មនុស្សប្រុសស្រី១៣៨នាក់ សមត្ថកិច្ចបង្រ្កាបនៅក្លឹបកម្សាន្តML កំពុងសួរយកចម្លើយ
- ភ្នំពេញ
រាជធានីភ្នំពេញ ៖ គិតមកដល់ល្ងាចថ្ងៃទី០១ ខែតុលា ឆ្នាំ២០ ២២ នេះមនុស្ស ១៣៨នាក់ ដែលកម្លាំងសមត្ថកិច្ចចម្រុះបានចុះបង្ក្រាបនៅក្លឹបកម្សាន្ត ML…
រាជធានីភ្នំពេញ ៖ គិតមកដល់ល្ងាចថ្ងៃទី០១ ខែតុលា ឆ្នាំ២០ ២២ នេះមនុស្ស ១៣៨នាក់ ដែលកម្លាំងសមត្ថកិច្ចចម្រុះបានចុះបង្ក្រាបនៅក្លឹបកម្សាន្ត ML ស្ថិតក្នុងទឹកដីខណ្ឌចំការមន កំពុងស្ថិតក្នុងការសួរយកចម្លើយពីសំណាក់នគរបាលការិយាល័យជំនាញប្រឆាំងបទល្មើសគ្រឿងញៀននៃស្នងការដ្ឋាននគរបាលរាជធានីភ្នំពេញ។
តាមប្រភពព័ត៌មានបង្ហើបឲ្យដឹងថា មនុស្ស១៣៨នាក់ ក្នុងនោះមានប្រុស៨០នាក់ ស្រី៥៨នាក់ ៖ .ខ្មែរ២២នាក់ (ដោយសារសុខភាព បញ្ជូនទៅពេទ្យ៤នាក់) ជនជាតិថៃម្នាក់ ជនជាតិភូមាម្នាក់ ចិន៥២ នាក់។ ក្នុងនោះស្រី៥៨នាក់ ចិន២៣នាក់ ខ្មែរ២១នាក់ វៀតណាម១៤ នាក់។
សូមបញ្ជាក់ថា កាលពីវេលាម៉ោង១រំលងអធ្រាត្រឈានចូលថ្ងៃទី០១ ខែតុលា ឆ្នាំ២០២២ ដោយអនុវត្តតាមអនុសាសន៍របស់ថ្នាក់ដឹកនាំ ក្នុងការបង្ក្រាបទប់ស្កាត់ពាក់ព័ន្ធល្បែងស៊ីសងគ្រឿងញៀន និងការប្រើប្រាស់អាវុ.ធខុសច្បាប់ ត្រូវបានសមត្ថកិច្ចនៃស្នងការដ្ឋាននគរបាលរាជធានីភ្នំពេញបានធ្វើការឃាត់ខ្លួនមនុស្សជាង១០០នាក់ ក្នុងប្រតិបត្តិការបង្ក្រាបក្លឹបកម្សាន្តមួយកន្លែងស្ថិតនៅក្លឹបកម្សាន្ត ML មានទីតាំងតាមបណ្តោយផ្លូវប្រឡាយលូ១០៥ ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ។
ព័ត៌មានបឋមលោក សាន សុខសីហា អ្នកនាំពាក្យនៃស្នងការដ្ឋាននគរបាលរាជធានីភ្នំពេញបានថ្លែងប្រាប់បណ្តាញសារព័ត៌មានថា ពិតជាមានករណីបង្ក្រាបក្លឹប ML ប្រាកដមែនដោយអនុវត្តតាមបទបញ្ជា និងការណែនាំរបស់លោកឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញដែលបានប្រើប្រាស់កម្លាំងសមត្តកិច្ចនគរបាលការិយាល័យប្រឆាំងគ្រឿងញៀ.នសហការជាមួយនគរបាលព្រហ្មទណ្ឌកម្រិតស្រាល និងការិយាល័យនគរបាលអន្តរាគមន៍នៃស្នងការដ្ឋាននគរបាលរាជធានីភ្នំពេញបានចុះបង្ក្រាប និងឃាត់ខ្លួនមនុស្សជាង១០០នាក់ ដោយកំពុងអនុវត្តតាមនីតិវិធី។
អ្នកនាំពាក្យបានបញ្ជាក់ទៀតថា ការបង្ក្រាបក្លឹបកម្សានML នេះមនុស្សមួយចំនួនអាចមានពាក់ព័ន្ធការលេងល្បែងស៊ីសងខុសច្បាប់ប្រើប្រាស់នូវសារធាតុញៀន និងមានករណីប្រើប្រាស់អាវុធខុសច្បាប់ថែមទៀត ដែលសមត្ថកិច្ចជំនាញកំពុងបើកការសាកសួរ។
សូមរម្លឹកថា ចាប់តាំងពីសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជាដាក់ចេញនូវវិធានការយ៉ាងម៉ឺងម៉ាត់ឱ្យមន្ដ្រីថ្នាក់ក្រោមជាតិចូលរួមបង្ក្រាបទប់ស្កាត់រាល់បទល្មើស ល្បែងស៊ីសងគ្រឿងញៀន និងអំពើអបាយមុខផ្សេងៗរួចមកបានសង្កេតឃើញថា អាជ្ញាធរគ្រប់បណ្ដារាជធានីខេត្ត សស្រាក់សស្រាំ រៀបចំកម្លាងចេញបង្ក្រាបទីតាំងបនល្បែងខុសច្បាប់គ្រប់ប្រភេទរហូតមានការចាប់ខ្លួនមនុស្សប្រុសស្រីរាប់សិបនាក់ បញ្ជូនទៅតុលាការ និងមានឃុំខ្លួន ដោយមិនលើកលែង។
ដូច្នេះពេលនេះមនុស្សប្រមាណ១៣៨នាក់ ដែលបង្ក្រាបដោយកម្លាំងសមត្តកិច្ចនៃស្នងការដ្ឋាននគរបាលរាជធានីភ្នំពេញប្រឈមជាប់ពន្ធនាគារបន្តទៀត ។ ព័ត៌មានលម្អិតនឹងមានផ្សាយលើកាសែតកោះសន្តិភាព៕
ចែករំលែកព័តមាននេះ