ឆ្នាំ2016ជួយសង្គ្រោះពលរដ្ឋខ្មែររងគ្រោះដោយការជួញដូរបានជាង300នាក់
រាជធានីភ្នំពេញ ៖ យោងតាមរបាយការណ៍របស់ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា សម្រាប់ឆ្នាំ២០១៦កន្លងមក
រាជធានីភ្នំពេញ ៖ យោងតាមរបាយការណ៍របស់ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា សម្រាប់ឆ្នាំ២០១៦កន្លងមក ក្រសួងការបរទេសបានជួយសង្គ្រោះ និងធ្វើមាតុភូមិនិវត្តន៍ពលរដ្ឋខ្មែរពីបរទេសសរុបចំនួន៨១៥នាក់ ក្នុងនោះមានជនរងគ្រោះដោយអំពើជួញដូរមនុស្សមានចំនួន ៣៦៦នាក់ ។
របាយការណ៍នេះ ត្រូវបានលើកឡើងនៅក្នុងសន្និបាតបូកសរុបលទ្ធផលការងារឆ្នាំ២០១៦ និងលើកទិសដៅការងារសម្រាប់ឆ្នាំ២០១៧របស់ក្រសួងការបរទេស និងសហប្រតិបត្តិការអន្តរជាតិ កាលពីចុងខែកុម្ភៈ កន្លងមកនេះ ។
របាយការណ៍ក្រសួងការបរទេសដដែល បានបញ្ជាក់ថា ក្នុងឆ្នាំ២០១៦កន្លងទៅ កម្ពុជាបានបញ្ជូនពលករខ្មែរទៅធ្វើការនៅក្រៅប្រទេសចំនួន៨៥.៥៧៦នាក់ផងដែរ ។
ចំណែករបាយការណ៍របស់នាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃវិញ បានឲ្យដឹងថា ក្នុងរយៈពេល៣ឆ្នាំចុងក្រោយនេះ ក្រសួងមហាផ្ទៃ បានឃាត់ខ្លួនជនបរទេសដែលឆ្លងដែនខុសច្បាប់ មានការស្នាក់នៅផុតកំណត់ទិដ្ឋាការ និងស្នាក់នៅបង្កឲ្យប៉ះពាល់ដល់សន្តិសុខជាតិ និងបានបញ្ជូនទៅប្រទេសរបស់គេវិញមានចំនួន១២.០៨៨នាក់ មាន៧៧សញ្ជាតិ ។
របាយការណ៍បានបញ្ជាក់ថា ដោយឡែកសម្រាប់រយៈពេល២ខែដើមឆ្នាំ២០១៧នេះ អាជ្ញាធរកម្ពុជា បានបណ្តេញជនបរទេសឲ្យចេញពីប្រទេសរបស់ខ្លួនជាង៤០០នាក់ មាន២៤សញ្ជាតិផងដែរ ៕
ចែករំលែកព័តមាននេះ