រាជធានីភ្នំពេញ ៖ រថយន្តម៉ាកប្រាដូមួយគ្រឿង បើកបរដោយស្ត្រីម្នាក់ក្នុងល្បឿនលឿនបានបែកកង់ហើយហោះឡើងសួនច្បារផ្លូវជាតិលេខ៦ ទៅបុករថយន្តម៉ាកឡង់គ្រីស្ស័រ ដែលធ្វើដំណើរលើចំណែកផ្លូវម្ខាងទៀត បណ្តាលឱ្យខូចខាតមួយចំហៀងខាងឆ្វេងហើយជ្រុលទៅប៉ះជាមួយរ៉ឺម៉កកង់បីដឹកស្រាបៀរធ្លាក់រាយពេញផ្លូវ
រាជធានីភ្នំពេញ ៖ រថយន្តម៉ាកប្រាដូមួយគ្រឿង បើកបរដោយស្ត្រីម្នាក់ក្នុងល្បឿនលឿនបានបែកកង់ហើយហោះឡើងសួនច្បារផ្លូវជាតិលេខ៦ ទៅបុករថយន្តម៉ាកឡង់គ្រីស្ស័រ ដែលធ្វើដំណើរលើចំណែកផ្លូវម្ខាងទៀត បណ្តាលឱ្យខូចខាតមួយចំហៀងខាងឆ្វេងហើយជ្រុលទៅប៉ះជាមួយរ៉ឺម៉កកង់បីដឹកស្រាបៀរធ្លាក់រាយពេញផ្លូវ និងបង្កឱ្យមនុស្ស២នាក់បានរងរបួសស្រាល ។ ហេតុការណ៍គ្រោះថ្នាក់ចរាចរណ៍នេះកើតឡើងកាលពីវេលាម៉ោង១១និង១០នាទីព្រឹក ថ្ងៃទី៧ មីនា ដែលស្ថិតនៅតាមបណ្តោយផ្លូវជាតិលេខ៦ ចំណុចមុខផ្សារព្រែកលាប ក្នុងសង្កាត់ព្រែកលាប ខណ្ឌជ្រោយចង្វារ ។
រថយន្តដែលបង្កគ្រោះថ្នាក់ម៉ាកប្រាដូ ពណ៌ប្រផេះ ពាក់ស្លាកលេខ ភ្នំពេញ 2F-1122 បើកបរដោយស្ត្រីម្នាក់ពុំស្គាល់អត្តសញ្ញាណឡើង ។ ចំណកម៉ាកឡង់គ្រីស្ស័រ ពណ៌ខ្មៅ ពាក់ស្លាកលេខ ភ្នំពេញ 2N-9839 បើកដោយឈ្មោះ ស្វាយ សុខឃឿន ភេទប្រុស អាយុ ៣៥ឆ្នាំ មានទីលំនៅភូមិព្រែកអញ្ចាញ ឃុំព្រែកអញ្ចាញ ស្រុកមុខកំពូល ខេត្តកណ្តាល ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តប្រាដូខាងលើធ្វើដំណើរតាមផ្លូវជាតិលេខ៦ ក្នុងទិសដៅពីជើងទៅត្បូងចូលរាជធានីភ្នំពេញក្នុងល្បឿនលឿន ។ នៅពេលមកដល់កន្លែងកើតហេតុ ស្រាប់់តែបែកកង់មុខផ្នែកខាងឆ្វេងបណ្តាលឱ្យរ៉េចង្កូតមកខាងឆ្វេង និងហោះរំលងសួនច្បារពុះចែកទ្រូងផ្លូវជ្រុលទៅបុករថយន្តម៉ាកឡង់គ្រីស្ស័របណ្តាលឱ្យរងការខូចខាតចំហៀងខាងឆ្វេង និងជ្រុលទៅប៉ះម៉ូតូកង់៣ដឹកភេសជ្ជះ (មានទឹកគ្រូច និងស្រាបៀរ) ពេញទំហឹងបណ្តាលឱ្យធ្លាក់រាយប៉ាយពេញផ្លូវ និងបណ្តាលឱ្យអ្នកជិះម៉ូតូកង់បី២នាក់បានរងរបួស ។ បន្ទាប់ពីគ្រោះថ្នាក់នគរបាលបានចុះទៅវាសវែងរួចស្ទូចបញ្ជូនទៅកាន់ការិយាល័យរាចរណ៍ផ្លូវគោកដើម្បីដោះស្រាយ ៕
ចែករំលែកព័តមាននេះ