រាជធានីភ្នំពេញ ៖ យុវជនបីនាក់ស្រវឹងធ្លាក់ភ្នែកជិះម៉ូតូមួយគ្រឿងបោះពួយយ៉ាងលឿនរេចង្កូតទៅបុកបង្កាន់ដៃស្ពានអាកាសស្ទឹងមានជ័យបណ្តាលឱ្យយុវជនពីរនាក់រងរបួសធ្ងន់ធ្ងរ និងរបួសស្រាលម្នាក់
រាជធានីភ្នំពេញ ៖ យុវជនបីនាក់ស្រវឹងធ្លាក់ភ្នែកជិះម៉ូតូមួយគ្រឿងបោះពួយយ៉ាងលឿនរេចង្កូតទៅបុកបង្កាន់ដៃស្ពានអាកាសស្ទឹងមានជ័យបណ្តាលឱ្យយុវជនពីរនាក់រងរបួសធ្ងន់ធ្ងរ និងរបួសស្រាលម្នាក់ ហេតុការណ៍នេះបង្កឱ្យមានការភ្ញាក់ផ្អើលឡើងកាលពីវេលាម៉ោង១០និង៥០នាទីយប់ ថ្ងៃទី៥ ខែមីនា ឆ្នាំ២០១៧ ត្រង់ចំណុចខាងលើស្ពានអាកាសស្ទឹងមានជ័យ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូមួយគ្រឿងម៉ាកហុងដាស្គូពី ពណ៌ស ពាក់ស្លាកលេខ ភ្នំពេញ 1CR-1230 បើកបរដោយយុវជនបីនាក់ក្នុងស្ថានភាពស្រវឹងជោកជាំធ្វើដំណើរតាមបណ្តោយផ្លូវ២៧១ ក្នុងល្បឿនយ៉ាងលឿនទិសដៅពីត្បូងទៅជើង លុះមកដល់ចំណុចកើតហេតុខាងលើក៏ស្រាប់តែរេចង្កូតទៅខាងស្តាំទៅបុក និងបង្កាន់ដៃស្ពានអាកាសស្ទឹងមានជ័យ បណ្តាលឱ្យនាក់បើកបរ និងអ្នករួមដំណើរម្នាក់ដួលបោកក្បាលទៅ និងបង្កាន់ដៃស្ពានរងរបួសធ្ងន់ធ្ងរ និងម្នាក់ទៀតរងរបួសស្រាល ចំណែកឯម៉ូតូរងការខូចខាតបន្តិចបន្តួច ។
ក្រោយពេលកើតហេតុជនរងគ្រោះដែលរងរបួសធ្ងន់ម្នាក់ត្រូវបានរថយន្តសង្គ្រោះដឹកយកទៅព្យាបាលនៅគ្លីនិកឯកជន រីឯម្នាក់ទៀតត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីរពេទ្យកាលម៉ែត ចំណែកឯម៉ូតូសមត្ថកិច្ចយកទៅរក្សាទុកនៅអធិការដ្ឋាននគរបាលខណ្ឌមានជ័យរងចាំសាច់ញាតិមកទទួលយកត្រលប់ទៅផ្ទះវិញ ៕
ចែករំលែកព័តមាននេះ