សហរដ្ឋអាមេរិក ៖ ក្នុងលិខិតមួយដែលបានចេញផ្សាយកាលពីយប់ថ្ងៃពុធ រដ្ឋាភិបាលលោក Trump បានបញ្ជាក់ឲ្យដឹងថា សហរដ្ឋអាមេរិកមិនត្រូវបានចងភ្ជាប់ជាមួយការសម្រេចចិត្តរបស់អង្គការពាណិជ្ជកម្មពិភពលោក (WTO) លើជម្លោះពាណិជ្ជកម្មទេ ។ នេះគឺជាភាពខុសគ្នាយ៉ាងខ្លាំងជាមួយអតីតប្រធានាធិបតីរបស់ប្រទេសនេះពីមុនមក។
លិខិតខាងលើអះអាងថា ៖ « បើទោះជាការសម្រេចចិត្តរបស់គណៈវិនិច្ឆ័យក្តីទាក់ទិននឹងជម្លោះរបស់ WTO បានប្រឆាំងនឹងសហរដ្ឋអាមេរិកនោះ ការសម្រេចចិត្តបែបនេះ ក៏មិនមានន័យថា នឹងនាំឲ្យមានការផ្លាស់ប្តូរច្បាប់ និងការអនុវត្តរបស់សហរដ្ឋអាមេរិកដោយស្វ័យប្រវត្តិដែរ ។ រដ្ឋាភិបាលលោក Trump នឹងការពារយ៉ាងខ្លាំងក្លានូវអធិបតេយ្យភាពរបស់អាមេរិកទាក់ទិននឹងគោលនយោបាយពាណិជ្ជកម្ម » ។
គួរបញ្ជាក់ថា ក្នុងរយៈពេលប៉ុន្មានទសវត្សរ៍មកនេះ ប្រទេសចំនួន១៦៤ ក្នុង WTO រួមទាំងទាំងប្រទេសចិនយល់ស្របថា នឹងដោះស្រាយជម្លោះពាណិជ្ជកម្មតាមរយៈគណៈវិនិច្ឆ័យក្តី WTO ។ រដ្ឋាភិបាលលោក Obama បានកសាងក្តីជាច្រើនប្រឆាំងនឹងប្រទេសចិនក្នុង WTO ដែលធ្វើឲ្យសហរដ្ឋអាមេរិកដាក់ពន្ធលើដែកថែបរបស់ចិនកាលពីឆ្នាំមុន ។
លោកប្រធានាធិបតី Trump បាននិយាយក្នុងសភាកាលពីថ្ងៃអង្គារថា ការចូលជាសមាជិករបស់ប្រទេសចិនក្នុង WTO នាឆ្នាំ២០០១ គឺទាក់ទិននឹងការបាត់បង់រោងចក្រក្នុងសហរដ្ឋអាមេរិក ។
អ្នកនាំពាក្យម្នាក់របស់ក្រសួងការពារជាតិរបស់ចិន បាននិយាយកាលពីថ្ងៃព្រហស្បតិ៍ថា ពួកគេប្តេជ្ញាថា នឹងសហការតាមរយៈ WTO និងការពារតំណែងដ៏សំខាន់របស់អង្គការនេះក្នុងការគ្រប់គ្រងសេដ្ឋកិច្ចពិភពលោក ។
ប្រសិនបើរដ្ឋាភិបាលលោក Trump មិនចង់សហការជាមួយ WTO ទេនោះ ឥទ្ធិពលរបស់ WTO នឹងត្រូវបានប៉ះពាល់ ។ ប្រទេសជាសមាជិកអាចនឹងដោះស្រាយបញ្ហាដោយខ្លួនឯង និងប្រកាន់គំនិតការពារនិយម ។
ប៉ុន្តែលិខិតនេះទទួលស្គាល់ថា គ្មានការខាតបង់អ្វីឡើយសម្រាប់សហរដ្ឋអាមេរិក បើពួកគេគោរពតាមច្បាប់របស់ WTO ។ ប្រសិនបើសហរដ្ឋអាមេរិកចាញ់ក្តីក្នុង WTO ហើយសហរដ្ឋអាមេរិកមិនព្រមកែប្រែច្បាប់ឬការអនុវត្តនោះ ប្រទេសដែលឈ្នះមានសិទ្ធិដាក់ទណ្ឌកម្មពាណិជ្ជកម្មលើសហរដ្ឋអាមេរិក ៕
ចែករំលែកព័តមាននេះ