សម្តេចតេជោ ហ៊ុន សែន ព្រមានបញ្ចេញសារទាក់ទងគ្នាទាំងអស់ប្រឆាំងអ្នកហួចហៅខ្យល់
រាជធានីភ្នំពេញ ៖ ទោះបីជាសម្តេចតេជោ ហ៊ុន សែន បានប្រកាសព្រមានថានឹងទម្លាយសំឡេងទាំងអស់ ប្រសិនបើគណបក្សសង្គ្រោះជាតិមិនទទួលស្គាល់សំឡេងដែល
រាជធានីភ្នំពេញ ៖ ទោះបីជាសម្តេចតេជោ ហ៊ុន សែន បានប្រកាសព្រមានថានឹងទម្លាយសំឡេងទាំងអស់ ប្រសិនបើគណបក្សសង្គ្រោះជាតិមិនទទួលស្គាល់សំឡេងដែល
រាជធានីភ្នំពេញ ៖ ទោះបីជាសម្តេចតេជោ ហ៊ុន សែន បានប្រកាសព្រមានថានឹងទម្លាយសំឡេងទាំងអស់ ប្រសិនបើគណបក្សសង្គ្រោះជាតិមិនទទួលស្គាល់សំឡេងដែលបែកធ្លាយក្នុងជំនួបពិភាក្សាតាមទូរស័ព្ទយ៉ាងណាក្តី ក៏លោក កឹម សុខា ប្រធានគណបក្សសង្គ្រោះជាតិបានសម្តែងការមិនចាប់អាម្មរណ៍នោះឡើយ ។
លោក កឹម សុខា នៅថ្ងៃទី៦ មីនា ក្នុងជំនួបសួរសុខទុក្ខប្រជាពលរដ្ឋនៅខេត្តកណ្ដាលបានបញ្ជាក់ថា៖ «យើងជាថ្នាក់ដឹកនាំគណបក្សសង្គ្រោះជាតិគ្រប់លំដាប់ថ្នាក់ ស្គាល់ខ្លួនឯងច្បាស់ណាស់ថា យើងកើតចេញមកពីណា បច្ចុប្បន្នកំពុងស្ថិតក្នុងស្ថានភាពណា ហើយយើងធ្វើដំណើរទៅណា និងដើម្បីអ្វី» ។ លោក កឹម សុខា បានលើកឡើងបញ្ជាក់តាមបណ្តាញសង្គមហ្វេសប៊ុក ដោយមិនចាប់អារម្មណ៍នឹងការព្រមានរបស់ប្រមុខរាជរដ្ឋាភិបាលថានឹងទម្លាយខ្សែអាត់សំឡេងនោះទេ ។ លោកថា យើងបន្ដដំណើររួមគ្នាទៅមុខជានិច្ច អ្វីៗទុកជូនប្រជាពលរដ្ឋខ្មែរជាអ្នកវិនិច្ឆ័យចុះ អ្នកណាត្រូវ អ្នកណាខុស ។
ខ្ញុំយល់ឃើញថា បច្ចុប្បន្ននេះប្រជាពលរដ្ឋខ្មែរបានតាមដានស្ថានភាពនយោបាយដោយយកចិត្តទុកដាក់ មានភាពវៃឆ្លាត និងយល់ដឹងច្រើនហើយ ។ លោក កឹម សុខា បានលើកឡើងទៀតថា គណបក្សសង្គ្រោះជាតិ កើតឡើងពីការរួបរួមគ្នា ។ អ្វីៗយើងតែងតែរួមគ្នាគិត រួមគ្នាធ្វើ រួមគ្នាសម្រេច ដើម្បីផលប្រយោជន៍រួមសម្រាប់ប្រទេសជាតិ និងប្រជាពលរដ្ឋខ្មែរយើង ។
នៅថ្ងៃទី៦ មីនានេះដែរ សម្តេចតេជោ ហ៊ុន សែន បានថ្លែងព្រមានទម្លាយសារឆ្លើយឆ្លងទាំងអស់ជាមួយថ្នាក់ដឹកនាំគណបក្សសង្គ្រោះជាតិ ប្រសិនបើថ្នាក់ដឹកនាំគណបក្សប្រឆាំងនៅកម្ពុជាមួយនេះ នៅតែផ្គើនមិនទទួលស្គាល់សារសំឡេងសន្ទនារវាងសម្តេច និងលោក កឹម សុខា ដែលបានបែកធ្លាយកាលពីសប្តាហ៍មុន ។
ការព្រមានទម្លាយសារឆ្លើយឆ្លងជាមួយថ្នាក់ដឹកនាំគណបក្សសង្គ្រោះជាតិ បានធើឡើងក្នុងពេលសម្តេចតេជោ ហ៊ុន សែន នាយករដ្ឋមន្ត្រី នៃកម្ពុជា អញ្ជើញជាអធិបតីភាពបើកការដ្ឋានសាងសង់ផ្លូវក្រវាត់ក្រុងខ្សែទី២ កំណាត់ទី២ នឹងបើកសម្ពោធដាក់ឲ្យប្រើប្រាស់ផ្លូវក្រវាត់ក្រុងខ្សែទី២ កំណាត់ទី១ ។
សម្តេចតេជោ ហ៊ុន សែន បានព្រមានដោយបានបញ្ជាក់ថា៖ «អ្នកឯងចង់សាកហេ ! បើចង់សាកខ្ញុំទម្លាយចេញទាំងអស់ ។ តាំងពីក្នុង WhatApp SMS តិចអ្នកឯងថា ខ្ញុំជាមនុស្សមិនបានការ ។ គ្រាន់តែឯកសារស្តុក ដែលអ្នកឯង SMS មកខ្ញុំ អ្នកឯង Whatapp មកខ្ញុំ អ្នកឯង Telegram មកខ្ញុំ អ្នកឯង Line មកខ្ញុំគគោក ។ អ្នកឯងចង់ឲ្យខ្ញុំបញ្ចេញ ខ្ញុំនឹងបញ្ចេញឲ្យអ្នកឯងមើលទាំងអស់ ។ នៅស្រុកខ្មែរមាននរណាជេរ ហ៊ុន សែន ថា អាយ៉ង ក៏ប៉ុន្តែមកធ្វើជាអាយ៉ងរបស់ហ៊ុន សែន» ។
សូមបញ្ជាក់ថា កាលពីថ្ងៃទី៤ ខែមីនា ឆ្នាំ២០១៧ Facebook ឈ្មោះ «សីហា» បានទម្លាយសារឆ្លើយឆ្លងតាមទូរស័ព្ទមួយរវាងសម្តេចតេជោ ហ៊ុន សែន និងលោក កឹម សុខា ប្រធានគណបក្សសង្គ្រោះជាតិ ។ ក្នុងសារសំឡេងនោះ សម្តេចតេជោ ហ៊ុន សែន និងលោក កឹម សុខា បានពិភាក្សាគ្នាពីការរកច្រកឲ្យលោក កឹម សុខា បានរួចផុតពីទោសទណ្ឌ ជាពិសេសផែនការជួយឲ្យលោក កឹម សុខា ដណ្តើមបានតំណែងប្រធានគណបក្សសង្គ្រោះជាតិពីលោក សម រង្ស៊ី ផងដែរ ។
ក្នុងសារសន្ទនាបែកធ្លាយនោះ សម្តេចតេជោ ហ៊ុន សែន ក៏បានបញ្ជាក់ពីការខឹងសម្បាខ្លាំងជាមួយលោក សម រង្ស៊ី ដែលបានចោទប្រកាន់ភរិយា និងកូនរបស់សម្តេចថាជាកូនរបស់មេដឹកនាំវៀតណាម ឡេ ឌឹកថូ ។ ត្រង់ចំណុចនេះ ត្រូវបានលោក កឹម សុខា បន្ទរតបបង្ហាញការមិនពេញចិត្តជាមួយលោក សម រង្ស៊ី ផងដែរ ។
សារដែលបានបែកធ្លាយនេះ មិនមានការចេញបដិសេធ ឬប្រតិកម្មណាមួយពីលោក កឹម សុខា ប្រធានគណបក្សសង្គ្រោះជាតិនោះទេ តែលោក សម រង្ស៊ី ប្រមុខបក្សប្រឆាំងទើបបាត់បង់តំណែង បានចេញមកថ្លែងអំពាវនាវឲ្យសាធារណជន កុំចាប់អាម្មណ៍ទៅលើសារសំឡេងនោះ ។ លោក សម រង្ស៊ី បានហៅសំឡេងសន្ទនាបែកធ្លាយនោះថា ជាសំឡេងកាត់ត និងប្រឌិតឡើងក្នុងបំណងបំបែកគណបក្សសង្គ្រោះជាតិ ។
លោក សម រង្ស៊ី អតីតប្រធានគណបក្សប្រឆាំងបានសរសេរលើបណ្តាញសង្គមបញ្ជាក់ថា «សូមបងប្អូន កូនក្មួយ កុំឲ្យតម្លៃទៅលើឯកសារជាលាយលក្ខណ៍អក្សរ ឬជាសំឡេង ដែលគេប្រឌិត ឬកាត់តយកមកផ្សព្វផ្សាយក្រៅបរិបទរបស់វា ហើយក៏កុំជឿការបកស្រាយអកុសល និងការញុះញង់ទាំងឡាយ ដែលធ្វើឡើងក្នុងគោលបំណងប៉ុនប៉ងបំបែកបំបាក់ផ្ទៃក្នុងគណបក្សសង្គ្រោះជាតិ» ។
លោក សម រង្ស៊ី បានបន្ថែមថា តាមការពិត គណបក្សសង្គ្រោះជាតិ នៅតែរឹងមាំដដែល ពីព្រោះអ្នកស្នេហាជាតិ និងអ្នកស្រលាញ់យុត្តិធម៌ទាំងអស់យល់ច្បាស់ថា ឯកភាពជាលក្ខខណ្ឌចាំបាច់ ដើម្បីសង្គ្រោះជាតិយើងទាំងអស់គ្នា ។ គ្រប់កាលៈទេសៈ ទោះជាមានតំណែងជាប្រធាន ឬគ្មានតំណែងអ្វីក្នុងបក្សក៏ដោយ លោក កឹម សុខា និងរូបខ្ញុំ សម រង្ស៊ី នៅតែជាមនុស្សតែមួយ គឺជាដៃគូស្លាប់រស់ដើម្បីសង្គ្រោះជាតិយើង ។
អ្នកតាមដាននយោបាយបានធ្វើការកត់សម្គាល់ថា ពេលនេះគេសង្កេតឃើញថាស្ថានការនយោបាយកំពុងតែឡើងកម្តៅខ្លាំង ពិសេសនោះរវាងគណបក្សដែលមានអាសនៈក្នុងរដ្ឋសភា បាននិងកំពុងតែធ្វើឲ្យសាធារណជនតាមដានយ៉ាងយកចិត្តដាក់ ខណៈពេលការបោះឆ្នោតជ្រើសរើសក្រុមប្រឹក្សាឃុំ សង្កាត់នឹងឈានមកដល់នៅថ្ងៃទី៤ មិថុនា ឆ្នាំ២០១៧ខាងមុខនេះ ៕
ចែករំលែកព័តមាននេះ