ស្រុកព្រៃនប់ក្លាយជាតំបន់ មានការឃុបឃិតជាប្រព័ន្ធ រំលោភបំពានព្រៃលិចទឹក
ខេត្តព្រះសីហនុ ៖ រាជរដ្ឋាភិបាលបានសម្រេចលុបប័ណ្ណកម្មសិទ្ធិដីធ្លីចំនួន៧ប័ណ្ណស្មើនឹងទំហំ៤៨ហិកតា ក្នុងឃុំទឹកថ្លា ស្រុកព្រៃនប់
ខេត្តព្រះសីហនុ ៖ រាជរដ្ឋាភិបាលបានសម្រេចលុបប័ណ្ណកម្មសិទ្ធិដីធ្លីចំនួន៧ប័ណ្ណស្មើនឹងទំហំ៤៨ហិកតា ក្នុងឃុំទឹកថ្លា ស្រុកព្រៃនប់ ដែលជាកម្មសិទ្ធិរបស់លោកឧកញ៉ា
ហាន់ ឃៀង ក្រោយពីពិនិត្យឃើញថាប័ណ្ណកម្មសិទ្ធិទាំងនោះគឺជាប័ណ្ណកើតឡើងពីការឃុបឃិតគ្នាជាលក្ខណៈប្រព័ន្ធរំលោភបំពានលើដីព្រៃលិចទឹក ។
ការដកហូតនេះក៏បានទទួលការគាំទ្រយ៉ាងពេញទំហឹងផងដែរពីសំណាក់ប្រជាពលរដ្ឋក្នុងខេត្ត ជាពិសេសគឺប្រជាពលរដ្ឋនៅក្នុងស្រុកព្រៃនប់តែម្តង ។ ប៉ុន្តែអ្វីដែលគួរឱ្យចាប់អារម្មណ៍បំផុត គឺសកម្មភាពថ្មីនៃការកាប់បំផ្លាញនិងការចាក់ដីលុបព្រៃលិចទឹក នៅតែបន្តកើតមានយ៉ាងរលូននៅក្នុងតំបន់ខាងលើនេះដដែល ដោយក្រុមចាក់ដីលុបព្រៃលិចទឹកទាំងនោះអះអាងថា ពួកគេមានច្បាប់ត្រឹមត្រូវក្នុងការកសាងផ្លូវពីផ្លូវជាតិលេខ៣ទៅកាន់មាត់សមុទ្រ (Sic) ។
បុរសម្នាក់ដែលអះអាងថា ខ្លួនជាមេការមើលការខុសត្រូវនៅការដ្ឋានចាក់ដីលុបព្រៃលិចទឹកខាងលើ បាននិយាយយ៉ាងឡូយប្រាប់ក្រុមអ្នកសារព័ត៌មានថា ការចាក់ដីលើព្រៃលិចទឹកនេះ ក្រុមហ៊ុនគេមានច្បាប់អនុញ្ញាតត្រឹមត្រូវពីរាជរដ្ឋាភិបាល ក្នុងគោលដៅកសាងផ្លូវប្រវែង៣គីឡូម៉ែត្រពីផ្លូវជាតិលេខ៣ទៅកាន់មាត់សមុទ្រ ។ ចំពោះការសង្ស័យពីច្បាប់អនុញ្ញាតយ៉ាងណានោះ សូមលោកអ្នកសារព័ត៌មានទៅរកមើលដោយខ្លូនឯងទៅ ពីព្រោះឯកសារពាក់ព័ន្ធក្រុមហ៊ុនបានដាក់ចូលទៅអាជ្ញាធរខេត្ត អាជ្ញាធរស្រុក និងអង្គភាពមន្ទីរពាក់ព័ន្ធអស់ទៅហើយ មុននឹងចាប់ផ្តើមចាក់ដីធ្វើផ្លូវ ។
លោក ទិត វុទ្ធី អភិបាលស្រុកព្រៃនប់ បានបញ្ជាក់ថា ក្រុមហ៊ុនចាក់ដីលុបព្រៃលិចទឹកខាងលើ គឺជាក្រុមហ៊ុន H.K.T មានច្បាប់អនុញ្ញាតត្រឹមត្រូវក្នុងការអភិវឌ្ឍធ្វើរោងចក្រចម្រាញ់ប្រេង ហើយការចាក់ដីបែបនេះកន្លងមកបានធ្វើម្តងរូចមកហើយ និងក្រោយមកក៏ផ្អាកទៅវិញអស់មួយរយៈដោយមិនដឹងថា ក្រុមហ៊ុនមានមូលហេតុអ្វីនោះទេ ទើបតែពេលនេះចាប់ផ្តើមចាក់បន្ត ប៉ុន្តែការចាក់ដីលើកនេះ លោកមិនបានដឹងឡើយ ។
លោក នេន ចំរើន នាយខណ្ឌរដ្ឋបាលជលផលខេត្ត បានបញ្ជាក់ថា ដីចំណុចខាងលើនេះ ជាតំបន់ព្រៃលិចទឹក ហើយពាក់ពន្ធ័នឹងច្បាប់អនុញ្ញាតយ៉ាងណានោះលោកមិនទាន់ឃើញទេរហូតមកដល់ពេលនេះ ។ លោកក៏បានបញ្ជាក់ដែរថា បើក្រុមហ៊ុនមានត្រឹមតែគោលការណ៍អនុញ្ញាតច្បាប់របស់រាជរដ្ឋាភិបាល គឺក្រុមហ៊ុនមិនអាចយកគោលការណ៍អនុញ្ញាតនោះមកធ្វើសកម្មភាពបានទេ ។
គោលការណ៍នេះ តម្រូវឱ្យក្រុមហ៊ុនធ្វើការសហការជាមួយមន្ត្រីជំនាញ មន្ទីរអង្គភាពពាក់ព័ន្ធដូចជាមន្ទីរបរិសា្ថន មន្ត្រីជលផល អាជ្ញាធរខេត្ត-ស្រុក សិក្សាពីផលប៉ះពាល់ជាមុនសិន ទើបអាចធ្វើសកម្មភាពបាន ។ ប៉ុន្តែក្រុមហ៊ុនមួយនេះសង្ស័យថា បានតែគោលការណ៍ច្បាប់អនុញ្ញាតក៏ចាប់ផ្តើមធ្វើសកម្មភាពតែម្តង នេះជាបញ្ហាមួយដែលមិនគួរកើតមាននោះទេ ។
គួរបញ្ជាក់ថា តំបន់ដីព្រៃលិចទឹកនៅក្នុងស្រុកព្រៃនប់រាប់ពាន់ហិកតា បច្ចុប្បន្នត្រូវបានគេឃុបឃិតគ្នាចាប់តាំងពីមន្ត្រីថ្នាក់មួលដ្ឋានមន្ត្រីជំនាញ អាជ្ញាធរស្រុក រហូតដល់ខេត្ត បានចេញប័ណ្ណកម្មសិទ្ធិរំលោភយកអស់ទៅហើយ ។
ជាមួយគ្នានេះ ប្រជាពលរដ្ឋបានសំណូមពរទៅក្រសួងពាក់ព័ន្ធ មេត្តាធ្វើការពិនិត្យឡើងវិញ ដើម្បីដកហូតយកដីព្រៃលិចទឹកនោះមករក្សាទុកជាសម្បត្តិរដ្ឋវិញ ។ បើមិនដូច្នេាះទេ ប្រជាពលរដ្ឋដែលអាស្រ័យជីវិតប្រចាំថ្ងៃដោយពឹងផ្អែកទៅលើតំបន់ព្រៃលិចទឹក ច្បាស់ជាយ៉ាប់ហើយ ៕
ចែករំលែកព័តមាននេះ