បន្ទាប់ពីការហាមឃាត់ដោយក្រុងព្យុងយ៉ាងជនជាតិម៉ាឡេស៊ីទាំងអស់មិនឱ្យចាកចេញដោយសារជម្លោះការទូតជាមួយកូរ៉េខាងជើង នាយករដ្ឋមន្ត្រីម៉ាឡេស៊ី លោកណាជីប រ៉ាហ្សាក់ អះអាងកាលពីថ្ងៃទី៧ មីនា ថា
បន្ទាប់ពីការហាមឃាត់ដោយក្រុងព្យុងយ៉ាងជនជាតិម៉ាឡេស៊ីទាំងអស់មិនឱ្យចាកចេញដោយសារជម្លោះការទូតជាមួយកូរ៉េខាងជើង នាយករដ្ឋមន្ត្រីម៉ាឡេស៊ី លោកណាជីប រ៉ាហ្សាក់ អះអាងកាលពីថ្ងៃទី៧ មីនា ថា បណ្តាជនជាតិម៉ាឡេស៊ីគឺជាចំណាប់ខ្មាំងនៅកូរ៉េខាងជើង ។
ខណៈភាពតានតឹងកើនខ្លាំងរវាងប្រទេសទាំង២ ក្រោយការធ្វើឃាតនាខែកុម្ភៈ លោកគីម ជុងណាម បងប្រុសម្តាយទីទៃរបស់លោកគីម ជុងអ៊ុន នៅទីក្រុងគូឡាឡាំពួរកាលពីខែកុម្ភៈ ក្នុងសេចក្តីប្រកាសមួយលោករ៉ាហ្សាក់ ថ្លែងថា នេះជាអំពើគួរឱ្យស្អប់ខ្ពើមមួយដែលយកជនជាតិរបស់យើងធ្វើជាចំណាប់ខ្មាំង ដោយមើលស្រាលចំពោះរាល់ច្បាប់អន្តរជាតិ និងបណ្តាបទដ្ឋានខាងការទូត ។
ជាការតបតវិញ ប្រទេសម៉ាឡេស៊ីបានហាមឃាត់បណ្តាជនជាតិកូរ៉េខាងជើងមិនឱ្យចាកចេញពីដែនដីរបស់ខ្លួនដែរ ។
ប្រមុខប៉ូលិសម៉ាឡេស៊ីប្រកាសមុននេះបន្តិចថា ជនជាតិកូរ៉េខាងជើង២ ឬ៣នាក់លាក់ខ្លួននៅក្នុងស្ថានទូតកូរ៉េខាងជើងប្រចាំក្រុងគូឡាឡាំពួរ ។
ម៉ាឡេស៊ីកំណត់អត្តសញ្ញាណជនជាតិកូរ៉េខាជើង៨នាក់ ដែលតាមរកចាប់ខ្លួនក្នុងក្របខណ្ឌនៃការស៊ើបអង្កេត ក្នុងនោះមានអ្នកការទូតជាន់ខ្ពស់ម្នាក់របស់ប្រទេសនេះ ហើយចោទប្រកាន់អាជ្ញាធរក្រុងព្យុងយ៉ាងថា បដិសេធមិនរួមសហការជាមួយការស្រាវជ្រាវ ។
ប្រទេសកូរ៉េខាងជើងបានឆ្លើយតបវិញ ចំពោះការចោទប្រកាន់របស់ម៉ាឡេស៊ី ដោយហាមឃាត់បណ្តោះអាសន្នមិនឱ្យបណ្តាជនជាតិម៉ាឡេស៊ីចាកចេញពីដែនដីខ្លួន ដើម្បីធានាដល់សន្តិសុខរបស់បណ្តាជនជាតិ និងពួកអ្នកការទូតខ្លួននៅម៉ាឡេស៊ី ។ នេះជាការអះអាងរបស់ទីភ្នាក់ងារព័ត៌មានកូរ៉េខាងជើង KCNA ។ តាម KCNA ថា វិធានការនេះនឹងមានជាធរមានរហូតដល់ឧប្បត្តិហេតុដែលកើតមាននៅម៉ាឡេស៊ី ត្រូវបានដោះស្រាយដោយត្រឹមត្រូវ ។
នាយករដ្ឋមន្ត្រីម៉ាឡេស៊ីចេញបញ្ជាដល់ប៉ូលិសឱ្យរារាំងជនជាតិកូរ៉េខាងជើង មិនឱ្យចាកចេញពីប្រទេសរហូតដល់សន្តិសុខជនជាតិម៉ាឡេស៊ីនៅកូរ៉េខាងជើងត្រូវបានធានា រួចរូបលោកបានធ្វើការកោះប្រជុំបន្ទាន់មួយនៃក្រុមប្រឹក្សាសន្តិសុខជាតិ ៕
ចែករំលែកព័តមាននេះ