ខេត្តបន្ទាយមានជ័យ ៖ ច្រករបៀងតាមបន្ទាត់ព្រំដែនក្នុងខេត្តបន្ទាយមានជ័យ បច្ចុប្បន្នហាក់ស្ងប់ស្ងាត់ខុសពីមុនសម័យកូវីដ និងពុំមានពលរដ្ឋឆ្លងដែនទៅធ្វើការលើទឹកដីថៃព្រឹកវិលល្ងាចឡើយ។ ច្រករបៀងណា ក៏ដូចច្រករបៀងណាដែរ ពេលថ្ងៃគេឃើញមានសភាពស្ងប់ស្ងាត់លើកលែងតែច្រកតំបន់ម៉ាឡៃ, ច្រកតំបន់បឹងត្រកួន និងច្រកទ្វារអន្តរជាតិប៉ោយប៉ែត ដែលមានការចរាចរណ៍ដោះដូរកសិផល, ទំនិញសេដ្ឋកិច្ចពាណិជ្ជកម្ម។
សម្រាប់ច្រករបៀងខាងជើង ផ្លូវជាតិលេខ៥ ច្រករបៀងខ្លះស្ងាត់ជ្រងុំ គ្មានអ្នកធ្វើដំណើរចេញចូល ខណៈច្រករបៀងខ្លះឃើញមានត្រឹមរថយន្តថៃ ចេញចូលមកដឹកអង្កាមពីទឹកដីខ្មែរ គឺច្រករបៀងតំន់៥ ស្ថិតក្នុងភូមិព្រៃចាន់ ឃុំអូរបីជាន់ ស្រុកអូរជ្រៅ។
លោកឧត្តមសេនីយ៍ត្រី ឃួន ជឿន មេបញ្ជាការយោធាការពារព្រំដែនលេខ៥០៣ ដែលគ្រប់គ្រងបន្ទាត់ព្រំដែនលើភូមិសាស្ត្រស្រុកអូរជ្រៅ, ស្វាយចេកខាងជើង ផ្លូវជាតិលេខ៥ ក៏ដូចជាលោកវរសេនីយ៍ឯក សួង សៅ មេបញ្ជាការនគរបាលការពារព្រំដែនគោកលេខ៨១៥ ប្រចាំភូមិសាស្ត្រស្រុកម៉ាឡៃខាងត្បូវ ផ្លូវជាតិលេខ៥ ប្រាប់តាមបណ្តាញសង្គមវ៉សអាប់ និងទូរស័ព្ទថា ចាប់តាំងពីប្រទេសរឹតបណ្តឹងព្រំដែន ដើម្បីបង្ការទប់ស្កាត់ការរីករាលដាលជំងឺកូវីដ១៩ គឺពុំមានពលរដ្ឋឆ្លងព្រំដែនតាមច្រករបៀង ទៅធ្វើការលើទឹកដីថៃព្រឹកវិលល្ងាចឡើយ៕
ចែករំលែកព័តមាននេះ