ភាពតានតឹងមានការកើនឡើងនៅសមុទ្រចិនខាងកើតរវាងចិន និងជប៉ុន ។ ក្រុងប៉េកាំងនាថ្ងៃទី១ មីនា បានបញ្ជូននាវាចម្បាំង៣គ្រឿងរបស់កងឆ្មាំឆ្នេរសមុទ្រទៅល្បាតជុំវិញប្រជុំកោះមានជម្លោះជាមួយជប៉ុន ព្រោះតែ
ភាពតានតឹងមានការកើនឡើងនៅសមុទ្រចិនខាងកើតរវាងចិន និងជប៉ុន ។ ក្រុងប៉េកាំងនាថ្ងៃទី១ មីនា បានបញ្ជូននាវាចម្បាំង៣គ្រឿងរបស់កងឆ្មាំឆ្នេរសមុទ្រទៅល្បាតជុំវិញប្រជុំកោះមានជម្លោះជាមួយជប៉ុន ព្រោះតែទាមទារអធិបតេយ្យភាពពីជប៉ុន ។
រឿងជម្លោះប្រជុំកោះនេះជារឿងរសើបខ្លាំងបំផុតមួយចាប់តាំងពីច្រើនទសវត្សមកហើយ ក៏ប៉ុន្តែប្រធានាធិបតីថ្មីអាេមរិក លោកដូណាល់ ត្រាំ បានយកប្រេងជះលើភ្លើង ដោយអះអាងជាថ្មីកាលពីខែមុន ដូចលោកបារ៉ាក់ អូបាម៉ា ដែរ ថា ប្រជុំកោះដែលគ្មានមនុស្សរស់នៅនេះនឹងការពារតាមរយៈសម្ព័ន្ធភាពយោធារវាងក្រុងតូក្យូ និងក្រុងវ៉ាស៊ីនតោន ។
ប្រទេសចិនមានការខឹងសម្បាខ្លាំងចំពោះការប្រកាសនេះដែលធ្វើពេលនាយករដ្ឋមន្ត្រីជប៉ុន លោកស៊ីហ្សូអាបេ ទៅបំពេញទស្សនកិច្ចនៅសហរដ្ឋអាេមរិក រួចត្រូវលោកត្រាំ ទទួលរាក់ទាក់បំផុត ហើយបង្ហាញពីការជួយទ្រទ្រង់របស់លោក ។
មេដឹកនាំទាំង២កាលពីពាក់កណ្តាលខែកុម្ភៈ បានសម្តែងពីការប្រឆាំងចំពោះរាល់សកម្មភាពដែលសំដៅធ្វើឱ្យប៉ះពាល់ដល់ការគ្រប់គ្រងរបស់ជប៉ុនលើប្រជុំកោះនេះ ដែលចិនហៅប្រជុំកោះ DYAOYU ហើយជប៉ុនហៅប្រជុំកោះ SENKAKU ។
ប៉ុន្មានថ្ងៃមុននេះ រដ្ឋមន្ត្រីការពារប្រទេសអាមេរិក លោក JAMES MATTIS ក៏បានផ្តល់សារដូចគ្នានេះ ពេលលោកមកកាន់ក្រុងតូូក្យូ ។ ចិនបានបញ្ចេញប្រតិកម្មយ៉ាងខ្លាំងក្លាដោយចោទប្រកាន់ក្រុងវ៉ាស៊ីនតោនថា បង្កអស្ថេរភាពក្នុងតំបន់ ហើយអះអាងថា សន្ធិសញ្ញាជប៉ុន-អាមេរិក គឺជា «ផលិតផលមួយនៃសង្គ្រាមត្រជាក់» ដែលមិនត្រូវជាន់ឈ្លីលើអធិបតេយ្យភាពដែនដីរបស់ចិន និងបណ្តាសិទ្ធិស្របច្បាប់របស់ខ្លួនឡើយ រួចអះអាងថា ប្រជុំកោះនេះជារបស់ចិនចាប់តាំងពីបុរាណកាលមកម្ល៉េះ ។
តាមរយៈការបង្ហាញកម្លាំងនេះ ពិតណាស់ញ៉ាំងឱ្យមានការតវ៉ានានារបស់ជប៉ុន ។ ចិនធ្លាប់បង្កើនការគាបសង្កត់រួចហើយកាលពីរដូវក្តៅឆ្នាំ២០១៦ ដោយបញ្ជូនបណ្តានាវាចម្បាំងរបស់កងឆ្មាំឆ្នេរសមុទ្រទៅកាន់តំបន់ប្រជុំកោះនេះ រួចបើតាមជប៉ុនថា មានទាំងបញ្ជូនយន្តហោះស៊ើបការណ៍មួយមកកាន់ទីនោះទៀតផង ។
ទំនាក់ទំនងរវាងមហាអំណាចអាស៊ីទាំង២មានការស្រុតចុះដុនដាបយ៉ាងច្បាស់ ក្រោយការសម្រេចរបស់ក្រុងតូក្យូកាលពីឆ្នាំ២០១២ ធ្វើជាតូបនីយកម្ម ផ្នែកមួយធំនៃប្រជុំកោះនេះ ដោយរដ្ឋាភិបាលជប៉ុនទិញកោះ៣ពីគ្រួសារជប៉ុនមួយ ដែលជាម្ចាស់កម្មសិទ្ធិនៃកោះទាំងនោះ ។
ជារបស់ចិនកាលពីរជ្ជកាលគិញ QING ប្រជុំកោះនេះ ត្រូវបានបញ្ចូលទៅក្នុងប្រទេសជប៉ុន ក្រោយជ័យជម្នះរបស់ខ្លួនក្នុងសង្គ្រាមចិន-ជប៉ុនលើកទីមួយកាលពីឆ្នាំ១៨៩៥ ។ ក៏ប៉ុន្តែក្រុងប៉េកាំងនាសម័យកាលនោះហាក់ពុំចាត់វិធានការការពារសិទ្ធិរបស់ខ្លួនឡើយ ទើបតែក្នុងឆ្នាំ១៩៧២ ពេលដែលសហរដ្ឋអាេមរិកប្រគល់ឱ្យជប៉ុនវិញនូវដែនដីផ្សេងៗ ក្នុងនោះមានទាំងប្រជុំកោះ SENKAKU ផង។
ក្រៅពីជម្លោះប្រវត្តិសាស្ត្រ និងការប្រកាន់លទ្ធិជាតិនិយមរបស់ប្រទេសទាំង២ ចិនខិតខំពង្រីកឥទ្ធិពលរបស់ខ្លួនក្នុងតំបន់នេះ ដែលសម្បូរដោយប្រេងកាត និងឧស្ម័នដូចដែលចិនបានធ្វើនៅសមុទ្រចិនខាងត្បូងដែរ ៕
ចែករំលែកព័តមាននេះ