សមាគមខុនដូថៃមានសុទិដ្ឋិនិយមលើទីផ្សារអចលនទ្រព្យ
ប្រទេសថៃ ៖ សមាគមខុនដូ សមាគមអចលនទ្រព្យ និងសមាគមពាណិជ្ជកម្មលំនៅឋានថៃមានទំនុកចិត្តថា ទីផ្សារអចលនទ្រព្យនឹងកើនឡើងនៅដើមឆ្នាំនេះ ខណៈថៃបានត្រៀមខ្លួនរួចជាស្រេចសម្រាប់ការតាំង
ប្រទេសថៃ ៖ សមាគមខុនដូ សមាគមអចលនទ្រព្យ និងសមាគមពាណិជ្ជកម្មលំនៅឋានថៃមានទំនុកចិត្តថា ទីផ្សារអចលនទ្រព្យនឹងកើនឡើងនៅដើមឆ្នាំនេះ ខណៈថៃបានត្រៀមខ្លួនរួចជាស្រេចសម្រាប់ការតាំងពិព័រណ៍លំនៅឋាន និងខុនដូ លើកទី៣៦ ។
ព្រឹត្តិការណ៍ប្រចាំឆ្នាំ នឹងត្រូវប្រារព្ធឡើងចាប់ពីថ្ងៃទី៩ ដល់១២ មីនា នៅមជ្ឈមណ្ឌលសន្និបាតជាតិ Queen Sirikit ។ ព្រឹត្តិការណ៍នេះនឹងទាក់ទាញភ្ញៀវទេសចរជាមួយគម្រោងលំនៅឋានគួរឱ្យចាប់អារម្មណ៍ជាច្រើន ។
លោក Wichai Poolworaluk ប្រធានគណៈកម្មការរៀបចំបានឱ្យដឹងថា សព្វថ្ងៃនេះ មានសញ្ញាវិជ្ជមានដូចជា ស្ថិរភាពនយោបាយ អត្រាការប្រាក់ទាបសម្រាប់កម្ចីទិញផ្ទះ និងការងើបឡើងវិញនៃការវិនិយោគឯកជន ដែលបានបង្កើនឱកាសការងារ និងសក្តានុពលនៃការទិញ។
រដ្ឋាភិបាលក៏មានគម្រោងវិនិយោគច្បាស់លាស់ជាមួយការចំណាយលើហេដ្ឋារចនាសម្ព័ន្ធ ជាពិសេស រថភ្លើងមានល្បឿនលឿន ។ លោកបន្តថា ៖ « ដូច្នេះ យើងមានទំនុកចិត្តថា ការតាំងពិព័រណ៍លំនៅឋាន និងខុនដូនេះ នឹងទទួលបានការឆ្លើយតបយ៉ាងច្រើនពីសំណាក់អ្នកទិញ» ។
អ្នករៀបចំកម្មវិធីបានទទួលកិច្ចសហការពីក្រុមហ៊ុនជាង២០០ ដែលនឹងដាក់បង្ហាញអចលនទ្រព្យជាង១.១០០គម្រោងនៅទូទាំងប្រទេស រួមទាំងការចាប់ផ្តើមការសាងសង់ថ្មីៗ។ ស្ថាប័នហិរញ្ញវត្ថុនឹងផ្តល់នូវសេវាកម្ម និងការត្រួតពិនិត្យឥណទានរបស់ខ្លួនផងដែរ ។
ការតាំងពិព័រណ៍ដែលមានទំហំជាង១ម៉ឺនម៉ែត្រការ៉េនេះ នឹងមានស្តង់ចំនួន៥៤៤ ក្រោមប្រធានបទ «សូមទទួលយកទីតាំងដ៏ល្អបំផុតសម្រាប់មនុស្សជាទីស្រឡាញ់របស់អ្នក» ។
លោក Wichai Poolworaluk បន្ថែមថា ៖ « ការមានផ្ទះស័ក្តិសមនឹងរសនិយមរបស់អ្នក ដែលស្ថិតក្នុងទីតាំងល្អនិងមានតម្លៃសមរម្យ គឺសំខាន់ខ្លាំងណាស់ក្នុងការចាប់ផ្តើមគ្រួសារថ្មី » ។
ការតាំងពិព័រណ៍នេះត្រូវបានគេរំពឹងថា នឹងទាក់ទាញអ្នកចូលរួមជាង១០ម៉ឺននាក់ និងអាចលក់បានច្រើនជាង១១ប៊ីលានបាត ក្នុងនោះ៤ប៊ីលានបាតលក់ក្នុងអំឡុងពេលព្រឹត្តិការណ៍ និង៧ប៊ីលានបាតលក់ក្រោយព្រឹត្តិការណ៍ ៕
ចែករំលែកព័តមាននេះ