រាជធានីភ្នំពេញ ៖ ទីបំផុតគណបក្សសង្គ្រោះជាតិ បានដំណើរការសមាជវិសាមញ្ញជ្រើសរើសក្បាលម៉ាស៊ីន ដឹកនាំថ្មីរបស់ខ្លួនចេញផ្លូវការហើយនៅព្រឹកថ្ងៃទី២ មីនា
រាជធានីភ្នំពេញ ៖ ទីបំផុតគណបក្សសង្គ្រោះជាតិ បានដំណើរការសមាជវិសាមញ្ញជ្រើសរើសក្បាលម៉ាស៊ីន ដឹកនាំថ្មីរបស់ខ្លួនចេញផ្លូវការហើយនៅព្រឹកថ្ងៃទី២ មីនា តាមការគ្រោងទុកដោយជ្រើសរើសប្រធានមួយរូប អនុប្រធានបីរូប ដើម្បីប្រកួតប្រជែងក្នុងការបោះឆ្នោតនៅពេលខាងមុខនេះ ដែលក្រុមអ្នកតាមដាននិយាយថា អាប៉ោងបានបើកគ្របហើយ ។
សម្រាប់បេក្ខភាពថ្មីនេះ គឺមានប្រធានលោកកឹម សុខា និងអនុប្រធានមានដល់ទៅបីរូបមានលោក ប៉ុល ហំម លោក អេង ឆៃអ៊ាង និងលោកស្រី មួរ សុខហួរ ។ សមាសភាពត្រូវបានស្វាគមន៍ដោយគណបក្សប្រជាជនកម្ពុជា(CPP)ដើម្បីប្រកួតប្រជែងក្នុងការបោះឆ្នោត នាពេលខាងមុខនេះ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងនៅថ្ងៃទី២ មីនា ថាយោងតាមលទ្ធផលនៃសមាជវិសាមញរបស់គណបក្សសង្គ្រោះជាតិ (CNPP) នាព្រឹកថ្ងៃទី២ មីនា នេះ លោក កឹម សុខា ត្រូវបានសមាជបោះឆ្នោតគាំទ្រ ជាប្រធានគណបក្ស លោក ប៉ុល ហំម អេង ឆៃអ៊ាង និង លោកស្រី មួរ សុខហួរ ជា អនុប្រធាន ។
អ្នកនាំពាក្យគណបក្សប្រជាជនកម្ពុជា សូមគោរពឆន្ទៈនៃសមាជវិសាមញរបស់គណបក្ស សង្គ្រោះជាតិ ហើយចាត់ទុកលទ្ធផលនេះជាកិច្ចការផ្ទៃក្នុងរបស់គណបក្ស cnrp ។ លោកបញ្ជាក់ថា «គណបក្សប្រជាជនកម្ពុជា សូមស្វាគមន៍ បេក្ខជនដ៏ខ្លាំង និងមានសក្តានុពលរបស់គណបក្សដៃគូប្រកួតប្រជែង ដើម្បីឲ្យជ័យជំនះរបស់គណបក្សប្រជាជនកម្ពុជា កាន់តែមានអត្ថន័យជ្រាលជ្រៅថែមទៀត» ។
ថ្លែងក្នុងសមាជវិសាមញ្ញនៅស្នាក់ការគណបក្សសង្គ្រោះជាតិ លោក កឹម សុខា ដែលត្រូវបានសមាជលើកដៃគាំទ្របានថ្លែងថា គណបក្សសង្គ្រោះជាតិ បានចេញគោលនយោបាយអាទិភាពចំនួន ៥ចំណុច ដើម្បីធ្វើការឃោសនាផ្សព្វផ្សាយដល់ម្ចាស់ឆ្នោត ក្នុងការប្រកួតប្រជែងជាមួយគណបក្សនយោបាយផ្សេងៗ ដូចជា៖ ទី១ ពង្រឹងសិទ្ធិអំណាចប្រជាពលរដ្ឋ ទី២ លើកកម្ពស់ជីវភាពប្រជាពលរដ្ឋ និងអភិវឌ្ឍន៍ ទី៣ សេវាសាធារណៈ ទី៤ សន្តិសុខ និងទី៥ វិមជ្ឍការ ។
ជាមួយគ្នានោះដែរលោក កឹម សុខា ក៏បានគូសបញ្ជាក់ថា សម្រាប់គោលនយោបាយ ទី៥ ដែលនិយាយពីវិមជ្ឈកា គឺការផ្តល់ថវិកា ចំនួន ៥០ម៉ឺនដុល្លារ ដល់ឃុំ សង្កាត់នីមួយៗ នៅពេលគណបក្សលោក ឈ្នះឆ្នោតដឹកនាំរដ្ឋាភិបាល ដើម្បីឲ្យថ្នាក់ដឹកនាំឃុំ សង្កាត់ យកទៅប្រើប្រាស់ក្នុងឃុំ សង្កាត់ លើគ្រប់វិស័យផងដែរ ។
លោកបញ្ជាក់ថា «វិមជ្ឈការថវិកា សំខាន់ណាស់! ចង់ឲ្យមានអំណាចក្នុងមូលដ្ឋាន ចង់ឲ្យធ្វើកិច្ចការក្នុងមូលដ្ឋានបាន បើលុយនៅថ្នាក់លើធ្វើមិនកើតទេ ។ អញ្ចឹងហើយគណបក្សសង្គ្រោះជាតិ យល់ឃើញថា ដើម្បីឲ្យមូលដ្ឋានមានភាពរស់រវើក និងជាឃុំ សង្កាត់មួយមានភាពទំនើប ជាឃុំ សង្កាត់មួយដែលមានសកម្មភាពពិតប្រាកដនោះ ទាល់តែទំលាក់លុយទៅ ។ ទម្លាក់យ៉ាងម៉េច គឺទាល់តែទម្លាក់ថវិការ៥០ម៉ឺនដុល្លារដល់ឃុំ សង្កាត់នីមួយៗក្នុង១ឆ្នាំ» ។
យ៉ាងណាក្តីសម្រាប់ការសន្យាទម្លាក់លុយនេះត្រូវបានលោក កឹម សុខា ថា លោកមិនអួតមិនអាងនោះទេ តែលោកថា កាលលោក កែម ឡី នៅមានជីវិតលោកនិយាយថា ក្នុងសង្កាត់មួយត្រូវការលុយ១លានដុល្លារ ។
លោក កឹម សុខា បានសន្យាថា នៅពេលដែលគណក្សសង្គ្រោះជាតិទទួលជ័យជំនះ នឹងធ្វើអ្វីដែលគោលនយោបាយដាក់ជូននៅថ្ងៃនេះ ឬអាចច្រើនជាងនេះទៅទៀត ។
ការដែលគណបក្សសង្គ្រោះជាតិ ឈានដល់ធ្វើសមាជវិសាមញ្ញានេះ ត្រូវបានលោក កឹម សុខា បានលើកឡើងថា ដោយសារស្ថានការណ៍នយោបាយនៅក្នុងប្រទេសកម្ពុជា មកពីការលា លែងតំណែងរបស់លោក សម រង្ស៊ី ។
គណបក្សសង្គ្រោះជាតិ បានរៀបចំសមាជវិសាមញ្ញ គឺមានរបៀបវារៈ ៖
១-ពិភាក្សា និងអនុម័ត វិសោធនកម្មលក្ខន្ដិកៈគណបក្ស ប្រការ៤៥ និងប្រការ៤៧
២-បោះឆ្នោតជ្រើសតាំងប្រធាន និងអនុប្រធានគណបក្ស
៣-អបអរសាទរបញ្ជីបេក្ខជនឈរឈ្មោះក្រុមប្រឹក្សាឃុំ-សង្កាត់ របស់គណបក្សសង្គ្រោះជាតិ
៤-ពិភាក្សា និងអនុម័តគោលនយោបាយអាទិភាព៥ចំណុច សម្រាប់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ ។
សមាសភាពចូលរួមក្នុងសមាជវិសាមញ្ញគណបក្សសង្គ្រោះជាតិនេះ រួមមាន៖
១-គណៈកម្មាធិការអចិន្ដ្រៃយ៍
២-គណៈកម្មាធិការនាយក
៣-ក្រុមការងារ រាជធានី-ខេត្ត ទាំង២៥
៤-គណៈកម្មាធិការប្រតិបត្តិខេត្ត (អចិន្ត្រៃយ៍៥រូប) ទាំង២៥
៥-ប្រធានគណៈកម្មាធិការប្រតិបត្តិក្រុង ស្រុក ខណ្ឌ
៦-ប្រធានចលនាយុវជនខេត្ត
៧-ប្រធានចលនាស្ត្រីខេត្ត ។
បើតាមការសង្កេតចំពោះការធ្វើសមាជលើកនេះ មិនឃើញមានវត្តសកម្មជនគណបក្សសង្គ្រោះជាតិ ច្រើនចូលរួមដូចកាលពីធ្វើសមាជលើកមុននោះទេ ។ ជាងនេះសមាជិកគណបក្សសង្គ្រោះជាតិមួយចំនួន ក៏មិនឃើញវត្តមាននៅសមាជវិសាមញ្ញនេះដែរ ។
សម្តេចតេជោ ជូនពរលោក កឹម សុខា ប្រធានគណបក្សសង្គ្រោះជាតិ
បន្ទាប់ពីគណបក្សសង្គ្រោះជាតិ បានធ្វើសមាជវិសាមញ្ញជ្រើសរើសក្បាលម៉ាស៊ីនដឹកនាំថ្មី ហើយនៅព្រឹកថ្ងៃទី២ ខែមីនា ឆ្នាំ២០១៧ ប្រធានមួយរូប អនុប្រធានបីរូប ដើម្បីប្រកួតប្រជែងការបោះឆ្នោត នៅពេលខាងមុខនេះ ប្រធានគណបក្សប្រជាជនកម្ពុជា បានចេញលិខិតជូនពរ ។
សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី២ មីនា បានសសេរលិខិតមួយច្បាប់ ជូនពរលោក កឹម សុខា ដែលត្រូវបានសមាជវិសាមញ្ញជ្រើសរើសជាប្រធានគណបក្សសង្គ្រោះជាតិ ។
លិខិតសម្តេចតេជោ ហ៊ុន សែន ប្រធានគណបក្សប្រជាជនកម្ពុជា បញ្ជាក់ថា «នៅក្នុងឱកាសដែលឯកឧត្តមត្រូវបានជ្រើសតាំងជាប្រធានគណបក្សសង្គ្រោះជាតិ ខ្ញុំសួមជូនពរឯកឧត្តមមានសុខភាពល្អ និងសុភមង្គលក្នុងគ្រួសារ» ៕
ចែករំលែកព័តមាននេះ