Champions League កាលពីមួយខែមុន។ បើទោះជាលេងក្នុងលក្ខខណ្ឌអាកាសធាតុអាក្រក់ខ្លាំងក៏ពិតមែន ប៉ុន្តែ Fluminense បានបង្ហាញរូបភាពនៃភាពជាក្រុមដ៏អស្ចារ្យមួយ»។
ក្រឡេកទៅការប្រកួតបើទោះជា Inter Milan គ្រប់គ្រងបាល់បានល្អជាង និងស៊ុតបានរហូតដល់១៦លើកក្នុងការប្រកួតក៏ដោយ ក៏ខ្សែការពាររបស់ Fluminense ដែលមាន Silva ជាប្រធានក្រុមផ្ទាល់ នៅតែជាខែលដែកថែបដ៏រឹងមាំ និងជាជំនួយដ៏សំខាន់ដល់មិត្តរួមក្រុមគឺ ខ្សែប្រយុទ្ធ Germán Cano និងខ្សែបម្រើ Hércules មានឱកាសសម្រេចបានម្នាក់១គ្រាប់ជួយក្រុមលោកគ្រូបង្វឹក Renato Gaúcho ដែលតំណាងប្រេស៊ីលឡើងទៅវគ្គ៨ក្រុមចុងក្រោយ។
ជាមួយគ្នានេះដែរ ក្រៅអំពីខ្សែការពារ Thiago Silva ខ្សែប្រយុទ្ធ Lautaro Martinez របស់ក្លិប Inter Milan ក៏បានចែករំលែកអំពីលក្ខខណ្ឌអាកាសធាតុក្តៅ និងការលំបាកដែលក្រុមរបស់ខ្លួនបានជួបប្រទះផងដែរ។ ខ្សែប្រយុទ្ធក្រុមជម្រើសជាតិអាហ្សង់ទីនរូបនេះបានសារភាពដូច្នេះថា «យើងលេងមិនបានល្អក្នុងតង់ទីមួយ។ Inter បានស៊ុតបាល់បញ្ចូលទីច្រើនពេក និងបាត់បង់បាល់ច្រើន ស្របពេល Fluminense ការពារបានល្អ និងលេងការវាយបកយ៉ាងមានប្រសិទ្ធភាព។ ខ្ញុំសុំទោសអ្នកគាំទ្រ និងអ្នកដែលមកគាំទ្រនៅទីនេះ»៕ ដកស្រង់ ៖ Znews
ចែករំលែកព័តមាននេះ