រាជធានីភ្នំពេញ ៖ នៅរសៀលថ្ងៃសៅរ៍ទី៤ មីនា ស្អែកនេះ ប្រដាល់អន្តរជាតិរបស់ក្រុមហ៊ុនខារ៉ាបាវ មិនមានការប្រកួតរវាងបេក្ខភាពដណ្ដើមខ្សែក្រវាត់ដូចសប្ដាហ៍មុនទៀតទេ បន្ទាប់ពីបានរកឃើញបេក្ខភាព២រូបឡើងទៅប្រកួត ដណ្ដើមខ្សែក្រវាត់រួចរាល់ ដើម្បីទុកពេលឱ្យបេក្ខភាពទាំង២ហ្វឹកហាត់ដំឡើងក្បាច់គុនឱ្យបានច្រើន ។ ទោះបីយ៉ាងណា ព្រឹត្តិការណ៍ទាំងមូលនៅតែមានការប្រកួតអន្តរជាតិ ដោយម្ចាស់ខ្សែក្រវាត់ឆៃ សារ៉ា និងធី តុងហ៊ី គឺជាបេក្ខភាពតំណាងឱ្យកីឡាករកម្ពុជាឡើងប្រកួតជាមួយកីឡាករថៃជាលក្ខណៈមិត្តភាព ។
ព្រឹត្តិការណ៍ប្រដាល់អន្តរជាតិដណ្ដើមខ្សែក្រវាត់របស់ក្រុមហ៊ុនភេសជ្ជៈខារ៉ាបាវវគ្គ២នេះ ត្រូវគេមើលឃើញថា មានការគាំទ្រដាច់ឆ្ងាយតែម្ដង បើធៀបនឹងការប្រកួតអន្តរជាតិកាលពីវគ្គ១ ដោយសារតែសមាសភាពកីឡាករទាំងខាងកម្ពុជា និងខាងបរទេសសុទ្ធតែមានកម្រិតល្អ ហើយមើលទៅម្នាក់ៗបញ្ចេញថ្វីដៃគួរឱ្យទាក់ទាញរៀងខ្លួន ។ ជាពិសេស នៅពេលការប្រកួតបានសម្រេចរកឃើញកីឡាករកម្ពុជា១រូប និងឡាវមួយរូបឱ្យឡើងប្រកួតយកខ្សែក្រវាត់ ដែលនឹងធ្វើឡើងនៅសប្ដាហ៍ក្រោយ ។ សម្រាប់ការប្រកួតរសៀលនេះក៏ចាត់ទុកថា នឹងនៅតែមានការចាប់អារម្មណ៍ខ្ពស់ផងដែរ ដោយសារតែកីឡាករដែលចូលខ្លួនប្រកួតកំដររេញសុទ្ធតែល្អ ។ កីឡាករកម្ពុជាត្រូវបានអះអាងថា សម្ងំហ្វឹកហាត់មិនខុសគ្នានោះទេ ដោយសារតែចង់យកឈ្នះគូប្រកួតនៅលើសង្វៀនអន្តរជាតិរបស់ខារ៉ាបាវ ដែលជាសង្វៀនប្រដាល់ចម្រុះដោយអ្នកប្រដាល់ខ្លាំងៗនៅក្នុងពិភពប្រដាល់ ។ ទោះបីយ៉ាងណា គេមិនទាន់ដឹងថា កីឡាករណាមួយនឹងមានលទ្ធភាពឈ្នះនៅឡើយនោះទេ ដោយសារតែភាគីទាំងសងខាងសុទ្ធតែបានត្រៀមទុកពីចម្ងាយ ហើយជាមួយនឹងប្រវត្តិចាញ់ខ្លះ ឈ្នះខ្លះសុទ្ធតែជាលក្ខខណ្ឌដែលធ្វើឱ្យពួកគេត្រូវការស្ដារមុខមាត់ ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជាជើងខ្លាំង២រូបខាងលើ នឹងធ្វើការប្រកួតជាលក្ខណៈមិត្តភាពជំនួសឱ្យកីឡាករដណ្ដើមខ្សែក្រវាត់ខារ៉ាបាវ ។ កីឡាករ ឆៃ សារ៉ា ដែលជាម្ចាស់ខ្សែក្រវាត់ទម្ងន់៦៣,៥គីឡូក្រាមមួយរូប ត្រូវប៉ះប្រកួតជាមួយកីឡាករថៃឈ្មោះថា ហានអេក ក្នុងនាមជាគូឯកអន្តរជាតិ ។ លោកជឿជាក់ថា កីឡាករកម្ពុជាមិនភ្លាត់ឱ្យចាញ់សម្រាប់ការប្រកួតនេះទេ ដោយសារតែគេបើឈ្នះ គឺនឹងឡើងក្រេឌីត តែបើចាញ់គឺស្ពឹកមុខ ។ កីឡាករ ថា ហានអេក ធ្លាប់ប្រកួត៨៨លើក ឈ្នះ៧៦លើក ចាញ់១០លើក និងស្មើ២លើក ក្នុងពេលដែលកីឡាករកម្ពុជាឆ្លងកាត់ការប្រកួតរហូតដល់៦៨លើក ឈ្នះ៥៦លើក ចាញ់១១លើក និងស្មើ១លើក ។
សម្រាប់កីឡាករ ធី តុងហ៊ី លោកញាណសុធី បញ្ជាក់ថា គេកាន់តែត្រូវការឈ្នះដើម្បីរក្សាមុខមាត់ បើមិនដូច្នោះគេនឹងបាក់មុខមាត់កាន់តែខ្លាំងប្រសិនបើបណ្ដោយឱ្យចាញ់លើកនេះ ។ លោកថា គេត្រូវប៉ះប្រកួតជាមួយកីឡាករថៃឈ្មោះ ភេត ក្វាន់មឿង ដោយការប្រកួតមួយនេះគឺភាគីខាងណាក៏មិនចង់ចាញ់នាំឱ្យមានការរិះគន់ ។ កីឡាករថៃរូបនេះលោកថាធ្លាប់ប្រកួត៦៦លើក ឈ្នះ៥៤លើក ចាញ់១១លើក និងស្មើ១លើក ក្នុងពេលកីឡាករកម្ពុជាធ្លាប់ប្រកួតបានដល់៩៩លើក ឈ្នះ៧៨លើក ចាញ់១៨លើក និងស្មើ៣លើក ។ យ៉ាងណាក៏ដោយ គេនៅមិនទាន់ប្រាកដថាធី តុងហ៊ី ដែលមានបទពិសោធន៍ច្រើនជាងនឹងទប់ជាប់នោះទេ ក្នុងពេលដែលគូប្រកួតរបស់គេក៏ត្រូវការឈ្នះដែរនោះ ៕
ចែករំលែកព័តមាននេះ