លោកកឹម សុខា ហាក់មិនចាប់អារម្មណ៍នឹងការព្រមានរបស់សម្តេចតេជោ
រាជធានីភ្នំពេញ ៖ ទោះបីជាសម្តេចតេជោ ហ៊ុន សែន បានប្រកាសព្រមានថានឹងទម្លាយសម្លេងទាំងអស់ ប្រសិនបើគណបក្សសង្គ្រោះជាតិមិនទទួលស្គាល់សំឡេងដែល
រាជធានីភ្នំពេញ ៖ ទោះបីជាសម្តេចតេជោ ហ៊ុន សែន បានប្រកាសព្រមានថានឹងទម្លាយសម្លេងទាំងអស់ ប្រសិនបើគណបក្សសង្គ្រោះជាតិមិនទទួលស្គាល់សំឡេងដែល
រាជធានីភ្នំពេញ ៖ ទោះបីជាសម្តេចតេជោ ហ៊ុន សែន បានប្រកាសព្រមានថានឹងទម្លាយសម្លេងទាំងអស់ ប្រសិនបើគណបក្សសង្គ្រោះជាតិមិនទទួលស្គាល់សំឡេងដែលបែកធ្លាយក្នុងជំនួបពិភាក្សាតាមទូរស័ព្ទយ៉ាងណាក្តី លោក កឹម សុខា ប្រធានគណបក្សសង្គ្រោះជាតិហាក់សម្តែងការមិនចាប់អាម្មរណ៍នោះទេ ។
នៅក្នុងជំនួបសួរសុខទុក្ខប្រជាពលរដ្ឋនៅខេត្តកណ្ដាល នាព្រឹកថ្ងៃទី០៦ មិនា ២០១៧ លោកកឹម សុខា បានបញ្ជាក់ថា«យើងជាថ្នាក់ដឹកនាំគណបក្សសង្គ្រោះជាតិគ្រប់លំដាប់ថ្នាក់ ស្គាល់ខ្លួនឯងច្បាស់ណាស់ថា “យើងកើតចេញមកពីណា បច្ចុប្បន្នកំពុងស្ថិតក្នុងស្ថានភាពណា ហើយយើងធ្វើដំណើរទៅណា និងដើម្បីអ្វី?”។
នៅលើបណ្តាញសង្គមហ្វេសប៊ុក លោកកឹម សុខា បានបន្តថា ៖ « យើងបន្ដដំណើររួមគ្នាទៅមុខជានិច្ច អ្វីៗទុកជូនប្រជាពលរដ្ឋខ្មែរជាអ្នកវិនិច្ឆ័យចុះ អ្នកណាត្រូវ អ្នកណាខុស?។ ខ្ញុំយល់ឃើញថា បច្ចុប្បន្ននេះ ប្រជាពលរដ្ឋខ្មែរបានតាមដានស្ថានភាពនយោបាយដោយយកចិត្តទុកដាក់ មានភាពវៃឆ្លាត និងយល់ដឹងច្រើនហើយ»។
មេបក្សប្រឆាំងដែលទើបឡើងកាន់តំណែងផ្លូវការជាប្រធានគណបក្សសង្គ្រោះជាតិជំនួស លោក សម រង្ស៊ី កាលពីសប្តាហ៍មុនបានបញ្ជាក់ថា «គណបក្សសង្គ្រោះជាតិ កើតឡើងពីការរួបរួមគ្នា ។ អ្វីៗយើងតែងតែ រួមគ្នាគិត រួមគ្នាធ្វើ រួមគ្នាសម្រេច ដើម្បីផលប្រយោជន៍រួម សម្រាប់ប្រទេសជាតិ និងប្រជាពលរដ្ឋខ្មែរយើង»។
សូមបញ្ជាក់ថា នៅក្នុងពិធីបើកការដ្ឋានសាងសង់ផ្លូវក្រវាត់ក្រុងខ្សែទី២ កំណាត់ទី២ និងបើកសម្ពោធដាក់ឲ្យប្រើប្រាស់ផ្លូវក្រវាត់ក្រុងខ្សែទី២ កំណាត់ទី១ នៅព្រឹកថ្ងៃទី០៦ មិនានេះ សម្តេចអគ្គមហាសេនាបតីតេជោ ហ៊ុន សែន បានថ្លែងព្រមានថានឹងទម្លាយសារឆ្លើយឆ្លងទាំងអស់ជាមួយថ្នាក់ដឹកនាំគណបក្សសង្គ្រោះជាតិ ប្រសិនបើថ្នាក់ដឹកនាំគណបក្សប្រឆាំងនៅកម្ពុជាមួយនេះ នៅតែផ្គើនមិនទទួលស្គាល់សារសំឡេងសន្ទនារវាងសម្តេច និងលោក កឹម សុខា ដែលបានបែកធ្លាយកាលពីសប្តាហ៍មុននោះ ។
សម្តេចតេជោ ហ៊ុន សែន បានបញ្ជាក់ថា «អ្នកឯងចង់សាកហ្ហេ! បើចង់សាកខ្ញុំទម្លាយចេញទាំងអស់ ។ តាំងពីក្នុង WhatApp SMS តិចអ្នកឯងថា ខ្ញុំជាមនុស្សមិនបានការ ។ គ្រាន់តែឯកសារស្តុក ដែលអ្នកឯង SMS មកខ្ញុំ អ្នកឯង Whatapp មកខ្ញុំ អ្នកឯង Telegram មកខ្ញុំ អ្នកឯង Line មកខ្ញុំ ។ អ្នកឯងចង់ឲ្យខ្ញុំបញ្ចេញ? ខ្ញុំនឹងបញ្ចេញឲ្យអ្នកឯងមើលទាំងអស់ ។ នៅស្រុកខ្មែរមាននរណាជេរ ហ៊ុន សែន ថា អាយ៉ង ក៏ប៉ុន្តែមកធ្វើជា អាយ៉ង របស់ហ៊ុន សែន» ។
គួររំឮកថា កាលពីថ្ងៃ ទី០៤ មីនា ២០១៧ Facebook ឈ្មោះ «សីហា» បានទម្លាយសារឆ្លើយឆ្លងតាមទូរស័ព្ទមួយរវាង សម្តេចតេជោ ហ៊ុន សែន និងលោក កឹម សុខា ប្រធានគណបក្សសង្គ្រោះជាតិ ។ ក្នុងសារសំឡេងនោះ សម្តេចតេជោ ហ៊ុន សែន និង លោក កឹម សុខា បានពិភាក្សាគ្នាពីការរកច្រកឲ្យលោក កឹម សុខា បានរួចផុតពីទោសទណ្ឌ ជាពិសេសផែនការជួយឲ្យលោក កឹម សុខា ដណ្តើមបានតំណែងប្រធានគណបក្សសង្គ្រោះជាតិពីលោក សម រង្ស៊ី ផងដែរ ។
ក្នុងសារសន្ទនាបែកធ្លាយដែលសម្តេចតេជោនាយករដ្ឋមន្ត្រីថាជាសំឡេងពិតប្រាកដនោះ សម្តេចតេជោ ហ៊ុន សែន ក៏បានបញ្ជាក់ពីការខឹងសម្បាខ្លាំងជាមួយលោក សម រង្ស៊ី ដែលបានចោទប្រកាន់ភរិយានិងកូនរបស់សម្តេច ថា ជាកូនរបស់មេដឹកនាំវៀតណាម ឡេ ឌឹកថ ។ ត្រង់ចំណុចនេះ ត្រូវបានលោក កឹម សុខា បន្ទរតបបង្ហាញការមិនពេញចិត្តជាមួយនឹងលោក សម រង្ស៊ី ផងដែរ ។
ការបែកធ្លាយសំឡេងនេះ មិនមានការចេញបដិសេធ ឬ ប្រតិកម្មណាមួយពីលោក កឹម សុខា ប្រធានគណបក្សសង្គ្រោះជាតិនោះទេ តែលោក សម រង្ស៊ី ដែលទើបលាលែងតំណែង បានចេញមកថ្លែងអំពាវនាវឲ្យសាធារណជន កុំចាប់អាម្មណ៍ទៅលើសារសំឡេងនោះ ។ លោក សម រង្ស៊ី បានហៅសំឡេងសន្ទនាបែកធ្លាយនោះថា ជាសំឡេងកាត់ត និងប្រឌិតឡើងក្នុងបំណងបំបែកគណបក្សសង្គ្រោះជាតិ ។
អតីតប្រធានគណបក្សប្រឆាំងរូបនេះ បានសរសេរលើបណ្តាញសង្គមហ្វេសប៊ុគដោយបញ្ជាក់ថា «សូមបងប្អូន កូនក្មួយ កុំឲ្យតម្លៃ ទៅលើឯកសារជាលាយលក្ខណ៍អក្សរ ឬជាសម្លេង ដែលគេប្រឌិត ឬកាត់ត យកមកផ្សព្វផ្សាយ ក្រៅបរិបទរបស់វា ហើយក៏កុំជឿការបកស្រាយអកុសល និងការញុះញង់ទាំងឡាយ ដែលធ្វើឡើងក្នុងគោលបំណងប៉ុនប៉ងបំបែកបំបាក់ផ្ទៃក្នុងគណបក្សសង្គ្រោះជាតិ» ។
លោកសម រង្ស៊ី បន្ថែមថា តាមការពិត គណបក្សសង្គ្រោះជាតិ នៅតែរឹងមាំដដែល ពីព្រោះអ្នកស្នេហាជាតិ និងអ្នកស្រលាញ់យុត្តិធម៌ទាំងអស់ យល់ច្បាស់ថា ការឯកភាពជាលក្ខខណ្ឌចាំបាច់ ដើម្បីសង្គ្រោះជាតិយើងទាំងអស់គ្នា ។ គ្រប់កាលៈទេសៈ ទោះជាមានតំណែងជាប្រធាន ឬគ្មានតំណែងអ្វីក្នុងបក្សក៏ដោយ លោក កឹម សុខា និងរូបខ្ញុំ សម រង្ស៊ី នៅតែជាមនុស្សតែមួយ គឺជាដៃគូស្លាប់រស់ ដើម្បីសង្គ្រោះជាតិយើង ។ ដោយសារតែខាងគេម្ខាងទៀតនោះ រកវិធីអ្វីមិនបាន ដើម្បីធ្វើឲ្យគណបក្សសង្គ្រោះជាតិចុះខ្សោយ ពួកគេមានតែប្រើល្បិចកាន់តែថោកទាបទៅ ថោកទាបទៅ តែនៅទីបញ្ចប់ ត្រូវតែចាញ់គណបក្សសង្គ្រោះជាតិជាមិនខាន ពីព្រោះគណបក្សសង្គ្រោះជាតិ តំណាងឲ្យសេចក្តីសង្ឃឹម កិត្តិយស និងភាពថ្លៃថ្នូរ របស់ប្រជារាស្ត្រខ្មែរទាំងមូល ៕
ចែករំលែកព័តមាននេះ