ជនជាតិចិនធ្វើផ្លូវម្នាក់ស្លាប់យ៉ាងអាណោចអាធម្ម ដោយរ៉ូឡូថយក្រោយកិនចំ
ខេត្តកំពង់ធំ ៖ ករណីគ្រោះថ្នាក់ចរាចរណ៍មួយបានកើតឡើងនៅរសៀលថ្ងៃទី០៦ ខែមីនា ឆ្នាំ២០១៧ ស្ថិតលើផ្លូវជាតិលេខ០៦ ក្នុងភូមិត្រពាំងស្វាយ ឃុំបល្ល័ង្ក ស្រុកបារាយណ៍
ខេត្តកំពង់ធំ ៖ ករណីគ្រោះថ្នាក់ចរាចរណ៍មួយបានកើតឡើងនៅរសៀលថ្ងៃទី០៦ ខែមីនា ឆ្នាំ២០១៧ ស្ថិតលើផ្លូវជាតិលេខ០៦ ក្នុងភូមិត្រពាំងស្វាយ ឃុំបល្ល័ង្ក ស្រុកបារាយណ៍ ខេត្តកំពង់ធំ បណ្ដាលឲ្យជនជាតិចិនម្នាក់ស្លាប់យ៉ាងអាណោចអាធម្ម។ លោកវរៈសេនីយ៍ត្រី សន តាល់ អធិការរងនគរបាលស្រុកបារាយណ៍ទទួលបន្ទុកចរាចរណ៍បានប្រាប់ថា ជនរងគ្រោះនៅក្នុងករណីគ្រោះថ្នាក់ចរាចរណ៍ខាងលើឈ្មោះ រិន រ៉ៃមីន ភេទប្រុស អាយុ២៦ឆ្នាំ ជនជាតិចិនធ្វើផ្លូវ ស្នាក់នៅភូមិកំពង់ថ្ម ឃុំកំពង់ថ្ម ស្រុកសន្ទុក ត្រូវបានស្លាប់យ៉ាងអាណោចអាធម្មនៅក្រោមទម្ងន់កង់រ៉ូឡូធ្វើផ្លូវ ខណៈដែលកំពុងបំពេញការងារ ហើយត្រូវបានអ្នកបើករ៉ូឡូថយក្រោយខ្វះការប្រុងប្រយ័ត្នបានកិនជនរងគ្រោះបណ្តាលឲ្យស្លាប់នៅនឹងកន្លែង។
បន្ទាប់ពីកើតហេតុរួច អ្នកបើកបររ៉ូឡូត្រូវបានសមត្ថកិច្ចឃាត់ខ្លួននាំមកកាន់អធិការស្រុក ហើយជនសង្ស័យជាអ្នកបើករូឡូឈ្មោះ សុខ ឆន ភេទប្រុស អាយុ២៣ឆ្នាំ មានទីលំនៅភូមិវាលមាស ឃុំសំរ៉ុង ស្រុកព្រៃនប់ ខេត្តព្រះសីហនុ។ ទាំងជនបង្ក និងជនរងគ្រោះ បច្ចុប្បន្នមកធ្វើកម្មករធ្វើថ្នល់ជាមួយគ្នា។ សមត្ថកិច្ចបញ្ជាក់ថា ករណីគ្រោះថ្នាក់ចរាចរណ៍ខាងលើនេះ បណ្តាលមកពីអ្នកបើករ៉ូឡូថយក្រោយ ដោយខ្វះការប្រុងប្រយ័ត្ន គួបផ្សំជាមួយជនរងគ្រោះឈរខ្វះការប្រុងប្រយ័ត្នដូចគ្នា ដែលធ្វើឲ្យគ្រោះថ្នាក់កើតមានឡើង៕
ចែករំលែកព័តមាននេះ