ប្រទេស​បារាំង ៖ ក្រុមបាល់ទាត់​បុរស​ឈុត​ធំ​របស់​ក្លិប Lyon ម្ចាស់​ជើងឯក​លី​គ​កំពូល​បារាំង Ligue 1 ចំនួន​៧​សម័យកាល ត្រូវ​បាន​ទម្លាក់​ទៅ​កាន់​លី​គ​លំដាប់​ទី​២ Ligue 2 ដោយសារ​តែ​វិបត្តិ​ហិរញ្ញវត្ថុ​របស់​ក្លិប​។ នេះ​បើ​តាម​ប្រភព​ពី​សារព័ត៌មាន BBC និង Sky Sports បាន​ចេញផ្សាយ​កាលពី​ថ្ងៃ​ទី​២៤ ខែមិថុនា ឆ្នាំ​២០២៥​។

ក្រុម​ដ៏​ល្បីល្បាញ​ក្នុង​ប្រវត្តិសាស្ត្រ​បាល់ទាត់​បារាំង​មួយ​នេះ ត្រូវ​បាន​ទម្លាក់​ទៅ Ligue 2 ជា​បណ្ដោះអាសន្ន កាលពី​ខែវិច្ឆិកា ឆ្នាំ​មុន ដោយ DNGC ដែល​ជា​ស្ថាប័ន​ត្រួតពិនិត្យ​ផ្នែក​ហិរញ្ញវត្ថុ​របស់​ក្លិប​បាល់ទាត់​អាជីព​នៅ​ក្នុង​ប្រទេស​បារាំង​។ មន្ត្រី​ក្លិប Lyon រួម​ទាំង​ម្ចាស់​ក្លិប លោក John Textor បាន​ជួប​ជាមួយ DNGC កាលពី​ថ្ងៃ​ទី​២៤ ខែមិថុនា កន្លង​ទៅ ប៉ុន្តែ​បាន​បរាជ័យ​ក្នុង​ការ​បញ្ចុះបញ្ចូល​ស្ថាប័ន​មួយ​នេះ​ថា ក្លិប​បាន​កែ​លម្អ​ស្ថានភាព​ហិរញ្ញវត្ថុ​របស់​ខ្លួន​ឱ្យ​បាន​គ្រប់គ្រាន់ ដើម្បី​គេច​ផុត​ពី​ទណ្ឌកម្ម​។

កាលពី​ខែតុលា ឆ្នាំ​មុន ក្រុមហ៊ុន Eagle Football Group របស់​សេដ្ឋី​សញ្ជាតិ​អា​មេ​រិ​ក ដែល​មាន​ភាគហ៊ុន​រហូត​ដល់ ៧៧% ក្នុង​ក្លិប Lyon បាន​ប្រកាស​ជាប់បំណុល​ទឹកប្រាក់​ចំនួន​៤២២​លាន​ផោន ឬ ៥៧៥​លាន​ដុល្លារ​អា​មេ​រិ​ក​។ នៅ​ក្នុង​សេចក្តីថ្លែងការណ៍​មួយ Lyon បាន​ប្រកាស​ថា ការ​សម្រេចចិត្ត​របស់ DNGC គឺជា​ការ​សម្រេច​មិន​អាច​យល់​បាន ហើយ​បាន​បញ្ជាក់​ទៀត​ថា ពួក​គេ​នឹង​ប្តឹង​ឧទ្ធរណ៍​។

ការ​កាត់​ចោល​ក្រុម Lyon ទៅ​កាន់​លី​គ​លំដាប់​ទី​២ អាច​បង្ហាញ​អំពី​ក្តី​សង្ឃឹម​របស់​ក្រុម Crystal Palace សម្រាប់​កៅអី​ប្រកួត​ពានរង្វាន់ UEFA Europa League នៅ​រដូវ​កាល​ក្រោយ​។ បច្ចុប្បន្ន សិទ្ធិ​ចូលរួម​របស់ Crystal Palace សមាជិក​លី​គ​កំពូល​អង់គ្លេស Premier League កំពុង​ស្ថិត​ក្នុង​ភាព​ស្រពិចស្រពិល ដោយសារ​តែ​ច្បាប់​របស់ UEFA ដែល​រារាំង​ក្លិប​លើស​ពី ២ ស្ថិត​ក្រោម​ការ​គ្រប់គ្រង​ដោយ​ម្ចាស់​ក្លិប​តែ​មួយ ដែល​ប្រកួតប្រជែង​ក្នុង​ពានរង្វាន់​ទ្វីបអឺរ៉ុប​នៅ​ក្នុង​ពេល​តែ​មួយ​។ ដ្បិត លោក John Textor Textor បាន​កាន់កាប់​ភាគហ៊ុន​ក្នុង​ក្លិប​ទាំង Lyon និង Crystal Palace បើ​ទោះបីជា​លោក​បាន​យល់ព្រម​លើ​កិច្ចព្រមព្រៀង​លក់​ភាគហ៊ុន ៤៣% របស់​លោក​ក្នុង​ក្លិប Crystal Palace កាលពី​ថ្ងៃ​ទី​២៤ ខែមិថុនា កន្លង​ទៅ យ៉ាងណា​ក៏​ដោយ​៕