ក្មេងស្រីម្នាក់ស្លាប់យ៉ាងអាណោចអធ័មនៅនឹងចង្កេះភ្នំ
ខេត្តឧត្តរមានជ័យ ៖ ក្មេងស្រីម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុខណៈជួបគ្រោះថ្នាក់ចរាចរណ៍កាលពីវេលាម៉ោង១និង៤០នាទីរសៀល ថ្ងៃទី៤ មីនា ២០១៧
ខេត្តឧត្តរមានជ័យ ៖ ក្មេងស្រីម្នាក់បានស្លាប់បាត់បង់ជីវិតភ្លាមៗនៅនឹងកន្លែងកើតហេតុខណៈជួបគ្រោះថ្នាក់ចរាចរណ៍កាលពីវេលាម៉ោង១និង៤០នាទីរសៀល ថ្ងៃទី៤ មីនា ២០១៧ ។ ហេតុការណ៍បានកើតឡើងនៅនឹងចង្កេះភ្នំក្នុងភូមិជប់គគីខាងលិច ឃុំបេង ស្រុកបន្ទាយអម្ពឹល ។
ក្មេងស្រីដែលរងគ្រោះឈ្មោះ ជឿន គឹមឡៃ អាយុ១២ឆ្នាំ រស់នៅក្នុងសង្កាត់អូរស្មាច់ក្រុងសំរោង ខេត្តឧត្តរមានជ័យ ចំណែកអ្នកបើកបររថយន្តម៉ាកកាម៉ារីសេរី៩៣ ពណ៍ខ្មៅពាក់ស្លាកលេខ កំពង់ធំ ២A-០៧២៦ ឈ្មោះ ចាន់ ជឿន ភេទប្រុស អាយុ៦២ឆ្នាំ ត្រូវជាជីតាបង្កើតរបស់ក្មេងស្រីរងគ្រោះ ។
តាមប្រភពពីមន្ត្រីប៉ូលិសស្រុកបន្ទាយអម្ពឹលបានឱ្យដឹងថា មុនពេលកើតហេតុជនរងគ្រោះនៅឯសង្កាត់អូរស្មាច់ ក្រុងសំរោង ហើយជនរងគ្រោះជារៀងរាល់ថ្ងៃសៅ-អាទិត្យជីតានឹងចៅតែងតែដឹកគ្រឿងសង្ហារឹមយកមកលក់នៅតំបន់មាត់ច្រកទ្វារជប់គគី តែអកុសលនៅពេលវិលត្រឡប់ទៅផ្ទះវិញបើករថយន្តចុះពីលើភ្នំស្រាប់តែដាច់ហ្វាំងជ្រុលចង្កូតធ្លាក់ពីលើផ្លូវក្រឡាប់បណ្តាលឱ្យស្លាប់ចៅស្រីម្នាក់យ៉ាងគួរឱ្យអាណិត ។
ប៉ូលិសដដែលបានបន្តថា បន្ទាប់ពីបានត្រួតពិនិត្យរួចសមត្ថកិច្ចបានប្រគល់សពក្មេងស្រីរងគ្រោះទៅឱ្យក្រុមគ្រួសារនាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ