រាជធានីភ្នំពេញ ៖ កម្មការិនីរោងចក្រកាត់ដេរម្នាក់ បានទៅកាន់ប៉ុស្ដិ៍នគរបាលចោមចៅ សុំឲ្យជួយពន្លឿនការដោះស្រាយជូននាងឲ្យបានឆាប់ ដោយនាងអះអាងថា ត្រូវប្ដីក្បត់ចិត្តចុះចោលទៅមានស្រីថ្មី ហើយប្រើហិង្សាវាយធ្វើបាបបង្ខំឲ្យនាងផ្ដិតមេដៃលែងលះគ្នារាល់ថ្ងៃថែមទៀត ដើម្បីបានទៅរៀបការជាមួយស្រីថ្មីនោះ ។ ប៉ុន្តែនាងមិនព្រមលែង ហើយអ្វីដែលនាងទទួលរងការឈឺចាប់លើសលប់បំផុតនោះ គឺខឹងនាងមិនព្រមលែងស្រាប់តែប្ដីបានដឹកស្រីស្នេហ៍របស់ខ្លួនឲ្យទៅរករឿងវាយធ្វើបាបនាងដល់ផ្ទះទៀតផង ។
ដោយទ្រាំនឹងការប្រើហិង្សា និងការមើលងាយមើលថោកពីសំណាក់ប្ដីលែងបានតទៅទៀត ទើបនាងបានទៅដាក់ពាក្យបណ្ដឹងនៅប៉ុស្ដិ៍នគរបាលរដ្ឋបាលចោមចៅ ដើម្បីសុំឲ្យនគរបាលជួយដោះស្រាយរឿងការប្រើហិង្សាវាយតប់នាង បន្ទាប់មកនាងនឹងរកពេលវេលាទៅនិយាយគ្នាពីរឿងលែងលះជាក្រោយនៅឯឃុំ ស្រុក របស់នាងបន្តទៀត ។
ក្រោយពេលនាងដាក់ពាក្យបណ្ដឹងរួចរាល់ នគរបាលក៏ចាត់ការឲ្យដែរ ដោយបានធ្វើលិខិតអញ្ជើញបុរសជាប្ដីរបស់នាងរួមជាមួយស្រីស្នេហ៍របស់គេឲ្យចូលខ្លួនទៅធ្វើការដោះស្រាយ ប៉ុន្តែពួកគេមិនចូលខ្លួនទាល់តែសោះ ទើបនៅព្រឹកថ្ងៃទី៦ ខែមីនា នាងបានទៅកាន់ប៉ុស្ដិ៍នគរបាលទៀតដើម្បីសុំឲ្យជួយពន្លឿនការដោះស្រាយជូននាងឲ្យបានឆាប់ ។
ស្ត្រីរូបនេះឈ្មោះ ងឹម សុខគា អាយុ២៨ឆ្នាំ មានស្រុកកំណើតនៅឃុំតាភេម ស្រុកត្រាំកក់ ខេត្តតាកែវ បច្ចុប្បន្នស្នាក់នៅក្នុងភូមិចោមចៅ សង្កាត់ចោមចៅ ខណ្ឌពោធិ៍សែនជ័យ។ ចំណែកបុរសជាប្ដីឈ្មោះ ម៉ង់ គា អាយុ២៨ឆ្នាំដូចគ្នា មុខរបររត់ម៉ូតូឌុប ។
នាង ងឹម សុខគា និយាយថា នាងបានរៀបការជាមួយបុរសជាប្ដីនេះច្រើនឆ្នាំមកហើយ និងបានកូនប្រុសម្នាក់ជាចំណងដៃ ។ លុះប៉ុន្មានខែចុងក្រោយនេះ លោកប្ដីបានចុះចោលរូបនាងនិងកូនទៅមានស្រីថ្មី ដោយគ្មានអាល័យ ។
មិនតែប៉ុណ្ណោះ ចាប់តាំងពីពេលមានស្រីថ្មីកាលណាមក លោកប្ដីតែងតែរករឿងវាយតប់នាង និងបង្ខំឲ្យនាងផ្ដិតមេដៃលែងលះគ្នា ដើម្បីបានទៅរៀបការជាមួយស្រីថ្មីនោះពេញមុខពេញមាត់ថែមទៀត ប៉ុន្តែនាងមិនព្រមឡើយ ទើបប្តីបានដឹកស្រីថ្មីឲ្យទៅរករឿងវាយនាងដល់បន្ទប់ផ្ទះជួលថែមទៀត ។
ប្រភពដដែលបន្តថា ដោយសារតែបែបនេះទើបនាងអត់ទ្រាំលែងបាន ក៏ទៅដាក់ពាក្យបណ្ដឹងសុំឲ្យនគរបាលប៉ុស្ដិ៍ចោមចៅ ជួយអន្តរាគមន៍ព្រោះនាងបារម្ភពីសុវត្ថិភាពផ្ទាល់ខ្លួន ហើយក៏ចង់និយាយគ្នាឲ្យបានដឹងស-ខ្មៅជាមួយប្ដីដែរ។
ក្រោយពេលទទួលពាក្យបណ្ដឹងនាងហើយ នគរបាលបានធ្វើលិខិតអញ្ជើញដើម្បីឲ្យប្ដីនិងស្រីស្នេហ៍ដែលប្រើហិង្សាលើរូបនាងនោះចូលខ្លួនដោះស្រាយគ្នា បែរជាប្តីមិនហ៊ានចូលខ្លួនឡើយ ហើយចេះតែទៅរករឿងនាងជាបន្តបន្ទាប់គួរឲ្យខ្លាច ទើបពេលនេះនាងធ្វើដំណើរទៅកាន់ប៉ុស្ដិ៍នគរបាលសុំឲ្យពន្លឿនការដោះស្រាយថែមទៀត ៕
ចែករំលែកព័តមាននេះ