រាជធានីភ្នំពេញ ៖ ភាពយន្តចម្រៀង«ជីវិតក្មេងវត្ត» ដែលជាភាពយន្តចម្រៀងបង្ហាញពីជីវិតសម្តេចតេជោ ហ៊ុន សែន នាយករដ្ឋមន្ត្រីកម្ពុជា ពេលផ្ញើខ្លួននឹងព្រះសង្ឃ ដើម្បីសិក្សារៀនសូត្រក្នុងរាជធានីភ្នំពេញនឹងត្រូវបង្ហាញជូនសាធារណៈជននៅថ្ងៃទី២៨ ខែកញ្ញា ឆ្នាំ២០២២។
ពិធីសម្ពោធភាពយន្តចម្រៀង «ជីវិតក្មេងវត្ត»នឹងត្រូវធ្វើឡើងក្រោមអធិបតីភាពលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងមានការអញ្ជើញចូលរួមពីភ្ញៀវកិត្តិយស ព្រមទាំងអ្នកសិល្បៈល្បីៗជាច្រើនរូបទៀតនៅទីស្តីការក្រសួងរៀបចំដែនដីនគរូបនីយកម្ម និងសំណង់។
ភាពយន្តចម្រៀង «ជីវិតក្មេងវត្ត» មានរយៈពេលប្រមាណ៣០នាទីដែលភាពយន្តចម្រៀង «ជីវិតក្មេងវត្ត» លាតត្រដាងពីជីវិតតស៊ូរបស់សម្តេចតេជោ នៅពីកុមារភាពឃ្លាតឆ្ងាយឪពុកម្តាយ និងភូមិស្រុក មកផ្ញើវាសនានឹងព្រះសង្ឃក្នុងទីអារាមនៅរាជធានីភ្នំពេញ ដើម្បីស្រវាវិជ្ជានឹងក្រេបយកចំណេះដឹង។
ភាពយន្តចម្រៀង «ជីវិតក្មេងវត្ត» នេះចំណាយថវិកាផលិតអស់ជាង១២ម៉ឺនដុល្លារ ដែលចំណាយពេលលើការផលិតជិត១ឆ្នាំ តាំងពីការរើសទីតាំងថត តួសម្តែង ការថតរហូតដល់ការកាត់តជាដើម។
លោកស្រី ចន ច័ន្ទលក្ខិណា ប្រធានសមាគមសិល្បករខ្មែរបានបញ្ជាក់ឲ្យដឹងថា នេះជាវណ្ណកម្មដ៏វិសេសវិសាលបំផុត ដែលផលិតករតួសម្តែង ក្រុមការងារទាំងអស់ក៏ដូចជា អ្នកឧបត្ថម្ភគាំទ្រ ជាពិសេសអ្នកដឹកនាំរឿង លោក ហ្វៃ សំអាង រួមគ្នាយកចិត្តទុកដាក់ប្រើអស់កម្លាំងចិត្ត សមត្ថភាព និងធនធាន ដើម្បីផលិត ភាពយន្តចម្រៀង ប្រវត្តិសាស្ត្រនេះឲ្យល្អបំផុតព្រោះជាប្រវត្តិរឿងរ៉ាវ និងការតស៊ូរបស់នាយករដ្ឋមន្ត្រី គឺសម្តេចតេជោ ហ៊ុន សែន ដើម្បីទុកជាគំរូសម្រាប់ប្រជាជនខ្មែរទូទៅ ពិសេសយុវជនដែលជាទំពាំងស្នងឫស្សី។
តួអង្គសម្តែងក្នុងរឿងនេះ សុទ្ធសឹងជាសិល្បករសិល្បការិនីល្បីៗ ដែលមានបទពិសោធន៍គ្រប់គ្រាន់ក្នុងការសម្តែងបានគ្រប់រសជាតិជីវិត យំ សើច កើតទុក្ខ មុខជូរ… គឺអាចធ្វើបានទាំងអស់។
លោកស្រី ផលិតករូបនេះបានធ្វើការកោតសរសើរ និងវា.យតម្លៃខ្ពស់ដល់ក្រុមការងារ សិល្បករសិល្បការិនីដែលមានការលះបង់កម្លាំងកាយចិត្តក្នុងការសម្តែង មិនថា ក្តៅ រងារ យប់ថ្ងៃ ចុះបឹង ប្រឡាក់ភក់យ៉ាងណាក្តីនៅប្រឹងរហូតជោគជ័យ តួយ៉ាងកញ្ញា ឌួង ហ្សូរីដា បានលះបង់សក់ជាទីស្រលាញ់ កាត់ខ្លី ដើម្បីតម្រូវតាមសាច់រឿង។
លោក ហ្វៃ សំអាង ដែលជាអ្នកដឹកនាំភាពយន្តចម្រៀង ជីវិតក្មេងវត្ត បានបញ្ជាក់ឲ្យដឹងថា វណ្ណកម្មប្រវត្តិសាស្ត្រដ៏វិសេសវិសាលនេះ មានកិច្ចការនិងការសម្រេចចិត្តធំៗដែលត្រូវធ្វើឡើងយ៉ាងយកចិត្តទុកដាក់ ទាំងភាសាសន្ទនា ការជ្រើសរើសតួសម្តែង ទីតាំងថត ក្រៅពីនោះនៅមានសម្ភារបច្ចេកទេសទំនើប បច្ចេកទេសកាត់តដែលត្រូវប្រើប្រាស់បម្រើដល់ការផលិត ក្នុងនោះមានក្រុមការងារជំនាញពីគ្រប់ផ្នែកដែលមិនអាចខ្វះបាន។
លោក ហ្វៃ សំអាង ក្នុងនាមអ្នកដឹកនាំសម្តែងដែលមានសមត្ថភាព បានបង្ហាញអារម្មណ៍រំភើបចំពោះវណ្ណកម្ម ភាពយន្តចម្រៀង ជីវិតក្មេងវត្ត ហើយបានរំលឹកពីការយកចិត្តទុកដាក់ ផ្តល់អនុសាសន៍ និងការណែនាំដ៏ខ្ពង់ខ្ពស់បំផុត ពីសម្តេចតេជោ ហ៊ុន សែន ដែលសម្តេចតែងឆ្លើយតប និងប្រាប់អំពីដំណាក់កាលនៃជីវិតពិតរបស់សម្តេច ដែលឆ្លុះបញ្ចាំងឲ្យឃើញថា សម្តេចតេជោ ហ៊ុន សែន ក្នុងតួនាទីដ៏ខ្ពស់ មិនត្រឹមជាមគ្គុទេសដឹកនាំប្រទេស ស្វែងរកសន្តិភាព ធានានូវស្ថិរភាព និងការអភិវឌ្ឍប៉ុណ្ណោះទេ តែសម្តេចថែមទាំងមានបេះដូងសិល្បៈ យកចិត្តទុកដាក់គ្រប់សេណារីយ៉ោ និងម៉ត់ចត់ជាទីបំផុតទើបវណ្ណកម្មប្រវត្តិសាស្ត្រមួយនេះ បានសម្រេចយ៉ាងជោគជ័យដ៏ក្រៃលែង។
សូមបញ្ជាក់ថា សម្តេចតេជោ ហ៊ុន សែន បានប្រសូត្រនៅថ្ងៃអង្គារ១៥កើត ព្រះចន្ទពេញបូណ៌មី ខែស្រាពណ៍ ឆ្នាំរោង ចត្វាស័ក ព.ស ២៤៩៦ ត្រូវនឹងថ្ងៃទី០៥ ខែសីហា ឆ្នាំ១៩៥២ នៅឃុំពាមកោះស្នា ស្រុកស្ទឹងត្រង់ ខេត្តកំពង់ចាម។
សម្តេចតេជោ ហ៊ុន សែន បានធំធាត់ និងសិក្សានៅក្នុងស្រុកភូមិ រហូតដល់ឆ្នាំ១៩៦៤ បានមករស់នៅក្នុងវត្តនាគវ័ន្ត ក្នុងរាជធានីភ្នំពេញ ដើម្បីបន្តការសិក្សានៅវិទ្យាល័យឥន្ទ្រៈទេវី ក្នុងវ័យទើបតែ ១២ឆ្នាំប៉ុណ្ណោះ។វ័យ១២ឆ្នាំ ជាវ័យដែលត្រូវទទួលបានការថ្នាក់ថ្នមបីបមខ្ពស់ពីឪពុកម្តាយ តែដោយសារស្ថានភាពស្រុកទេសខ្វះសាលារៀន ក៏ត្រូវបង្ខំឱ្យលោកឪពុកអ្នកម្តាយ សម្រេចបញ្ជូនកុមារា ហ៊ុន បូណាល់ (ឈ្មោះពីកំណើតរបស់សម្តេចតេជោ) មកស្នាក់នៅក្នុងវត្តនារាជធានីភ្នំពេញ ដើម្បីស្វះស្វែងរកវិជ្ជាជាទុនសម្រាប់ជីវិត។
ជីវិតជាកូនកសិករក្រខ្សត់មករៀនក្នុងរាជធានីភ្នំពេញ ដែលពោរពេញដោយភាពស៊ីវិល័យ ធ្វើឱ្យកុមារា ហ៊ុន បូណាល់ ជួបនូវសម្ពាធជាច្រើនក្នុងជីវិតទាំងការហូបចុក និងការសិក្សារៀនសូត្រ។បន្ថែមពីលើនោះកុមារា ហ៊ុន បូណាល់ក៏ទទួលរងការប្រមាថមើលងាយពីកូនមន្ត្រី និងកូនអ្នកមានធនធានក្នុងរាជធានីភ្នំពេញមួយចំនួនផងដែរ។បទពិសោធន៍ជីវិតរងការប្រមាថមួយនេះ ធ្វើឱ្យសម្តេចតេជោ តែងអប់រំកូនៗឱ្យចេះឱនលំទោន និងមិនត្រូវប្រមាថមើលងាយអ្នកក្រខ្សត់ជាដាច់ខាត។
បទចម្រៀង «ជីវិតក្មេងវត្ត» ដែលជាស្នាដៃនិពន្ធដោយផ្ទាល់របស់សម្តេចតេជោ ហ៊ុន សែន គឺជាលើកបង្ហាញនូវជីវិតតស៊ូមួយនៅក្នុងជីវិតរបស់សម្តេច ហើយក៏ជាចំណែករុញច្រានឱ្យជីវិតសម្តេចទទួលបានជោគជ័យ និងមានភាពល្បាញល្បីរហូតដល់សព្វថ្ងៃផងដែរ។ ប្រសិនបើសម្តេចមិនតស៊ូ និងជម្នះការលំបាកទាំងឡាយក្នុងវ័យកុមារភាពទេនោះ សម្តេចតេជោ ក៏មិនអាចស្វែងរកចំណេះមកទ្រទ្រង់ជីវិតឱ្យបានល្បីរន្ធឺដូចពេលបច្ចុប្បន្ននេះឡើយ៕
ចែករំលែកព័តមាននេះ