ប្រធាន APSF ជឿជាក់លើកម្ពុជាក្នុងការធ្វើជាម្ចាស់ផ្ទះកីឡាអាស៊ានប៉ារ៉ាហ្គេមលើកទី១២
- ភ្នំពេញ
រាជធានីភ្នំពេញ ៖ ប្រធានសហព័ន្ធកីឡាអាស៊ានប៉ារ៉ាហ្គេម ASEAN Para Sport Federation(APSF)
រាជធានីភ្នំពេញ ៖ ប្រធានសហព័ន្ធកីឡាអាស៊ានប៉ារ៉ាហ្គេម ASEAN Para Sport Federation(APSF)លោកOsoth Bhavilaiបានបង្ហាញការជឿជាក់លើសមត្ថភាពរបស់កម្ពុជាក្នុងការរៀបចំព្រឹត្តិការណ៍កីឡាអាស៊ានប៉ារ៉ាហ្គេមលើកទី១២ឆ្នាំ២០២៣ នៅរាជធានីភ្នំពេញនាពេលខាងមុខទទួលបានជោគជ័យ ។ លោកOsoth Bhavilai បង្ហាញការជឿជាក់បែបនេះនៅក្នុងកិច្ចប្រជុំកីឡាអាស៊ីអាគ្នេយ៍នៅទីក្រុងបាងកក កាលពីថ្ងៃទី២៦ កញ្ញា ឆ្នាំ២០២២។
នៅក្នុងកិច្ចប្រជុំនេះដែរប្រទេសកម្ពុជាត្រូវបានគេរាប់បញ្ចូលដូចជាប្រទេសម៉ាឡេស៊ី វៀតណាម ហ្វីលីពីន ឥណ្ឌូណេស៊ី មីយ៉ាន់ម៉ា និងសិង្ហបូរី ដែលបានទទួលធ្វើជាម្ចាស់ផ្ទះកីឡាអាស៊ានប៉ារ៉ាហ្គេម។
ទន្ទឹមគ្នានេះដែរ សហព័ន្ធកីឡាជនពិការអាស៊ីអាគ្នេយ៍(APSF)បានសហការគ្នាយ៉ាងជិតស្និទ្ធជាមួយរាជរដ្ឋាភិបាលកម្ពុជា និងគណៈកម្មាធិការជាតិរៀបចំការប្រកួតកីឡាអាស៊ានប៉ារ៉ាហ្គេមដើម្បីធានាគ្រប់វិញ្ញាសាដែលត្រូវដាក់ឱ្យចូលរួមប្រកួត។
លោកOsoth Bhavilaiបានមានប្រសាសន៍ក្នុងឱកាសនោះថា៖«យើងពិតមានការជឿជាក់យ៉ាងពេញទំហឹងថា ព្រឹត្តិការណ៍កីឡាអាស៊ានប៉ារ៉ាហ្គេមឆ្នាំ២០២៣នៅរាជធានីភ្នំពេញនឹងទទួលបានជោគជ័យក្នុងនាមកម្ពុជាធ្វើជាម្ចាស់ផ្ទះ»។
ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា ធ្លាប់បានអញ្ជើញធ្វើបទបង្ហាញស្ដីពីការត្រៀមខ្លួនធ្វើជាម្ចាស់ផ្ទះការប្រកួតកីឡាអាស៊ានប៉ារ៉ាហ្គេម នៅក្នុងកិច្ចប្រជុំក្រុមប្រឹក្សាភិបាលសហព័ន្ធកីឡាជនពិការអាស៊ីអាគ្នេយ៍នៅរាជធានីភ្នំពេញកាលពីថ្ងៃទី២៩ ខែកក្កដាថា មានកីឡាចំនួន១២ប្រភេទដែលត្រូវបានអនុម័តជាផ្លូវការរួមមាន កីឡាប៊ូល កីឡាបាល់ទះម្ខាង៥នាក់ កីឡាបាល់បោះពិការភ្នែក កីឡាវាយកូនឃ្លីលើតុ កីឡាបាល់ទះអង្គុយ កីឡាអុក កីឡាបាល់ទាត់ម្ខាង៥នាក់ អត្តពលកម្ម ហែលទឹក កីឡាលើកទម្ងន់ និងកីឡាបាល់ទះលើក្ដារ។
ក្រៅពីកីឡាទាំង១២ប្រភេទដែលត្រូវបានអនុម័តជាផ្លូវការរួចហើយនោះ ប្រភេទកីឡាផ្សេងទៀតកំពុងស្ថិតនៅក្នុងការពិចារណា ៕
ចែករំលែកព័តមាននេះ