ម៉ូតូប្រមាណ១៤១គ្រឿង ត្រូវបានអាជ្ញាធរកាត់សោបន្តរឹបអូសយកចេញពីឃ្លាំងកុងស៊ីបញ្ចាំចំនួន៣កន្លែង ស្ថិតនៅក្នុងសង្កាត់បឹងសាឡាង និងសង្កាត់ទឹកល្អក់ទី៣ ខណ្ឌទួលគោក
រាជធានីភ្នំពេញ ៖ ម៉ូតូប្រមាណ១៤១គ្រឿង ត្រូវបានអាជ្ញាធរកាត់សោបន្តរឹបអូសយកចេញពីឃ្លាំងកុងស៊ីបញ្ចាំចំនួន៣កន្លែង ស្ថិតនៅក្នុងសង្កាត់បឹងសាឡាង និងសង្កាត់ទឹកល្អក់ទី៣ ខណ្ឌទួលគោក នៅព្រឹកថ្ងៃទី២៨ ខែកញ្ញា ឆ្នាំ២០២២នេះ បន្ទាប់ពីឈប់សម្រាកបុណ្យភ្ជុំបិណ្ឌ បានតែប៉ុន្មានថ្ងៃ។
ប្រតិបត្តិការខាងលើនេះ ដឹកនាំដោយលោក ឃ្លាំង ហួត អភិបាលរងរាជធានីភ្នំពេញ និងលោក ជា ពិសី អភិបាលខណ្ឌទួលគោក និងមានការចូលរួមសម្របសម្រួលពីលោក លឹម ប៊ុន ហេង ព្រះរាជ្ញារងអមសាលាដំបូងរាជធានីភ្នំពេញ។
តាមព័ត៌មានបានអោយដឹងថា ឃ្លាំងកុងស៊ីបញ្ចាំ ចំនួន៣ទីតាំង ត្រូវបានអាជ្ញាធរចុះកាត់សោឆែកឆេរ និងដកហូតជាបន្តបន្ទាប់ នៅព្រឹក និងរសៀលថ្ងៃទី២៨ ខែកញ្ញានេះ។ នៅក្នុងនោះ ទីតាំងទី១ គឺស្ថិតនៅតាមបណ្ដោយផ្លូវលេខ៣២៤ ក្នុងសង្កាត់បឹងសាឡាង ក្រោយអធិការដ្ឋាន ខណ្ឌទួលគោក រកឃើញម៉ូតូចំនួន៤៥គ្រឿង និងទីតាំងទី២ នៅហាងបញ្ចាំយីហោ «ហុក រ៉ាស៊ីង» ផ្ទះលេខ៣៥បេ ផ្លូវ១៩២ ស្ថិតក្នុងសង្កាត់ទឹកល្អក់៣ ខណ្ឌទួលគោក ចំណែកទីតាំងទី៣ គឺនៅឃ្លាំងស្តុបម៉ូតូគ្មានលេខ ស្ថិតនៅផ្លូវលេខ១៩២ សង្កាត់ទឹកល្អក់៣។ សរុបទាំង៣ទីតាំងនេះ សមត្ថកិច្ចរកឃើញម៉ូតូ ចំនួន១៤១គ្រឿង កំពុងដកហូត។
គួរបញ្ជាក់ថា នៅតំបន់ឃ្លាំងរំសេវ ក្នុងសង្កាត់ទឹកល្អក់ទី៣ ខណ្ឌទួលគោក មានឃ្លាំងកុងស៊ី បញ្ចាំចំនួន៦០ទីតាំង ហើយត្រូវបានអាជ្ញាធរដឹកនាំដោយ លោក ឃ្លាំង ហួត អភិបាលរងរាជធានីភ្នំពេញ បានចុះត្រួតពិនិត្យឆែកឆេរជាបន្តបន្ទាប់រយៈពេល៥ថ្ងៃ គឺចាប់ពីថ្ងៃទី១៩ រហូតដល់ថ្ងៃទី២៣ ខែកញ្ញា ឆ្នាំ២០២២នេះ បានចុះបង្ក្រាបចំនួន១៣ទីតាំង ព្រមទាំងដកហូតម៉ូតូសរុបចំនួន១១១៣គ្រឿង, ដកហូតរថយន្តសរុបចំនួន១៤គ្រឿង, ដកហូត Passapp សរុបចំនួន១២គ្រឿង និងដកហូតម៉ូតូកង់បីសរុបចំនួន០៩គ្រឿង រួចបញ្ជូនទៅកាន់ឃ្លាំងមួយកន្លែង នៅតំបន់ OCIC ស្ថិតក្នុងខណ្ឌជ្រោយចង្វារ ព្រមទាំងអំពាវនាវដល់ប្រជាពលរដ្ឋ ដែលរងគ្រោះ បាត់ម៉ូតូ រកម៉ូតូឃើញ និងប្រគល់អោយម្ចាស់ចំនួន១០គ្រឿង។
គួរបញ្ជាក់ទៀតថា នៅក្នុងនោះ ម្ចាស់កុងស៊ី និងអ្នកមើលការចំនួន៩នាក់ ត្រូវបានឃាត់ខ្លួន ហើយត្រូវបានតុលាការចេញដីការឃុំខ្លួនជាបណ្តោះអាសន្តហើយ។ បន្ទាប់ពីចប់បុណ្យភ្ជុំបិណ្ឌ អាជ្ញាធរក៏បានបន្តឆែកឆេរ រឹបអូសដកហូតម៉ូតូបន្តទៀត។
តាមលោក ឃ្លាំង ហួត អភិបាលរងរាជធានីភ្នំពេញ បានអោយដឹងថា បញ្ហាកុងស៊ីបញ្ចាំខុសច្បាប់ជាប្រភពនាំឲ្យមានបទល្មើស និងប៉ះពាល់ដល់ជីវភាពប្រជាជនមានចំណូលទាប។ ហើយបេសកកម្មបង្ក្រាបល្បែ.ងស៊ីសងខុសច្បាប់ កុងស៊ីបញ្ចាំខុសច្បាប់ ជាភារៈកិច្ចអាជ្ញាធរមានសមត្ថកិច្ច និងអ្នកពាក់ព័ន្ធត្រូវអនុវត្តន៍ដោយការទទួលខុសត្រូវខ្ពស់។
លោក ឃ្លាំង ហូត ក៏បានបញ្ជាក់ថា កុងស៊ីទទួលបញ្ចាំដែលត្រូវមានវិធានការដាក់ទោសតាមច្បាប់ គឺមានទទួលបញ្ចាំរបស់ចោរ,ទទួលបញ្ចាំរបស់គ្មានឯកសារ, ទទួលបញ្ចាំយកការប្រាក់ខ្ពស់ខុសច្បាប់, ទទួលបញ្ចាំមិនបង់ពន្ធដារជូនរដ្ឋ។
លោក ឃ្លាំងហួត ក៏បានអំពាវនាវដល់ប្រជាជនក្នុងរាជធានីភ្នំពេញ ត្រូវចូលរួមសហការជាពលរដ្ឋល្អក្នុងយុទ្ធនាការបោសសម្អាតកុងស៊ីបញ្ចាំខុសច្បាប់ ដើម្បីលុបបំបាត់អំពើចោរកម្មនានា លុបបំបាត់ល្បែ.ងស៊ីសងខុសច្បាប់ ការចែកចាយ និងប្រើប្រាស់គ្រឿងញៀ.ន ទូទាំងរាជធានីភ្នំពេញ៕
ចែករំលែកព័តមាននេះ