ខេត្តមណ្ឌលគីរី ៖ ហាងឆេងគ្រាប់ស្វាយចន្ទីស្រស់ឆ្នាំនេះ មានតម្លៃខ្ពស់ជាងឆ្នាំមុនៗទ្វេដង តែទិន្នផលធ្លាក់ចុះយ៉ាងខ្លាំង ដោយសារតែអាកាសធាតុមិនអំណោយផល ដូចជាអាកាសធាតុចុះត្រជាក់ ខ្យល់ និងមានភ្លៀងកក់ខែជាដើមដែលធ្វើឲ្យដំណាំនេះហុចផលមិនបានច្រើនដូចឆ្នាំមុន ។
កង្វះខាតទិន្នផលស្វាយចន្ទីសម្រាប់ផ្គត់ផ្គង់លើទីផ្សារ ក៏បានធ្វើឲ្យតម្លៃហក់ឡើងខ្ពស់ផងដែរ ខណៈដែលធ្វើក្រុមឈ្មួញកំពុងដណ្ដើមគ្នាទិញ ស្របពេលរដូវប្រមូលផលបានចាប់ផ្តើមពេញលេញនៅដើមខែមីនានេះ ។ ទោះបីយ៉ាងណា ក៏មានអ្នកម៉ៅចម្ការស្វាយចន្ទីខ្លះខកចិត្តយ៉ាងខ្លាំងផងដែរ ដោយសារតែទិន្នផលមិនបានដូចការគ្រោងទុក ថែមទាំងខាតបង់ដើមទុនយ៉ាងច្រើន ។
កសិករម្នាក់រស់នៅស្រុកកែវសីមា ឈ្មោះ សៅ សាមាន បាននិយាយថា បច្ចុប្បន្នតម្លៃគ្រាប់ស្វាយចន្ទីស្រស់លក់បាន៧.៨០០រៀល ក្នុង១គីឡូក្រាម ធៀបនឹងឆ្នាំមុន តម្លៃត្រឹមតែ ៥.២០០រៀលប៉ុណ្ណោះ ។ លោកមានចម្ការស្វាយចន្ទីទំហំ៤ហិកតា អាចប្រមូលផលបានចាប់ពី១៥០ទៅ២០០គីឡូក្រាមក្នុង១ថ្ងៃ ។ លោកថា ៖ «ទោះបីស្វាយចន្ទីឆ្នាំនេះមិនទទួលបានផលច្រើន តែមានតម្លៃខ្ពស់ ធ្វើឲ្យលោករីករាយសប្បាយចិត្ត និងអាចទទួលយកបាន » ។
ឈ្មួញកណ្ដាលដែលដើរទិញគ្រាប់ស្វាយចន្ទីបាននិយាយថា តម្លៃឆ្នាំនេះគឺជិត៨ពាន់រៀលក្នុង១គីឡូក្រាម ជាតម្លៃមួយខ្ពស់មិនធ្លាប់មានក្នុងរយៈពេលប៉ុន្មានឆ្នាំចុងក្រោយនេះ ដោយកាលពីឆ្នាំមុនៗ តម្លៃគ្រាប់ស្វាយចន្ទីមានតម្លៃចន្លោះពី២ពាន់ទៅ៥ពាន់រៀលប៉ុណ្ណោះ ។
ប្រធានមន្ទីរកសិកម្មខេត្តមណ្ឌលគិរី លោក សុង ឃាង បានឲ្យដឹងថា ផ្ទៃដីដាំស្វាយចន្ទីនៅខេត្តមណ្ឌលគិរីមានចំនួនតិចនៅឡើយ ហើយខាងមន្ទីរនៅពុំទាន់មានតួលេខជាក់លាក់នៅឡើយទេ ប៉ុន្តែចំពោះតម្លៃវិញ គឺពិតជាឡើងថ្លៃជាងឆ្នាំមុនមែន ។
ចំណែក លោក ផាន់ មុន្ថា អនុប្រធានការិយាល័យកសិកម្មស្រុកកែវសីមា បានឲ្យដឹងថា ផ្ទៃដីដាំស្វាយចន្ទីនៅស្រុកកែវសីមា មានចំនួន៨០០ហិកតា បើធៀបនឹងឆ្នាំមុនកើនឡើងច្រើន ដោយឆ្នាំមុនមានត្រឹមតែ៥០០ហិកតាប៉ុណ្ណោះ ។ លោកថា ៖ « ពេលនេះ កសិកររីករាយនឹងលក់ទិន្នផលដែលពួកគេប្រមូលបានណាស់ ព្រោះឈ្មួញចាំទទួលទិញដល់ចម្ការ និងបន្តនាំចេញទៅប្រទេសវៀតណាម » ។
ដោយឡែកនៅខេត្តរតនគីរីឯណោះវិញ ក៏មិនខុសគ្នាដែរ ផលស្វាយចន្ទីក្នុងឆ្នាំនេះបានធ្លាក់ចុះ ធ្វើឲ្យអ្នកម៉ៅចម្ការស្វាយចន្ទីខកចិត្ត និងខាតបង់លុយកាក់យ៉ាងច្រើន។ ការខូចខាតទិន្នផលដំណាំស្វាយចន្ទីឆ្នាំនេះត្រូវគេនិយាយថាកម្រនឹងជួបណាស់ គឺផ្កាស្វិតក្រៀមទងផ្កា និងរុះរោយអស់ មិនមានក្តិបគ្រប់ចម្ការនៅក្នុងខេត្តរតនគិរីនេះ។
ប្រធានមន្ទីរកសិកម្មរុក្ខាប្រមាញ់ និងនេសាទ ខេត្ត លោក សយ សូណា មានប្រសាសន៍ថា បញ្ហានេះដោយសារកត្តាខ្យល់ខ្លាំងពេក ត្រជាក់ពេក និងភ្លៀងចុងឆ្នាំច្រើនពេក។ ឆ្នាំ២០១៧នេះ ដំណាំស្វាយចន្ទីមានការកើនឡើងជាង២ពាន់ហិកតា បើធៀបនឹងឆ្នាំ២០១៦ ដែលផ្ទៃដីដាំមាន២៧.០០០ហិកតាជាង ហើយការប្រមូលផលក្នុងឆ្នាំ២០១៦បានលើផ្ទៃដីជាង១៩.០០០ហិកតា។ ចំណែកតម្លៃក៏កើនឡើងមួយជាពីរដែរនៅឆ្នាំ២០១៧នេះ គឺតម្លៃពី៨.០០០រៀលទៅ៩.០០០រៀលក្នុង១គីឡូក្រាម ។
ការធ្លាក់ទិន្នផល និងតម្លៃកើនឡើងនេះ ក្រុមអ្នកម៉ៅចម្ការស្វាយចន្ទីបានរអ៊ូរទាំថា ពួកគេពិតជាខាតចូលដើម ពីព្រោះស្វាយចន្ទីម៉ៅទិញក្នុង១ហិកតាតម្លៃជាង១.០០០ដុល្លារ តែទន្និផលក្នុង១ហិកតាប្រមូលបានតិចតួចគឺ៧ហិកតារើសក្នុងរយៈពេល២ថ្ងៃបានតែ១៥គីឡូក្រាមទេ ដែលខុសឆ្ងាយពីឆ្នាំទៅមិញ ៥ហិកតារើសក្នុង១ថ្ងៃ១០០គីឡូក្រាម។
ពួកគាត់និយាយថា ប្រាក់ដែលយកមកម៉ៅចម្ការស្វាយចន្ទីគឺបានមកពីខ្ចីធនាគារ ដូច្នេះមិនដឹងជារំពឹងថានឹងបានប្រាក់ពីណាដើម្បីសងធនាគារវិញទេ បើចូលដើមទៅហើយនោះ។
ក្រុមអ្នកទិញស្វាយចន្ទីបានត្អូញត្អែរថា កាលពីឆ្នាំ២០១៦ ការប្រមូលទិញគ្រាប់ស្វាយចន្ទីក្នុង១ថ្ងៃពី១០០បាវទៅ២០០បាវ ដែលចាប់ផ្តើមទិញក្នុងកំឡុងខែមករា ។ ដោយឡែកឆ្នាំនេះ ក្នុង១ថ្ងៃទិញគ្រាប់ស្វាយចន្ទីបានតែ៣បាវទៅ៥បាវប៉ុណ្ណោះ ហើយការប្រមូលទិញក្នុងឆ្នាំកន្លងទៅបានប្រមាណជាង១.០០០តោនឯណោះក្នុង១រដូវ។
ពួកគាត់បញ្ជាក់ថា មូលហេតុដែលនាំឱ្យស្វាយចន្ទីឡើងថ្លៃគឺដោយសារតែឆ្នាំនេះស្វាយចន្ទីពុំមានផ្លែ ដែលបណ្តាលមកពីកត្តាធម្មជាតិដ៏អាក្រក់។
ពុំមានការបញ្ជាក់ឲ្យច្បាស់លាស់ពីអ្នកជំនាញដំណាំស្វាយចន្ទីនោះទេពីបាតុភាពនាឆ្នាំនេះ ហើយអ្នកទទួលរងគ្រោះមិនមែនអ្នកដែលមានចម្ការស្វាយចន្ទីនោះទេ គឺជាអ្នកម៉ៅចម្ការដែលជាអ្នករើសយកផល ៕
ចែករំលែកព័តមាននេះ