ខេត្តព្រះសីហនុ ៖ ទិវារត់ប្រណាំងអន្តរជាតិពាក់កណ្ដាលម៉ារ៉ាតុងលើកទី៦ នៅឆ្នេរអូរឈើទាល ខេត្តព្រះសីហនុ កាលពីថ្ងៃទី៥ មីនា ដែលមានភ្ញៀវទេសចរជាតិ និងអន្តរជាតិជាង២០០នាក់មកពីបណ្ដាប្រទេសនៅលើពិភពលោកចំនួន៣២ចូលរួមបានបញ្ចប់ហើយ ។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ព្រឹត្តិការណ៍នៃការប្រកួតនេះទទួលបានកិច្ចសហការពីក្រសួងអប់រំ យុវជន និងកីឡា សាលាខេត្តព្រះសីហនុ គណៈកម្មាធិការជាតិអូឡាំពិកកម្ពុជា និងសហព័ន្ធខ្មែរកីឡាអត្តពលកម្មស្ម័គ្រចិត្ត ។ សម្រាប់កម្មវិធីរត់ប្រណាំងអន្តរជាតិពាក់កណ្ដាលម៉ារ៉ាតុងលើកទី៦ឆ្នាំនេះ ហាក់មានសកម្មភាពផុលផុសជាងបណ្ដាឆ្នាំមុនៗក្នុងនោះទាំងភ្ញៀវជាតិ និងអន្តរជាតិមានការកើនឡើងជាងមុនបន្តិច ។ លោកថា មូលហេតុដែលនាំឱ្យកីឡាករបរទេសមានការកើនឡើងយឺតបែបនេះ ដោយសារតែព្រលានយន្តហោះរបស់យើងនៅមិនទាន់បើកជើងមេឃឱ្យទូលាយ ជាពិសេស ការហោះហើរត្រង់ពីសៀមរាបមកខេត្តព្រះសីហនុ និងពីភ្នំពេញមកខេត្តព្រះសីហនុ ។
ប៉ុន្តែបន្តិចទៀតនឹងលែងមានបញ្ហាដោយសារ ការជួសជុលកែលម្អព្រលានយន្តហោះខេត្តព្រះសីហនុកំពុងតែដំណើរការជាបណ្តើរហើយ ។
លោកសង្ឃឹមថា សម្រាប់កម្មវិធីរត់ប្រណាំងឆ្នាំក្រោយអ្នកមកចុះឈ្មោះចូលរួមនឹងមានកំណើនមិនខាន ។ លោកបានឱ្យដឹងទៀតថា មូលហេតុដែលមិនសូវមានភ្ញៀវបរទេសមកចូលរួម ដោយសារបញ្ហាការធ្វើដំណើរនេះហើយ ។
ចំពោះលទ្ធផលរត់ចម្ងាយ១០គីឡូម៉ែត្រផ្នែកនារី ចំណាត់ថ្នាក់លេខ១ បានទៅលើកីឡាការិនីកម្ពុជា ហេង មីជូ លេខ២ កីឡាការិនី បូ សំណាង និងលេខ៣ កីឡាការិនី Analiese Thomas មកពីចក្រភពអង់គ្លេស ។ ផ្នែកបុរសចំណាត់ថ្នាក់លេខ១ បានទៅលើកីឡាករកម្ពុជា វ៉ាន់ ភារ៉ា លេខ២កីឡាករកម្ពុជា ជា សម្ភស្ស និងលេខ៣ កីឡាករកម្ពុជា ឈុន ប៊ុនធឿន ។
រត់ចម្ងាយ២១គីឡូម៉ែត្របុរស លេខ១បានទៅកីឡាករកម្ពុជា ម៉ា វីរូ លេខ២ កីឡាករអាមេរិកBrandon Thomas និងលេខ៣ កីឡាករអូស្ត្រាលីJames Happell ។
លោក សែម ផល្លា មន្ត្រីគណៈកម្មការរៀបចំការប្រកួតបានឱ្យដឹងថា រយៈពេល៦ឆ្នាំមកនេះ ចំនួនអ្នកចូលរួមនៅមិនទាន់ឆ្លើយតបទៅនឹងតម្រូវការអ្នករៀបចំការប្រកួតឡើយ។ ទោះបីជាយ៉ាងណា លោកនៅតែបន្តខិតខំប្រឹងប្រែងធ្វើយ៉ាងណាឱ្យការប្រកួតទទួលបានជោគជ័យ ។ លោកថា គោលបំណងសំខាន់ដែលយើងរៀបចំឱ្យមានព្រឹត្តិការណ៍នៃការប្រកួតនេះឡើង ដើម្បីផ្សព្វផ្សាយឆ្នេរសមុទ្រស្អាតរបស់កម្ពុជាយើង ក៏ដូចជាដើម្បីស្វែងរកថវិកាដើម្បីបម្រើឱ្យសកម្មភាពមនុស្សធម៌ផងដែរ ៕
ចែករំលែកព័តមាននេះ