រាជធានីភ្នំពេញ ៖ កីឡាករ ធន់ ចាន់តាក់ មកពីសមាគមកីឡាប្រដាល់ក្រសួងការពារជាតិ និ ងរិន សារ័ត្ន មកពីក្លិបទីបញ្ជាការកងទ័ពជើងទឹក ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀន
រាជធានីភ្នំពេញ ៖ កីឡាករ ធន់ ចាន់តាក់ មកពីសមាគមកីឡាប្រដាល់ក្រសួងការពារជាតិ និ ងរិន សារ័ត្ន មកពីក្លិបទីបញ្ជាការកងទ័ពជើងទឹក ត្រូវបានគេរៀបចំឱ្យជួបប្រកួតជាមួយកីឡាករថៃនៅលើសង្វៀនទូរទស្សន៍ស៊ីអិនស៊ី ថ្ងៃអាទិត្យ ទី៥ មីនា ខានស្អែកនេះ ។ អ្នកនិយមទស្សនាកីឡាប្រដាល់ភាគច្រើនកំពុងទន្ទឹងរង់ចាំមើលថា តើកីឡាករកម្ពុជាទាំង២រូបនេះអាចយកឈ្នះគូប្រកួតបានដោយរបៀបណា ខណៈកីឡាករថៃត្រូវគេដឹងថាមានសមត្ថភាពពិបាកផ្ដួលអីុចឹងនោះ។
ធន់ ចាន់តាក់ ត្រូវជួបប្រកួតជាមួយកីឡាករថៃឈ្មោះសក្ដិសិទ្ធ ស.អ៊ូឌីយីម ក្នុងប្រភេទទម្ងន់៦៣,៥គីឡូក្រាម ។ កីឡាករ ធន់ ចាន់តាក់ មានកម្ពស់១,៦៧ម៉ែត្រ ធ្លាប់ប្រកួត៥៩ដង ឈ្នះ៤៧ដង ចាញ់៩ដង ស្មើ៣ដង និងធ្លាប់ផ្ដួលគូប្រកួតឱ្យសន្លប់បាន២៣ដង ក្នុងពេលកីឡាករថៃដែលមិនធ្លាប់មកប្រកួតនៅលើសង្វៀនស្រុកខ្មែរមានកម្ពស់១,៦៧ម៉ែត្រធ្លាប់ប្រកួត៦០ដងឈ្នះ៤៥ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៨ដង ។ ទោះបីកីឡាករកម្ពុជាមានក្រេឌីតល្អជាងមែន ក៏មិនត្រូវមើលស្រាលកីឡាករថៃបានដែរ ដោយសារមួយរយៈចុងក្រោយនេះ សមាសភាពកីឡាករថៃដែលគេយកមកប្រកួតនៅលើសង្វៀនស្រុកខ្មែរភាគច្រើនសុទ្ធតែខ្លាំង កម្រចាញ់កីឡាករកម្ពុជាណាស់។
ចំណែករិន សារ័ត្ន ត្រូវជួបប្រកួតជាមួយកីឡាករថៃឈ្មោះម៉ាំងកនឡេក ស.អ៊ូឌីយីម ក្នុងប្រភេទទម្ងន់៦៥គីឡូក្រាម ។ រិន សារ័ត្ន ធ្លាប់ប្រកួត២៤ដង ឈ្នះ១៥ដង ចាញ់៧ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៧ដង ក្នុងពេលកីឡាករថៃដែលមិនដែលលេចមុខនៅលើសង្វៀនស្រុកខ្មែររូបនោះធ្លាប់ប្រកួតបាន៥០ដង ឈ្នះ៣៥ដង ចាញ់១៣ដង ស្មើ២ដង និងធ្លាប់ផ្ដួលគូប្រកួតឱ្យសន្លប់បាន៣ដង។
ទោះបីយ៉ាងណា គេមិនអាចមើលស្រាលលើ រិន សារ័ត្ន បានទេព្រោះ កីឡាករកម្ពុជារូបនេះធ្លាប់ធ្វើជាអ្នកប្រដាល់វាយដាក់ទ្រុងដ៏ពូកែម្នាក់ដូច្នេះថ្វីដៃប្រកួតរបស់គេពិតជាមិនអន់ប៉ុន្មានឡើយ ។
រីឯគូប្រកួតមិត្តភាពធម្មតាវិញមានកីឡាករ ចាន់ សច្ចា មកពីក្លិបតាព្រហ្មមានជ័យ ប្រកួតជាមួយកីឡាករ ភិន សុទី មកពីក្លិបទីបញ្ជាការកងទ័ពជើងទឹក ។ កីឡាករ ទេស ជីវ៉ា មកពីក្លិបកងពលតូចលេខ៧០ ប្រកួតជាមួយកីឡាករ ផៃ គឹមហឿត មកពីក្លិបគីសែមានរិទ្ធ ។ កីឡាករ ព្រឿង សុជាតិ មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករ ឡុង ជិន មកពីក្លិបខ្លារខិនមានរិទ្ធ និងកីឡាករ ពុទ្ធ សុគុណ មកពីក្លិបពុទ្ធសិរីវង្សព្រែកតាទែន ប្រកួតជាមួយកីឡាករ ចិត្រ សឿង មកពីក្លិបសុភានូមានជ័យ ៕
ចែករំលែកព័តមាននេះ