រាជធានីភ្នំពេញ ៖ បុរសម្នាក់ជាកម្លាំងប្រជាការពារសាលាខណ្ឌទួលគោកត្រូវបានរថយន្តមួយគ្រឿងបើកបរដោយបុរសពីរនាក់ចេញពីផឹកស៊ីបើករថយន្តបុកចំហៀងខាងឆ្វេងធ្វើឲ្យខូចខាតម៉ូតូតែមិនមានរងរបួសទេ
រាជធានីភ្នំពេញ ៖ បុរសម្នាក់ជាកម្លាំងប្រជាការពារសាលាខណ្ឌទួលគោកត្រូវបានរថយន្តមួយគ្រឿងបើកបរដោយបុរសពីរនាក់ចេញពីផឹកស៊ីបើករថយន្តបុកចំហៀងខាងឆ្វេងធ្វើឲ្យខូចខាតម៉ូតូតែមិនមានរងរបួសទេ រថយន្តបង្កព្យាយាមរត់គេចតែត្រូវបានអ្នករត់ម៉ូតូឌុបជួយដេញចាប់បានបង្កការភ្ញាក់ផ្អើលកាលពីវេលាម៉ោង៩យប់ថ្ងៃទី៧ មីនា ស្ថិតតាមបណ្ដោយផ្លូវ២៦៥ សង្កាត់ទឹកល្អក់២ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេឃើញរថយន្តបង្កមួយគ្រឿងម៉ាកកូរ៉ូឡា ពណ៌ស្ករ ពាក់ស្លាកលេខ ភ្នំពេញ 2J-3734 ជិះដោយបុរសពីរនាក់ក្នុងទិសដៅពីត្បូងទៅជើង លុះមកដល់ចំណុចកើតហេតុស្រាប់តែរថយន្តខាងលើបានបើកទៅបុកម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរីឆ្នាំ២០០៣ ពាក់ស្លាកលេខភ្នំពេញ 1AF-4811 បើកបរដោយបុរសម្នាក់ក្នុងទិសដៅពីជើងទៅត្បូងបណ្ដាលឱ្យរងការខូចខាតបែកក្បាំងម៉ូតូខាងមុខខ្ទេចតែមិនមានរងរបួសដល់ម្ចាស់ម៉ូតូនោះទេ ភ្លាមនោះរថយន្តបង្កបានព្យាយាមបើករថយន្តរត់គេចដល់ចំណុចគល់ស្ពានអាកាស៧មករាខាងកើតទើបត្រូវបានក្រុមម៉ូតូឌុបដែលនៅជិតកន្លែងកើតហេតុដេញឃាត់ចាប់បាននៅកន្លែងនោះតែម្ដងទៅ ។
បើតាមសម្ដីរបស់ម្ចាស់រថយន្តដែលមានឈ្មោះ ប៉ូ សុខតាល់ ភេទប្រុស អាយុ២៥ឆ្នាំ មុខរបរជាងម៉ាស៊ីនត្រជាក់ ស្នាក់នៅម្ដុំសូឡា សង្កាត់ទឹកថ្លា ខណ្ឌសែនសុខ បានឱ្យដឹងថា មុនពេលកើតហេតុរូបគាត់ទើបតែចេញមកពីផឹកស៊ីក្នុងហាងមួយម្ដុំផ្សារសំណង់១២គោលបំណងបើករថយន្តត្រលប់ទៅផ្ទះវិញ ខណៈពេលកំពុងតែបើកបរស្រាប់តែមានម៉ូតូខាងលើដែលមានម្ចាស់ម៉ូតូស្រវឹងផងនោះបើករេពេញផ្លូវហើយបានជ្រុលទៅបុករថយន្តរបស់គាត់ចំហៀងខាងឆ្វេងរថយន្តបណ្ដាលឱ្យម៉ូតូជនរងគ្រោះដួលខ្ទាតទៅម្ខាងផ្លូវ ភ្លាមនោះដោយរូបគាត់ខ្លាចត្រូវគេវៃរថយន្តរបស់គាត់ទើបគាត់បើករថយន្តចេញពីកន្លែងកើតហេតុនោះទៅ ។
ចំពោះជនរងគ្រោះវិញបានឱ្យដឹងថា រូបគាត់ទើបតែមកពីធ្វើការហើយបំណងត្រលប់ទៅផ្ទះវិញនៅម្ដុំទឹកថ្លាលុះជិះមកដល់ចំណុចកើតហេតុស្រាប់តែរងយន្តខាងលើបានរ៉េចង្កូតទៅបុកម៉ូតូរបស់គាត់តែម្ដង ។ ក្រោយពេលកើតហេតុសមត្ថកិច្ចបានបើករថយន្តបង្កទៅកន្លែងកើតហេតុវិញដើម្បីឱ្យខាងអ្នកបង្ក និងជនរងគ្រោះនិយាយគ្នា ហើយក្រោយមកខាងបង្កបានជួយចេញថ្លៃខូចខាតទៅខាងរងគ្រោះចំនួន៤០ដុល្លារដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ