និស្សិតម្នាក់ខ្ចីរថយន្តកុហកថា ទៅមើលឪពុកដេកពេទ្យ បែរជាខ្លួនឯងចូលពេទ្យ
រាជធានីភ្នំពេញ ៖ និស្សិតម្នាក់ បានខ្ចីរថយន្តបងប្អូនជិះទៅចូលរួមក្នុងពិធីជប់លៀងមង្គលការមិត្តភក្តិ តែមិនប្រាប់ត្រង់ទេ គឺកុហកថា
រាជធានីភ្នំពេញ ៖ និស្សិតម្នាក់ បានខ្ចីរថយន្តបងប្អូនជិះទៅចូលរួមក្នុងពិធីជប់លៀងមង្គលការមិត្តភក្តិ តែមិនប្រាប់ត្រង់ទេ គឺកុហកថា ទៅមើលឪពុកឈឺនៅមន្ទីរពេទ្យ ។ លុះពេលត្រឡប់មកពីហូបការវិញ បើករថយន្តបុកខឿនសួនច្បារ ហើយព្យាយាមបើកគេចក៏ទៅបុករទេះលក់គ្រឿងម្ជូរនៅផ្សារដើមគទៀត ទើបត្រូវអាជីវករនិងប្រជាពលរដ្ឋនាំគ្នាវាយបែកក្បាល និងគប់កញ្ចក់រថយន្តបែកខ្ទេច ។
ករណីនេះកើតឡើងកាលពីវេលាម៉ោង៩និង ២០នាទីយប់ថ្ងៃទី៦ ខែមីនា នៅតាមវិថីព្រះមុនីរ៉េត កន្លែងលក់បន្លែផ្សារដើមគ ស្ថិតក្នុងសង្កាត់ទួលស្វាយព្រៃទី២ ខណ្ឌចំកាមន។
រថយន្តដែលខ្ចីគេនោះម៉ាក តូយ៉ូតាព្រូស ពណ៌ទឹកប្រាក់ ពាក់ផ្លាកលេខ ភ្នំពេញ ២U-២៦៦០ ឯនិស្សិតរូបនេះឈ្មោះ ទេព បុរី ភេទប្រុស អាយុ២៥ឆ្នាំ រៀនឆ្នាំទី៣នៅសាកលវិទ្យាល័យភ្នំពេញអន្តរជាតិ ស្នាក់នៅក្នុងសង្កាត់បឹងសាឡាង ខណ្ឌទួលគោក ។ ចំណែកឯម្ចាស់រទេះលក់គ្រឿងម្ជូរឈ្មោះ យុន សាវ៉េន ភេទស្រី អាយុ៣៨ឆ្នាំ ស្នាក់នៅផ្ទះជួលម្តុំផ្សារដើមគ សង្កាត់ផ្សារដើមគ ខណ្ឌទួលគោក ។
ប្រភពព័ត៌មានឱ្យដឹងថា យុវជនខាងលើបើករថយន្តតូយ៉ូតាព្រូសចេញមកពីការមិត្តភក្តិនៅម្តុំស្ពានព្រែកតាមាក់ ស្រុកខ្សាច់កណ្តាល ខេត្តកណ្តាល គោលបំណងត្រឡប់ទៅផ្ទះវិញនៅម្តុំបឹងសាឡាង ខណ្ឌទួលគោក ដោយធ្វើដំណើរតាមផ្លូវជាតិលេខ៦ក្នុងល្បឿនលឿន ។
លុះមកដល់មុខភោជនីយដ្ឋាន«ឧត្តម» ដោយសារតែកំណាត់ផ្លូវជាតិលេខ៦កំពុងជួសជុលមិនទាន់រួចរាល់ ក៏បើកធ្លាក់ចូលផ្លូវដែលគេកុំពុងជួសជុលនោះហើយរេចង្កូតទៅបុកខឿនសួនច្បារពុះចែកទ្រូងផ្លូវ បណ្តាលឱ្យរងការខូចខាតបន្តិចបន្តួច ។ រីឯរថយន្តបែកកង់មុខផ្នែកខាងឆ្វេង និងក្រពឹតផ្នែកខាងមុខចំហៀងខាងឆ្វេងដែរ តែមិនបានឈប់ទេនិងព្យាយាមបើករត់គេចចេញពីកន្លែងកើតហេតុទាំងបែកកង់។ ខណៈឃើញបែបនេះ អ្នករស់នៅជិតនោះក៏បានរាយការណ៍ប្រាប់សមត្ថកិច្ចមូលដ្ឋាន ។
ស្របពេលនោះដែរ សមត្ថកិច្ចដែលកំពុងល្បាតក្នុងមូលដ្ឋានឃើញក៏ដេញតាម ។ លុះទៅដល់កន្លែងលក់បន្លែនៅផ្សារដើមគតាមវិថីព្រះមុនីរ៉េត រថយន្តនេះបានបើកជែងខាងស្តាំរថយន្តមួយគ្រឿងទៀតក៏ជ្រុលទៅបុករទេះលក់គ្រឿងម្ជូរពីក្រោយពេញទំហឹង បណ្តាលឱ្យរទេះរងការខូចខាតបន្តិចបន្តួច រីឯម្ចាស់រទេះរត់ចេញទាន់មិនមានរងរបួសទេ គ្រាន់តែពេលរត់នោះបណ្តាលឲ្យថ្លោះចង្កេះ ។
ក្រោយពេលកើតហេតុ អ្នកលក់បន្លែនៅផ្សារដើមគ និងអ្នកនៅទីនោះរាប់រយនាក់ផ្ទុះកំហឹង នាំគ្នាយកជ្រញ់និងអង្រែបុកគ្រឿងព្រមទាំងកញ្ច្រែងដាក់បន្លែគប់ទៅលើរថយន្តធ្វើឲ្យបែកកញ្ចក់អស់ទាំងស្រុង ។ ភ្លាមៗនោះសមត្ថកិច្ចទៅដល់ បានបើកទ្វារឲ្យយុវជនជាអ្នកបើករថយន្តចេញ និងប្រជាពលរដ្ឋនាំគ្នាវាយមួយអង្រែបុកគ្រឿងនិងមួយជ្រញ់បែកក្បាល មុនពេលសមត្ថកិច្ចនាំទៅដល់ប៉ុស្តិ៍នគរបាលទួលស្វាយព្រៃទី២ ។
ក្រោយពេលកើតហេតុ អ្នកបើកបររថយន្តខាងលើត្រូវបានសាច់ញាតិដឹកយកទៅសង្គ្រោះនៅឯមន្ទីរពេទ្យកាល់ម៉ែត ។ ចំណែកឯរថយន្តនិងរទេះលក់ម្ជូរ ត្រូវបានសមត្ថកិច្ចជំនាញចុះធ្វើការវាស់វែង និងយកទៅរក្សាទុកនៅការិយាល័យនគរបាលចរាចរណ៍ផ្លូវគោក ដើម្បីរង់ចាំធ្វើការដោះស្រាយនៅពេលក្រោយ ៕
ចែករំលែកព័តមាននេះ