រាជធានីភ្នំពេញ ៖ លោក Leonardo Luis ជនជាតិប្រេស៊ីល អាយុ៤៤ឆ្នាំ ត្រូវបានសហព័ន្ធកីឡាបាល់ទាត់កម្ពុជា(FFC) សម្រេច តែងតាំងជាគ្រូបាល់ទាត់ក្រុមជម្រើសជាតិកម្ពុជា អាណត្តិថ្មី រយៈពេល
រាជធានីភ្នំពេញ ៖ លោក Leonardo Luis ជនជាតិប្រេស៊ីល អាយុ៤៤ឆ្នាំ ត្រូវបានសហព័ន្ធកីឡាបាល់ទាត់កម្ពុជា(FFC) សម្រេច តែងតាំងជាគ្រូបាល់ទាត់ក្រុមជម្រើសជាតិកម្ពុជា អាណត្តិថ្មី រយៈពេល១ឆ្នាំជំនួសលោក Lee Tea Hoon ដែលត្រូវបានបញ្ចប់អាណត្តិ ។
នៅក្នុងសន្និសីទសារព័ត៌មានស្តីពីការប្រកាសតែងតាំងគ្រូបាល់ទាត់ជម្រើសជាតិកម្ពុជាអាណត្តិថ្មីនៅសណ្ឋាគារភ្នំពេញ កាលពីថ្ងៃទី២ មីនាកន្លងមកនេះ លោកនាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជាបានមានប្រសាសន៍ថា លោក Leonardo Luis ជាគ្រូបង្ហាត់មានចិត្តសាស្ត្រ បច្ចេកទេស និងសមត្ថភាពខ្ពស់ដែលអាចដឹកនាំក្រុមជម្រើសជាតិកម្ពុជាទទួលជោគជ័យក្នុងការប្រកួតកីឡាស៊ីហ្គេមនៅពេលកម្ពុជាធ្វើជាម្ចាស់ផ្ទះនៅឆ្នាំ២០២៣ ។
នេះគឺជាលើកទី១ហើយដែលសហព័ន្ធកីឡាបាល់ទាត់កម្ពុជាសម្រេចជ្រើសរើសគ្រូជនជាតិប្រេស៊ីលនិងគ្រូជំនួយជនជាតិប្រេស៊ីល២រូបទៀតមកជួយបង្ហាត់ដល់ក្រុមកីឡាបាល់ទាត់ជម្រើសជាតិកម្ពុជា ។ FFC ផ្តល់ប្រាក់ខែក្នុង១ខែ១២.០០០ដុល្លារអាមេរិកក្នុងគ្រូម្នាក់ ព្រមទាំងផ្ដល់កន្លែងស្នាក់នៅហូបចុក មធ្យោបាយធ្វើដំណើរ និងអនុញ្ញាតឱ្យធ្វើដំណើរទៅលេងស្រុកកំណើតមួយឆ្នាំម្ដងហើយសហព័ន្ធកីឡាបាល់ទាត់កម្ពុជា ជាអ្នករ៉ាប់រងទាំងអស់ ។
លោកនាយឧត្តមសេនីយ៍បានបញ្ជាក់ថា មូលហេតុដែលនាំឱ្យលោកជ្រើសរើសយកគ្រូប្រេស៊ីលមកបង្ហាត់ដោយលោកយល់ឃើញថា វិស័យកីឡាបាល់ទាត់នៅប្រទេសប្រេស៊ីលមានការរីកចម្រើនខ្លាំង មានវិធីសាស្ត្រនិងចិត្តសាស្ត្រល្អធ្វើឱ្យលោកមានទំនុកចិត្តលើគាត់ក្នុងការដឹកនាំក្រុមកីឡាបាល់ទាត់ជម្រើសជាតិកម្ពុជាឱ្យទទួលជោគជ័យពេលកម្ពុជាទទួលធ្វើជាម្ចាស់ផ្ទះកីឡាស៊ីហ្គេមនៅឆ្នាំ២០២៣ខាងមុខ ។
លោកនាយឧត្តមសេនីយ៍បានបន្តឱ្យដឹងទៀតថា សហព័ន្ធកីឡាបាល់ទាត់កម្ពុជាមានបេសកកម្មសំខាន់មួយចំនួន និងបានដាក់ចេញនូវផែនការយុទ្ធសាស្ត្រក្នុងការអភិវឌ្ឍយុវជនថ្នាលនៅក្នុងឆ្នាំ២០០៦ ជាសហព័ន្ធកីឡាបាល់ទាត់អន្តរជាតិ(FIFA) ។ ម្យ៉ាងវិញទៀត រយៈពេលប៉ុន្មានឆ្នាំចុងក្រោយនេះ វិស័យកីឡាបាល់ទាត់របស់យើងមានការប្រែប្រួលច្រើន ដូច្នេះសម្រាប់គ្រូបង្ហាត់ក៏មានការប្រែប្រួលដែរដើម្បីដើរឱ្យទាន់សភាពការណ៍នៃការអភិវឌ្ឍកីឡាបាល់ទាត់។
លោក Leonardo Luis បានមានប្រសាសន៍ថា មូលហេតុដែលលោកសម្រេចចិត្តមកកម្ពុជា ដោយសារតែលោកមើលឃើញថាកម្ពុជាមានផែនការច្បាស់លាស់សម្រាប់ការប្រកួតកីឡាស៊ីហ្គេមនៅឆ្នាំ២០២៣ ។ កីឡាករបាល់ទាត់កម្ពុជាមានទេពកោសល្យល្អ និងមានការគាំទ្រពីមហាជនច្រើន ។ ចាបពីពេលដែលលោកមកធ្វើជាគ្រូលោកមិនផ្ដោតទៅលើកីឡាករណាម្នាក់នោះទេ និយាយរួមមិនឱ្យមានកីឡាករSuper Star តែម្នាក់នោះឡើយ សំខាន់ផ្ដោតទៅលើការលេងជាក្រុមទើបជា Super Star ក្នុងចិត្តរបស់លោក ។ អ្វីដែលសំខាន់ជាងនេះទៅទៀតនោះ លោកមានបំណងចង់ជួយអភិវឌ្ឍវិស័យកីឡាបាល់ទាត់នៅកម្ពុជាឱ្យមានការរីកចម្រើនទាំងកម្រិតថ្នាលនិងឈុតធំ ។
លោក SOMWANG MANPIMONGCHAI នាយកក្រុមហ៊ុន SCG ដែលជាក្រុមហ៊ុនដ៏ធំនៅប្រទេសថៃមកវិនិយោគនៅកម្ពុជាជាច្រើនឆ្នាំមកហើយនោះ បានបង្ហាញមោទនភាពនិងសម្ដែងនូវការគាំទ្រយ៉ាងខ្លាំងដល់សហព័ន្ធកីឡាបាល់ទាត់កម្ពុជា ។ កន្លងមក ក្រុមហ៊ុនរបស់លោកតែងតែរួមចំណែកនៅក្នុងសង្គម និងមានកិច្ចសហការល្អជាមួយសហព័ន្ធកីឡាបាល់ទាត់កម្ពុជា ៕
ចែករំលែកព័តមាននេះ