ខេត្តកណ្តាល ៖ រថយន្តហ៊ីយ៉ាន់ដាយដឹកទំនិញមួយគ្រឿងបានបើកបុកម៉ូតូមួយគ្រឿងទាំងកំរាលពេញទំហឹងក្នុងទិសដៅបញ្ជ្រាស់គ្នា បណ្តាលឲ្យស្ត្រីកម្មការនីរោងចក្រកាត់ដេរ២នាក់ស្លាប់បាត់បង់ជីវិតក្រោយពេលក្រុមគ្រួសារដឹកបញ្ជូនទៅមន្ទីរពេទ្យដល់ពាក់កណ្តាលផ្លូវ
ខេត្តកណ្តាល ៖ រថយន្តហ៊ីយ៉ាន់ដាយដឹកទំនិញមួយគ្រឿងបានបើកបុកម៉ូតូមួយគ្រឿងទាំងកំរាលពេញទំហឹងក្នុងទិសដៅបញ្ជ្រាស់គ្នា បណ្តាលឲ្យស្ត្រីកម្មការនីរោងចក្រកាត់ដេរ២នាក់ស្លាប់បាត់បង់ជីវិតក្រោយពេលក្រុមគ្រួសារដឹកបញ្ជូនទៅមន្ទីរពេទ្យដល់ពាក់កណ្តាលផ្លូវ ។ ហេតុការណ៍គ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៤និង១០នាទីទៀបភ្លឺឈានចូលថ្ងៃទី៧ មីនា នៅលើកំណាត់ផ្លូវជាតិលេខ១ ត្រង់ចំណុចចន្លោះគីឡូម៉ែត្រលេខ៤៤និង៤៥ ស្ថិតក្នុងភូមិព្រែកត្រែង ឃុំសំរោងធំ ស្រុកកៀនស្វាយ ។
ស្ត្រីរងគ្រោះទាំង២នាក់ទី១-ឈ្មោះ ហេង ផល្លា អាយុ២៤ឆ្នាំ ជាកម្មការនីរោងចក្រកាត់ដេរសួនឧស្សាហកម្មសំរោងធំមានទីលំនៅភូមិរាំងដេក ឃុំគគីរធំ ស្រុកកៀនស្វាយ និងម្នាក់ទៀតឈ្មោះ ឌី ដានី អាយុប្រហាក់ប្រហែលគ្នា ជាកម្មការនីរោងចក្រកាត់ជាមួយគ្នាមានទីលំនៅភូមិសំរោងក្អែរ ឃុំសំរោងធំ ស្រុកកៀនស្វាយ ជិះម៉ូតូម៉ាកគុបជ្រុង ពណ៌ខៀវគ្មានស្លាកលេខបានដាច់ខ្យល់ស្លាប់ពាក់កណ្តាលផ្លូវទាំង២នាក់ក្រោយពេលក្រុមគ្រួសារដឹកយកទៅមន្ទីរពេទ្យ ។
ចំណែករថយន្តបង្កម៉ាក HYUNDAI ប្រភេទដឹកទំនិញពណ៌សពាក់ស្លាកលេខ ភ្នំពេញ3D-0397អ្នកបើកបរមិនស្គាល់អត្តសញ្ញាណបានរត់គេចខ្លួនបាត់មុនពេលសមត្ថកិច្ចចុះទៅដល់ ។ ប្រភពនិយាយថា មុនពេលកើតហេតុស្ត្រីរងគ្រោះទាំង២នាក់បានជិះម៉ូតូឌុបគ្នាចេញពីធ្វើការវេណយប់នៅរោងចក្រខាងលើក្នុងទិសដៅភ្នំពេញ-អ្នកលឿងគោលបំណងទៅផ្ទះ ។ លុះជិះម៉ូតូឌុបគ្នាចេញពីរោងចក្របានប្រហែលជិតមួយគីឡូដីក៏ត្រូវរថយន្តបង្កបើកបរក្នុងទិសដៅបញ្ជ្រាស់គ្នាពីអ្នកលឿងទៅភ្នំពេញប្រហែលជាអ្នកបើកបររថយន្តងោគបានរ៉េចង្កូចមកបុកម៉ូតូជនរងគ្រោះដែលកំពុងបើកបរខាងស្តាំដៃទាំងកំរាលពេញទំហឹងបណ្តាលឲ្យរងរបួសធ្ងន់ទាំង២នាក់ត្រូវក្រុមគ្រួសារដឹកយកទៅសង្គ្រោះនៅមន្ទីរពេទ្យរាជធានីភ្នំពេញ ។
បន្ទាប់មកសមត្ថកិច្ចទទួលបានព័ត៌មានថា ជនរងគ្រោះទាំង២នាក់ដោយម្នាក់ឮថាមានផ្ទៃពោះ ផងបានដាច់ខ្យល់ស្លាប់តាមផ្លូវទាំង២នាក់ ។ ក្រោយកើតហេតុនគរបាលជំនាញសហការជាមួយនគរបាលប៉ុស្តិ៍ចុះអន្តរាគមន៍ និងធ្វើការវាស់វែងចាត់ការតាមនីតិវិធី ៕
ចែករំលែកព័តមាននេះ