ខេត្តសៀមរាប ៖ កម្លាំងនគរបាលនៃស្នងការដ្ឋាននគរបាលខេត្តសៀមរាប បានធ្វើការឃាត់ជនជាតិវៀតណាមចំនួន២៤នាក់ (មានស្រី១១នាក់) ក្នុងករណីបង្ខាំងមនុស្សខុសច្បាប់នៅលើទឹកដីខេត្តសៀមរាប ។ បើតាមរបាយការណ៍របស់ស្នងការដ្ឋាននគរបាលខេត្តថា ការឃាត់ខ្លួនមនុស្ស ក៏បានដកហូតរថយន្តចំនួន២គ្រឿងផងដែរ នៅវេលាម៉ោង១២ថ្ងៃត្រង់ថ្ងៃទី២៥ ខែកញ្ញា កន្លងទៅ ។
សមត្ថកិច្ចបានបញ្ជាក់ថា ការឃាត់ខ្លួនជនជាតិវៀតណាម ប្រុស-ស្រីទាំង២៤នាក់ខាងលើ ធ្វើឡើងចំនួន៣ទីតាំងផ្សេងៗគ្នា ដែលទីតាំងទី១-ស្ថិតនៅតាមបណ្តោយផ្លូវជាតិលេខ៦ត្រង់ អក្សរ T ខាងកើតរង្វង់មូល ស្រុកក្រឡាញ់ ស្ថិតនៅភូមិ កំពង់ថ្កូវ២ ឃុំកំពង់ថ្កូវ ស្រុកក្រឡាញ់ ដោយឃាត់មនុស្សបានចំនួន៨នាក់ (ស្រី២នាក់) និងរថយន្តម៉ាកស្តារិច១គ្រឿង ។ ទីតាំងទី២-នៅផ្ទះវីឡាជួល ស្ថិតនៅក្រុម ទី៩ ភូមិគ្រួស សង្កាត់ស្វាយដង្គុំ ក្រុងសៀមរាប ឃាត់ខ្លួន ជនជាតិវៀតណាមចំនួន៩នាក់ (ស្រី៥នាក់) និងដកហូតរថយន្ត១គ្រឿង ម៉ាកតូយូតា១២ កៅអីពណ៌ស១គ្រឿង។ ចំណែកទីតាំងទី៣-ស្ថិតនៅភូមិក្រសាំង សង្កាត់ជ្រាវ ក្រុងសៀមរាប ឃាត់ខ្លួនជនជាតិវៀតណាម៧នាក់ ។
តាមរបាយការណ៍ពីសមត្ថកិច្ចដដែលបង្ហាញថា តាមការសន្និដ្ឋានដំបូង គឺជាករណីចាប់ជំរិតដោយសារ មានស្ត្រីម្នាក់មានរបួសស្នាម ដោយការធ្វើទារុ.ណ.ក.ម្ម ។ ប៉ុន្ដែទោះបីយ៉ាងណា សមត្ថកិច្ចនៅមិនទាន់បញ្ជាក់លម្អិត អំពីការបង្ក្រាបករណីបង្ខាំងមនុស្សដោយធ្វើទា.រុណ.ក.ម្មខាងលើនេះទេ ដែលដើមចមផ្តើមចេញដោយសារអ្វីឱ្យប្រាកដឡើយ។
បច្ចុប្បន្ន ជនជាតិវៀតណាមប្រុស-ស្រី២៤នាក់ខាងលើ កំពុងសាកសួរនៅស្នងការដ្ឋាននគរបាលខេត្តសៀមរាប ដើម្បីអនុវត្តតាមនិតិវិធីច្បាប់។ សូមបញ្ជាក់ថា មកដល់ថ្ងៃទី២៨ កញ្ញា នេះ សមត្ថកិច្ចនគរបាលការិយាល័យជំនាញមិនទាន់ប្រាប់លម្អិតដល់ភ្នាក់ងារកោះសន្តិភាពនៅថ្ងៃនេះទេ ដោយឱ្យរង់ចាំសមត្ថកិច្ចកំពុងសួរនាំ និងស្រាវជ្រាវ ស្វែងរកមេខ្លោង ដើម្បីយកមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ