ក្រុមប្រឹក្សាសន្តិសុខ អ.ស.ប កាលពីថ្ងៃទី៧ មីនា បានថ្កោលទោសយ៉ាងខ្លាំងចំពោះការបាញ់មីស៊ីលនាពេលថ្មីៗនេះរបស់កូរ៉េខាងជើងដោយសម្តែងការព្រួយបារម្ភរបស់ខ្លួនចំពោះកាយវិការកាន់តែបង្កអស្ថេរភាពរបស់ក្រុងព្យុងយ៉ាង ។
ក្រុមប្រឹក្សាសន្តិសុខ អ.ស.ប កាលពីថ្ងៃទី៧ មីនា បានថ្កោលទោសយ៉ាងខ្លាំងចំពោះការបាញ់មីស៊ីលនាពេលថ្មីៗនេះរបស់កូរ៉េខាងជើងដោយសម្តែងការព្រួយបារម្ភរបស់ខ្លួនចំពោះកាយវិការកាន់តែបង្កអស្ថេរភាពរបស់ក្រុងព្យុងយ៉ាង ។
ការថ្កោលទោសនេះចេញពីអត្ថបទមួយតាំងតែងដោយសហរដ្ឋអាមេរិក ហើយអនុម័តជាឯកច្ឆ័ន្ទដោយសមាជិកទាំង១៥ របស់ក្រុមប្រឹក្សាសន្តិសុខ ទោះបីមានភាពតានតឹងរវាងក្រុងវ៉ាស៊ីនតោន និងក្រុងប៉េកាំង ទាក់ទិននឹងការប្រកាសដាក់ពង្រាយប្រព័ន្ធការពារប្រឆាំងមីស៊ីលអាេមរិក THAAD នៅកូរ៉េខាងត្បូងក្តី ។
ក្រុមប្រឹក្សាសន្តិសុខ អ.ស.ប ដែលត្រូវរួមប្រជុំនាថ្ងៃទី៨ មីនា ពីបញ្ហាកូរ៉េខាងជើងចាត់ទុកការបាញ់មីស៊ីលទាំងនេះថាជាការរំលោភបំពានធ្ងន់ធ្ងរដល់បណ្តាដំណោះស្រាយ អ.ស.ប ហើយសន្យាចាត់វិធានការខ្លាំងដទៃៗទៀត ដើម្បីដាក់ទណ្ឌកម្មប្រឆាំងក្រុងព្យុងយ៉ាង ។
ប្រទេសទាំង១៥ជាសមាជិកក្រុងប្រឹក្សាសន្តិសុខ អ.ស.ប តាមសំណើរបស់សហរដ្ឋអាមេរិក និងជប៉ុនត្រូវរួមប្រជុំនាថ្ងៃទី៨ មីនា ដើម្បីពិភាក្សាពីការបាញ់កាលពីថ្ងៃទី៦ មីនា របស់កូរ៉េខាងជើងនូវមីស៊ីលបាលីស្ទិក៤គ្រាប់ ដែលតាមក្រុងព្យុងយ៉ាងថា នេះជាសមយុទ្ធមួយសំដៅវាយប្រហារបណ្តាមូលដ្ឋានយោធាអាមេរិកនៅជប៉ុន ។ មីស៊ីល៣គ្រាប់បានធ្លាក់ក្នុងសមុទ្រជិតប្រទេសជប៉ុន ។
ក្នុងសេចក្តីថ្លែងការណ៍របស់ខ្លួនក្រុមប្រឹក្សាសន្តិសុខ អ.ស.ប អះអាងថា បណ្តាសកម្មភាពរបស់កូរ៉េខាងជើងបង្កើនភាពតានតឹងក្នុងតំបន់ និងហួសពីនេះទៀត ព្រមទាំងគ្រោះថ្នាក់នៃការប្រណាំងប្រជែងគ្រឿងសព្វាវុធក្នុងតំបន់ ។
សហរដ្ឋអាមេរិកបានពិគ្រោះជាមួយប្រទេសឯទៀតៗ នៃក្រុមប្រឹក្សាសន្តិសុខពេលភាពតានតឹងកើនខ្លាំងជាមួយចិន ក្រោយការប្រកាសដាក់ពង្រាយមីស៊ីល THAAD នៅកូរ៉េខាងត្បូងសំដៅការពារក្រុងសេអ៊ូលពីការវាយប្រហារមកពីកូរ៉េខាងជើង ។
ចិនសម្ព័ន្ធមិត្តសំខាន់របស់កូរ៉េខាងជើងឱ្យដឹងថា ខ្លួនប្រឆាំងម៉ឺងម៉ាត់ចំពោះការដាក់ពង្រាយមីស៊ីល THAAD ហើយថា នឹងការពារម៉ឺងម៉ាត់សន្តិសុខរបស់ខ្លួន ដោយព្រមានថា សហរដ្ឋអាមេរិក និងកូរ៉េខាងត្បូងនឹងទទួលរងនូវរាល់ផលវិបាកទាំងឡាយ ។
អ្នកនាំពាក្យក្រសួងការបរទេសចិន លោក GENG SHUANG អះអាងនាថ្ងៃទី៧ មីនា ថា ចិនបញ្ជាក់ជាថ្មីពីការប្រឆាំងការដាក់ពង្រាយប្រព័ន្ធមីស៊ីល THAAD នៅកូរ៉េខាងត្បូង ។ យើងនឹងចាត់បណ្តាវិធានការដើម្បីថែរក្សាផលប្រយោជន៍សន្តិសុខរបស់យើង ។ លោក GENG ស្នើដល់គ្រប់ភាគីដែលទាក់ទិនឱ្យបញ្ឈប់ការដាក់ពង្រាយនេះ ហើយផ្អាកការដើរថែមទៀតលើផ្លូវអាក្រក់ ។
ចំណែកអ្នកទទួលខុសត្រូវជាន់ខ្ពស់ជាច្រើនរបស់រុស្ស៊ីថ្លែងនាថ្ងៃទី៧ មីនា ថា ការដាក់ពង្រាយមីស៊ីល THAAD នៅកូរ៉េខាងត្បូងគឺជាការគំរាមកំហែងធ្ងន់ធ្ងរមួយដល់សន្តិសុខរុស្ស៊ី ។ លោក LEONID SLOUTSKI ប្រធានគណៈកម្មាធិការកិច្ចការអន្តរជាតិរបស់សភារុស្ស៊ីថ្លែងថា ក្រុងវ៉ាស៊ីនតោនកំពុងបង្កើតទីតាំងថ្មីនៃប្រព័ន្ធការពារប្រឆាំងមីស៊ីលជាសាកលនៅអាស៊ីភាគឦសានជិតព្រំដែនរុស្ស៊ី ។ បែបនេះនឹងអាចបង្កគ្រោះថ្នាក់ដល់សន្តិសុខរបស់យើង ។
ក្រសួងការពារប្រទេសកូរ៉េខាងត្បូងប្រកាសមុននេះបន្តិចថា ប្រព័ន្ធមីស៊ីល THAAD ២ត្រូវបានបញ្ជូនមកដល់មូលដ្ឋានអាកាសចរណ៍មួយស្ថិតនៅចម្ងាយប្រមាណ៧០គីឡូម៉ែត្រខាងត្បូងក្រុងសេអ៊ូលរួចហើយ ៕
ចែករំលែកព័តមាននេះ