រាជធានីភ្នំពេញ ៖ ស្ត្រីរូបស្រស់ជើងល្អម្នាក់បានក្លាយខ្លួនទៅជាចោរដោយបានរួមគំនិតគ្នាជាមួយគូស្នេហ៍របស់ខ្លួនម្នាក់ធ្វើសកម្មភាពលួចយកម៉ូតូម៉ាកហុងដាស្កូបពី១គ្រឿង ពីស្ត្រីម្នាក់ទៀតដែលជាមិត្តភក្ដិរបស់ខ្លួនទៅបាត់
រាជធានីភ្នំពេញ ៖ ស្ត្រីរូបស្រស់ជើងល្អម្នាក់បានក្លាយខ្លួនទៅជាចោរដោយបានរួមគំនិតគ្នាជាមួយគូស្នេហ៍របស់ខ្លួនម្នាក់ធ្វើសកម្មភាពលួចយកម៉ូតូម៉ាកហុងដាស្កូបពី១គ្រឿង ពីស្ត្រីម្នាក់ទៀតដែលជាមិត្តភក្ដិរបស់ខ្លួនទៅបាត់ ហើយបានគេចខ្លួនអស់រយៈពេលជិត២០ថ្ងៃទើបត្រូវបានស្ត្រីជាម្ចាស់ម៉ូតូតាមរកឃើញ ។ បន្ទាប់មកក៏បានធ្វើការឃាត់ខ្លួនប្រគល់ឲ្យនគរបាលប៉ុស្ដិ៍រដ្ឋបាលកាកាប ខណ្ឌពោធិ៍សែនជ័យ កាលពីវេលាម៉ោង២រសៀលថ្ងៃទី៣ ខែមិនា ឆ្នាំ២០១៧ ដើម្បីធ្វើការសួរនាំ ។
ស្ត្រីដែលជាជនសង្ស័យត្រូវនគរបាលចាប់ខ្លួនខាងលើនោះឈ្មោះ សៀន ស្រីលីន អាយុ២៩ឆ្នាំ ជានារីម៉ាស្សា ស្នាក់នៅក្នុងភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ បានធ្វើសកម្មភាពលួច យកម៉ូតូ១គ្រឿងម៉ាកហុងដាស្កូបពីដែលជាកម្មសិទ្ធិរបស់ស្ត្រីម្នាក់ទៀតឈ្មោះ អ៊ឹង គឹម អាយុ២៩ឆ្នាំ ស្នាក់នៅក្នុងសង្កាត់ផ្សារអូឬស្សីទី២ ខណ្ឌ៧មករា ដែលជាមិត្តភក្ដិរបស់ខ្លួន ចំណែកបុរសជាគូស្នេហ៍មិនត្រូវបានស្គាល់ឈ្មោះនោះឡើយ ។
ស្ត្រីជាម្ចាស់ម៉ូតូបានប្រាប់ឲ្យនគរបាលដឹងថា ហេតុការណ៏នោះបានកើតឡើងអស់រយៈពេលប្រហែលជិត២០ថ្ងៃកន្លងមកហើយគឺតាំងពីថ្ងៃទី១៥ ខែកុម្ភៈ ឆ្នាំ២០១៧ នៅតាមបណ្ដោយផ្លូវលេខ២០០៤ ស្ថិតនៅក្នុងភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ។ ពេលនោះនាងបានតាមរកគ្រប់ច្រកល្ហកទើបតែពេលនេះបានប្រទះឃើញស្ត្រីខាងលើកំពុងស្ថិតនៅក្នុងភូមិសាស្ត្រសង្កាត់បឹងសាឡាង ខណ្ឌទួលគោក ក៏ឃាត់ខ្លួនប្រគល់ឲ្យនគរបាលចាត់ការតាមច្បាប់ ចំណែកបុរសជាគូស្នេហ៍របស់ស្ត្រីសង្ស័យនោះបានគេចខ្លួនបាត់មិនទាន់ចាប់បាននៅឡើយទេ ។
ម្ចាស់ម៉ូតូបាននិយាយបន្តទៀតថា នាងនិងជនសង្ស័យម្នាក់នេះគឺជាមិត្តភក្ដិ និងគ្នាដែលកន្លងមកស្រលាញ់គ្នាណាស់តែងតែទៅណាមកណាជាមួយគ្នារហូត ដោយឡែកនៅមុនពេលកើតហេតុនាងបានដើរលេងជាមួយគ្នាដោយបានជិះម៉ូតូរបស់នាងលុះពេលជិះម៉ូតូទៅដល់ចំណុចមុខផ្ទះសំណាក់ពន្លឺពេជ្រ ដែលមានទីតាំងស្ថិតនៅតាមបណ្ដោយផ្លូវ លេខ២០០៤ ស្ថិតនៅក្នុង ភូមិត្រពាំងល្វា សង្កាត់កាកាប ខណ្ឌពោធិ៍សែនជ័យ ដោយសារឈឺបត់ជើងពេកនាងបានឈប់ហើយបានចូលទៅបត់ជើង ដោយបានទុកម៉ូតូនៅខាងមុខផ្ទះសំណាក់នោះ និងបានឲ្យស្ត្រីដែលជាជនសង្ស័យជួយមើល ។
លុះពេលបត់ជើងរួចចេញមកវិញស្រាប់តែបាត់ទាំងម៉ូតូ និងជនសង្ស័យព្រមទាំងប្រុសស្នេហ៍របស់គេ ផង ទើបមានការភ្ញាក់ផ្អើល និងដឹងថាពួកគេជាអ្នកលួចហើយបានតាមរកគ្រប់កន្លែងប៉ុន្តែមិនបានឃើញនោះឡើយ ហើយទោះបីជាបែបណានាងបានតាមរករហូតដល់វេលាម៉ោង១១ព្រឹកថ្ងៃទី៣ ខែមីនា ឆ្នាំ២០១៧ ទើបប្រទះឃើញក៏ឃាត់ខ្លួនប្រគល់ឲ្យនគរបាលចាត់ការតាមច្បាប់តែម្ដង ៕
ចែករំលែកព័តមាននេះ