ខេត្តស្វាយរៀង ៖ ស្ត្រីមានផ្ទៃពោះ២ខែម្នាក់ បានប្តឹងសមត្ថកិច្ចថាខ្លួនត្រូវបុរស២នាក់ចាប់បង្អកស្រា រួចចាប់ដាក់លើរថយន្តទំនើប១គ្រឿង ដឹកចេញពីហាងផឹកស៊ី
ខេត្តស្វាយរៀង ៖ ស្ត្រីមានផ្ទៃពោះ២ខែម្នាក់ បានប្តឹងសមត្ថកិច្ចថាខ្លួនត្រូវបុរស២នាក់ចាប់បង្អកស្រា រួចចាប់ដាក់លើរថយន្តទំនើប១គ្រឿង ដឹកចេញពីហាងផឹកស៊ី នៅម្ដុំព្រែកលៀប រាជធានីភ្នំពេញ ដើម្បីមកឡើងឋានសួគ៌នៅខេត្តស្វាយរៀងតែសំណាងអាក្រក់ក៏ជួបគ្រោះថ្នាក់ចរាចរណ៍ក្រឡាប់រថយន្ត។ បណ្តាលឲ្យរងរបួសបែកក្បាលធ្ងន់ធ្ងរ សន្លប់ក្នុងរថយន្តនិងបុរសម្នាក់ឈ្មោះ សុខ រ៉ាវី អាយុ២៩ឆ្នាំ រងរបួសបែកថ្លើម សន្លប់ធំ និងបុរសឈ្មោះ សួង ឡាយ អាយុ២៩ឆ្នាំ ជាអ្នកបើកបររបួសធ្ងន់ កាលពីវេលាម៉ោង១និង១០នាទីរំលងអាធ្រាត ថ្ងៃទី៣ មីនា ២០១៧ នៅលើកំណាត់ផ្លូវជាតិលេខ១។
ត្រង់ចំណុចភូមិត្របែកប្រហោង ឃុំតាសួស ស្រុកស្វាយជ្រំ ក្រឡាប់បីបួនត្រលប់ផ្ងារជើងឡើងលើ បណ្តាលឲ្យមនុស្សប្រុស២នាក់ ស្រីម្នាក់ គាបជាប់ក្នុងរថយន្តរបួសធ្ងន់ធ្ងរសន្លប់ទាំង៣នាក់ ត្រូវប្រជាពលរដ្ឋគាស់យកចេញពីក្នុងរថយន្តរួចហៅរថយន្តសាមុយដឹកបញ្ជូនមកមន្ទីរពេទ្យខេត្តស្វាយរៀង ដើម្បីសង្គ្រោះ ក៏ប៉ុន្តែបុរសម្នាក់ឈ្មោះ សុខ រ៉ាវី របួសធ្ងន់ធ្ងរបែកថ្លើម ត្រូវបញ្ជូនបន្តទៅមន្ទីរពេទ្យរាជធានីភ្នំពេញ។ បើតាមសមត្ថកិច្ចបានឲ្យដឹងថា រថយន្តដែលក្រឡាប់ម៉ាកតូយ៉ូតា ពណ៌ស ពាក់ស្លាកលេខ ភ្នំពេញ 2AN-0347 បើកបរដោយឈ្មោះ សួង ឡាយ ភេទប្រុអាយុ២៩ឆ្នាំ រស់នៅរាជធានីភ្នំពេញ របួសធ្ងន់ (សម្រាកព្យាបាលនៅមន្ទីរពេទ្យខេត្ត)។
អ្នករួមដំណើរ ឈ្មោះ សុខ រ៉ាវី ភេទប្រុស អាយុ២៩ឆ្នាំ (ជាមិត្តភក្ដិសួងម៉ៅ) មានទីលំនៅសង្កាត់ទន្លេបាសាក់ ខណ្ឌចំការមន រាជធានីភ្នំពេញ របួសធ្ងន់ធ្ងរបែកថ្លើម។ បើតាមស្ត្រីរងគ្រោះឈ្មោះ សេង ស្រីម៉ៅ អាយុ២៤ឆ្នាំ បម្រើការនៅក្នុងហាងម្ដុំព្រែកលៀប រាជធានីភ្នំពេញ មានស្រុកកំណើតនៅភូមិក្រាំងលាវ ឃុំបាទី ខេត្តតាកែវ បានឲ្យដឹងថា មុនកើតហេតុ នាងធ្វើការនៅក្នុងហាងផឹកស៊ី មួយកន្លែងនៅព្រែកលៀប រាជធានីភ្នំពេញ លុះម៉ោងប្រមាណជា៨និង០០នាទីយប់ ថ្ងៃទី២ មីនា មានបុរស២នាក់ចូលទៅផឹកស៊ីនៅក្នុងហាងនាងធ្វើការ។
ពេលនោះនាងបានស្គាល់បុរសម្នាក់ជាម៉ូយធ្លាប់ចូលផឹកស៊ី គឺមានឈ្មោះ សុខ រ៉ាវី ភេទប្រុសអាយុ២៩ឆ្នាំ មានផ្ទះនៅទន្លេបាសាក់ ខណ្ឌចំការមន រាជធានីភ្នំពេញ បាននាំបុរសម្នាក់ទៀតមិនដែលស្គាល់ចូលផឹកស៊ីជាមួយ ហើយបានឲ្យនាងផឹកស្រាបៀរ មួយកែវ បន្ទាប់មកចាប់នាងបង្អកស្រា ក៏ស្រាប់តែនាងទន់ដៃទន់ជើង ហើយឮបុរសម្នាក់នោះបបួលនាងថាតោះចេញទៅក្រៅ ទៅលេងផ្ទះខ្ញុំ នាងបានប្រកែកថា នាងមិនអាចទៅបានទេជាប់ធ្វើការ ថៅកែរករឿង។ តែជននោះបានក្រៀកនាងចេញយកមកដាក់ក្នុងរថយន្ត ក្រោយមកនាងលែងដឹងខ្លួនទាំងអស់ ពេលដឹងខ្លួនគឺនៅក្នុងមន្ទីរពេទ្យ ពេលសួរគ្រូពេទ្យៗ ប្រាប់ថា នៅមន្ទីរពេទ្យខេត្តស្វាយរៀង ក៏ឲ្យគ្រូពេទ្យទូរសព្ទ័ហៅប្តីឲ្យមកជួយមើលថែ។
រីឯបុរសជាប្តីឈ្មោះ សំ វណ្ណី អាយុ៣៣ឆ្នាំ មុខរបរជាចុងភៅ រស់នៅផ្ទះជួល សង្កាត់ព្រែកលៀប រាជធានីភ្នំពេញ បានប្រាប់ថា គាត់ និងប្រពន្ធបានរៀបការជាង៦ឆ្នាំមកហើយមានកូនម្នាក់ និងប្រពន្ធទើបតែមានផ្ទៃពោះ២ខែទៀត(នៅក្នុងផ្ទៃ) គាត់ធ្វើការជាចុងភៅ ពេលយប់ ប្រពន្ធធ្វើការពេលថ្ងៃរសៀលដល់ម៉ោង១២យប់នៅហាងក្បែរគ្នា ។ ហើយស្ត្រីរងគ្រោះមិនដែលស្គាល់ខេត្តស្វាយរៀងទេ មិននឹកស្មានថា មានគេចាប់ពង្រត់ប្រពន្ធរបស់គាត់មកពីភ្នំពេញរហូតមកគ្រោះថ្នាក់ចរាចរណ៍នៅខេត្តស្វាយរៀងដូច្នេះឡើយ ទើបប្រពន្ធឲ្យរូបគេជាប្តីដាក់ពាក្យបណ្តឹងបុរសទាំង២នាក់ ពីបទ ចាប់ពង្រត់ និងសង្សយ័ថាប៉ុនប៉ងរំលោភ។
បន្ទាប់ពីរដាក់ពាក្យបណ្តឹងសមត្ថកិច្ចនគបាលការិយាល័យព្រហ្មទណ្ឌកម្រិតធ្ងន់ស្នងការដ្ឋាននគបាលខេត្ត បានចាត់ការតាមពាក្យបណ្តឹងហើយនាល្ងាចថ្ងៃទី៣ មីនានេះ។ រីឯរថយន្តត្រូវសមត្ថកិច្ចយករថយន្តស្ទូចយកទៅរក្សាទុកនៅអធិការដ្ឋាននគបាលស្រុកស្វាយជ្រំ ដើម្បីដោះស្រាយតាមផ្លូវច្បាប់៕
ចែករំលែកព័តមាននេះ