រាជធានីភ្នំពេញ ៖ កាលពីថ្ងៃទី២ មីនា ស្ថានីយទូរទស្សន៍អាស៊ីអាគ្នេយ៍(SEA-TV) បានធ្វើសន្និសីទសារព័ត៌មានប្រកាសបើកការប្រដាល់មួយថ្មី ដោយអះអាងថា បណ្ដាលមកពីតម្រូវការអ្នកទស្សនាកើនឡើង និងជាការចង់
រាជធានីភ្នំពេញ ៖ កាលពីថ្ងៃទី២ មីនា ស្ថានីយទូរទស្សន៍អាស៊ីអាគ្នេយ៍(SEA-TV) បានធ្វើសន្និសីទសារព័ត៌មានប្រកាសបើកការប្រដាល់មួយថ្មី ដោយអះអាងថា បណ្ដាលមកពីតម្រូវការអ្នកទស្សនាកើនឡើង និងជាការចង់បានរបស់ម្ចាស់ស្ពុនស័រ ។ ព្រឹត្តិការណ៍ថ្មីដែលនឹងលេចឡើងនេះ គឺមានឈ្មោះថា ប្រដាល់មិត្តភាពអន្តរជាតិស្រាអាឡិចហ្សង់ ។
លោក ញាណ សុធី អ្នករៀបចំកម្មវិធីប្រចាំសា្ថនីយទូរទស្សន៍អាស៊ីអាគ្នេយ៍បានអះអាងថា ព្រឹត្តិការណ៍ប្រដាល់អន្តរជាតិរបស់ក្រុមហ៊ុនស្រាអាឡិចហ្សង់ នឹងចាប់ដំណើរការនៅថ្ងៃអាទិត្យទី៥ មីនា សប្ដាហ៍នេះហើយ ដោយនេះជាព្រឹត្តិការណ៍ថ្មីជំនួសឱ្យព្រឹត្តិការណ៍ប្រដាល់អន្តរជាតិរបស់ស្រាបៀរហ្គេងប៊ឺគ ដែលផ្លាស់ប្ដូរម៉ោង ។ លោកថាបើនិយាយពីពេលវេលា ព្រឹត្តិការណ៍ដែលបើកដំណើរការនេះ មិនមែនជាការប្រកួតថ្មីនោះទេ ដោយសារតែរាល់អាទិត្យទូរទស្សន៍អាស៊ីអាគ្នេយ៍មានការប្រកួតអន្តរជាតិបែបនេះជាប្រចាំមកហើយ ប៉ុន្តែបើសំដៅពីឈ្មោះកម្មវិធី និងទម្រង់កម្មវិធីគឺជាសង្វៀនថ្មីសុទ្ធសាធ សម្រាប់ស្ថាប័នរបស់លោក ។ ការប្រកួតនេះ នឹងតម្រូវឱ្យមានគូអន្តរជាតិតែមួយគូប៉ុណ្ណោះ ប៉ុន្តែប្រកួតរៀងរាល់សប្ដាហ៍ ហើយគូប្រកួតនីមួយៗត្រូវសម្រាំងខុសពីព្រឹត្តិការណ៍អន្តរជាតិមុនៗ ។ លោកថា ព្រឹត្តិការណ៍ប្រដាល់របស់ស្រាអាឡិចហ្សង់ និងលេចរូបរាងដោយមានវត្តមានកីឡាករឡៅ ចន្ទ្រា បើកឆាកមុនគេ ទើបក្នុងវេទិកាប្រកួតទូរទស្សន៍អាស៊ីអាគ្នេយ៍សម្រេចឱ្យកីឡាកររូបនេះ មកបង្ហាញខ្លួនក្នុងវេទិកាសន្និសីទកាសែត ។ លោកថា ការរំលេចព្រឹត្តិការណ៍ថ្មីនេះ នឹងជួយឱ្យវិស័យកីឡាមានតម្រូវការកីឡាករច្រើនយ៉ាង ដែលមិនខុសពីធ្វើឱ្យកីឡាករម្នាក់មានទីផ្សាររីកធំ ។
យ៉ាងណាមិញ ការបារម្ភពាក់ព័ន្ធនឹងកង្វះកីឡាករល្អសម្រាប់ឡើងប្រកួតក៏កើតមានដែរ ដោយសារតែវិស័យប្រដាល់នាពេលបច្ចុប្បន្ន គឺកីឡាករថៃដែលត្រូវយកមកប្រកួតកាន់តែមានសមត្ថភាព ហើយកីឡាករកម្ពុជាល្អក៏ចេះតែចាស់វស្សាខ្លាំងឡើងដែលធ្វើឱ្យកម្រិតប្រកួតរបស់ពួកគេចុះខ្សោយ ។
អីុចឹងហើយទើបកីឡាករឡៅ ចន្ទ្រា និងកីឡាករវ័យក្មេងជាច្រើនទៀត នឹងត្រូវលើកស្ទួយដើម្បីឱ្យវិស័យប្រដាល់នៅតែមានការគាំទ្រ ។
លោកថា ព្រឹត្តិការណ៍អន្តរជាតិអាឡិចហ្សង់នឹងប្រែក្លាយកីឡាករក្មេងៗឱ្យឈានឡើង ដើម្បីបង្កើតធនធានអ្នកប្រដាល់នៅលើសង្វៀន ។ លោកស្នើឱ្យកីឡាករគ្រប់រូបប្រឹងប្រែងហ្វឹកហាត់ និងពង្រឹងសមត្ថភាពដោយអះអាងថា ការរំពឹងតែលើមានការផ្គូផ្គងទើបចូលហ្វឹកហាត់ គឺជារឿងដែលមិនគួរមាន ដោយសារតែកីឡាករត្រូវហ្វឹកហាត់ជាប្រចាំ ទើបមានសមត្ថភាពល្អ ។ យ៉ាងណាមិញ លោកក៏ទទួលស្គាល់ថាបញ្ហាខ្វះខាតលុយកាក់បំប៉នសុខភាពជាប្រចាំ ក៏ជាហេតុផលដែលកីឡាករកម្ពុជា មិនសូវចង់ហ្វឹកហាត់ជាប្រចាំ នៅពេលការផ្គូផ្គងមិនទាន់កើតមាននោះផងដែរ ។ លោកថា មានតែឆន្ទៈរបស់កីឡាករប៉ុណ្ណោះទើបអាចដំណើរការពង្រីកសមត្ថភាព ក្នុងពេលដែលកីឡាករគ្រប់រូបក៏មានចំណូលល្អជាងមុនដែរនោះ ។
លោក ញាណ សុធី បញ្ជាក់ថា ព្រឹត្តិការណ៍ប្រដាល់អន្តរជាតិហ្គេងប៊ឺគដែលប្ដូរទៅប្រកួតនៅយប់ថ្ងៃសៅរ៍វិញ នឹងចាប់ផ្ដើមដំណើរការពីថ្ងៃសៅរ៍ទី៤ មីនា ពីម៉ោង៨យប់ដូចគ្នានឹងការប្រកួតអន្តរជាតិរបស់ស្រាបៀរប្លេកខេត ដោយគ្រាន់តែខុសថ្ងៃគ្នា ។ លោកថា ការប្រកួតនៅយប់ថ្ងៃសៅរ៍នោះ ក៏ចាត់ជាកម្មវិធីប្រដាល់ថ្មីផងដែរ ដោយសារតែបើកការប្រកួតនៅក្នុងពេលវេលាថ្មី ដែលសង្វៀនទូរទស្សន៍អាស៊ីអាគ្នេយ៍មិនទាន់មាន ។ ក្នុងនោះចំពោះទម្រង់ប្រកួតក៏មានការប្រែប្រួលខ្លះដែរ ដោយរាល់សប្ដាហ៍ត្រូវប្រកួតអន្តរជាតិ ហើយរាល់២សប្ដាហ៍ម្ដង គឺមានការប្រកួតអន្តរជាតិដណ្ដើមប្រាក់លានម្ដង ។ លោកថា ការតម្កល់ប្រាក់លានហើយតម្រូវឱ្យកីឡាករកម្ពុជា និងថៃដណ្ដើមគ្នា នឹងធ្វើឱ្យការប្រកួតមួយនេះ បើទោះជាត្រូវប្ដូរពេលទៅប្រកួតពេលយប់ថ្ងៃសៅរ៍ក៏នៅតែមានការចាប់អារម្មណ៍ខ្ពស់ មិនខុសពីការប្រកួតរាល់ព្រឹកថ្ងៃអាទិត្យ ។
កីឡាករ ឡៅ ចន្ទ្រា បានអះអាងថា នៅចុងសប្ដាហ៍នេះ លោកនឹងប្រកួតបើកឆាកក្នុងព្រឹត្តិការណ៍ប្រដាល់អន្តរជាតិស្រាអាឡិចហ្សង់ ហើយលោកក៏សប្បាយចិត្តណាស់ដែរដែលសង្វៀនទូរទស្សន៍អាស៊ីអាគ្នេយ៍បើកការប្រកួតមួយសង្វៀនថ្មី ហើយជួយឱ្យកីឡាករគ្រប់រូបមានទីផ្សារល្អជាងមុន ។ លោកថា ខ្លួននឹងប្រឹងប្រកួតឱ្យអស់ពីសមត្ថភាពសម្រាប់ការបើកឆាកនៅថ្ងៃខានស្អែក ដើម្បីឱ្យអ្នកគាំទ្រទទួលយកបាន ៕
ចែករំលែកព័តមាននេះ